Kûnung'una kwa muntû arî na thîîna
Kîrî mûtongoria wa wini. Sabuuri ya Ndaundi.
109
1 Ngai ûra nkumagia,ûtigaakire ki,
2 n'ûntû antû bara bathûûku na arongo
barîaria mantû mathûûku îgûrû rîakwa,
barîaria ûrongo mantûûni maakwa.
3 Bancerereete na biugo bia rûmena,
barîrûa naani mana maatheri.
4 Bo ndabeenda, bagatuîka aanthitangi,
na niû mbîgagua nkîbarombera.
5 Mbarûthagîra mantû meega, îndî bo bakandea na mantû maathûûku.
I mbendeete, îndî bo i baameneete.
6 Taara mûgambithania ûmûthûûku amûgaambithie,
rekeeria mûnthû amûgambithie.
7 Aagaambithua, n'oonekane arî na mabîtia,
na maromba maake i matarwe marî wîyia.
8 Matugû maake maroogaûka,
muntû ûngî aroothûkia kaanya gaake.
9 Aana baake barootigwa batarî na îthe,
na mwekûrû wake atigwe arî ntigwa.
10 Aana baake barooriûnga bakîrombaga irio,
baroîngatua kuuma maganjooni ma mîciî yao.
11 Mwîrandû wake aroomûtuunya into biake bionthe,
na ageni bathare into biake bionthe bira athithinîrîîte.
12 Gûtikooneke muntû n'womwe wa kûmûrûthîra bwega,
kana kwîgua kûrî na muntû wa kwîgîîrua tûkîa tûra atigîîte kîao.
13 Rûrîîyo rwake rûroororomera.
Antû ba nciarwa ikaaya, irooriganîrua mantû maake.
14 Mwathani arooririkana moothûûku ma biûyûûyû biake,
na wîyia bwa gina nabu, bûtikoororekerwa.
15 Mwathani arooririkana meeyia maao rîonthe,
kaingo nkuma yao aaga nthîgûrû îriganîria.
16 N'ûntû ataaririkana kûrûthîra bangî bwega,
îndî aanyamaariirie na aûraga
nkîa, mûthîîni, na bara baakuîte nkoro.
17 N'eendeete kûrîrîkana mûno,
mûrekeerie agwatwe i kîrumi!
Atikenagîîra kûthaarimana,
n'we atikoone wa kûmûtharima!
18 Eeguîkîîte kûrîrîkana ta muntû wîguîkîîte nguo,
ga kîthûngîre mwîrî wake ta muntû akûnyua rûûyî,
kana ta muntû eebakîîte maguta.
19 Irumi birookara ta nguo ciake ira eekagîra,
kana ta mûkanda ûra oogaga kauna gaake kîra ntugû.
20 Rîrî rîrootuîka îrîi rîa Mwathani kîrî anthû baakwa,
na kîrî bara baaragia mantû maakwa mathûûku.
21 Îndî woû, Ngai Mwathani wakwa,
nteethia wa ta bûra wampeere wîrane,
na ûntuunyûkie n'ûntû bwa wega bwaku bûrî wendo.
22 Niû ndî nkîa na ndî na ûbatu,
na inkwîgua ngîakanwa mûno nkorooni yakwa.
23 Niû i nkûtherekeria ta kîrundu thaa cia ûgoro,
Nkari ta ngige îburûkîîtue i kîbuubani.
24 Maru maakwa matirî na inya kuumania
na gûtîîrîra kûrîa n'ûntû bwa maromba,
mwîrî wakwa waceng'a watuîka maîndî akî.
25 Naani ntuîkîîte gîntû gîa kûnyûrûntwa n'anthû baakwa,
baambonaga bakainainia biongo.
26 Nteethia, Itû Mwathani Ngai wakwa,
mbonokia kûringana na wega bwaku bûrî wendo.
27 Ûtûme bamenye atî i njara yaku,
woû Mwathani, yaarûtha mantû mama.
28 Bo i barîrîkane, îndî woû ûthaarimane.
Baambithûkîra i bagîe îgi,
îndî niû mûruti ngûgî waku ngaakena.
29 Bara banthitangaga barooguîkwa i kwaga gîtîîyo ta nguo,
barookunîkîrwa n'îgi ta muntû gwîcaîkîîte gîcaîko.
30 Ngaacookeria Mwathani nkaatho inyingî mûno na kanyua gaakwa,
îî, nkamûkumîria mbere ya kîrîndî kiingî mûno.
31 N'ûntû akaraga eeteereete gûteethia ûra arî na ûbatu,
amwonokia kuuma kîrî bara baagiitire îgamba rîa kûmûûraga.