Wega bwa Mwathani kîrî antû baake
106
1 Kumiani Mwathani,Cookeriani Mwathani nkaatho n'ûntû n'ûmwega,
wendo bwake i bwa gûtûûra tene na tene!
2 N'ûû ûûmba gûtarania mantû maanene mara Mwathani arûthîîte,
kana akamûkumia bûra kûbatîîrue?
3 Kîthaarimo i kîrî bara baathîkagîra maathana maake,
bara rîonthe barûthaga bûra kûbatîîrue.
4 Ndirikanaga Mwathani rîra ûkûthaarima antû baaku,
na ûûntarage rîra ûkîbateethia.
5 Kaingo mbona antû baaku bara ûthuurîîte bakîgunîka kaîrî,
na nkeneera amwe nabo,
na ndîîkumia amwe na bara barî baaku.
6 Twîyîîtie wa ta bûra biûyûûyû bietû bieyiirie,
itûbîtîîtie, na twarûtha ûthûûku.
7 Rîra biûyûûyû bietû biarî Miisiri,
bitaarîcûkwa bimenya mantû ma kûrigaria mara warûthire.
Ibariganîîrue i maita magana wabeegîîrue kîao,
na baaregana na Ûra Arî Îgûrû Mûno barî Îria Rîtuune.
8 Îndî n'aaboonokiirie, wa ta bûra eeranîîte,
kaingo oonania inya yake îînene.
9 Aagondokeere Îria Rîtuune narîo rîaboa,
abakûrûkîîria nthîgûrû îmbûmo ta ng'aarû.
10 Aaboonokirie kîrî bara babameneete,
na abatuunyûkia kuuma kîrî anthû baao.
11 Anthû babu baao baakunîkanua i rûûyî baariama,
na gûtirî nwa ûmwe aamonyia.
12 Rîru i rîo antû babu baake beetîgiirîe mawîrane maake,
na baina nyîmbo cia kûmûkumia.
13 Nthûti îmwe baariganîrua i bûra aarûthîîte,
batua kûrûtha mantû batakûmûromba ûkûrû.
14 Barî naagu rwanda beegua guuru înene ya nyama,
na baageria Ngai barî noogo.
15 N'we Mwathani abaneenkera kîra baamûrombeete,
aacooka abarekeeria mûrimo ûmûthûûku.
16 Barî kambîîni beegîîrua Musa rûriitho
na Arûni, mûruti ngûgî ûmûtheru wa Mwathani.
17 Nthîgûrû yaatûka yaameria Ndathani,
na yaathika Abiramu na mûciî wake.
18 Mwanki wabîîthia gîkundi kîao,
na wabîîthia bara bathûûku bonthe.
19 Barî Orebu baarûtha mûbuanano wa kayaû wa thaabu,
na bagonga mûbuanano wa îthaga.
20 Baakûûrania ûkumio bwa Ngai,
na mûbuanano wa nyamû îrîîyaga nyaki.
21 Baariganîrua i Ngai ûra aabonokiirie,
ûra aarûthire mantû manene Miisiri,
22 mantû ma kûrigaria nthîgûrû ya Amu,
na mangî ma kûmakania Îria Rîtuune.
23 Ngai akuuga akaathiria antû baake,
Musa mûruti ngûgî wake,
n'amweerekire mûno,
na aatûma Ngai agarûra mûthûûro wake, atikaaye kûbathiria.
24 Rîru baacooka baamena nthî îra mbega,
n'ûntû bwa kûrega gwîtîgia wîrane bwa Ngai.
25 Baakari maremaani maao bakînung'unaga,
na bataathîkîra Mwathani.
26 Kwoogu aûkîîria njara îgûrû aathiîtia auga,
agaatûma bathirîra naagu rwanda,
27 na anyagaarie nciarwa ciao kîrî mîgongo îîngî,
na bakuîre mîgongooni îîngî.
28 Kaîrî Aisiraeri barî Peori i baatwire kûgongaga Mbaari,
na bakarîa igongwana bira biarutagîrwa ngai itaarî mwoyo.
29 Mathiithio maao i maatûmire Mwathani athûûra,
na abarekeeria bagwatwa i mûrimo ûmûthûûku.
30 Rîru i rîo Finiasi aarûngamire aakaanûkia bara baarî na mabîtia,
na mûrimo wathira.
31 Ûntû bûbû bwatua gûtaragwa bûrî bwagîru,
na bûgatûûra bûririkanagwa kîrî nciarwa cionthe tene na tene.
32 Aisiraeri i baathûûriirie Mwathani barî inyakaani bia Meriba,
Musa n'we aathûngîra thîînaani n'ûntû bwao,
33 n'ûntû i baamûthûûriirie mûno,
mwanka Musa aaria biugo bitaabatîîrue biuma kanyuani gaake.
34 Bataathiria mîgongo,
ta bûra Mwathani aabaathîîte barûthe.
35 Îndî bo beengîranire na mîgongo,
na beerutana mîtugo ya mîgongo înu.
36 Baacooka baanjîîria kûgongaga mîbuanaano ya mîgongo înu,
îra n'yo yacookire gûtuîka mûtego kîrî bo.
37 Baatua kûrutaga nthaka na aarî baao,
barî igongwana kîrî nkoma.
38 Baûraga antû bataarî na mabîtia,
baûraga nthaka na aarî baao,
wa bara baarutaga barî igongwana kîrî mîbuanaano ya Kanaani.
Nthîgûrû yagîa mûgiro n'ûntû bwa gûtûûra nthakame.
39 Beebîkîra mûgiro na ngûgî inu ciao,
na mîkarîreni yao baagîa rûko.
40 N'ûntû bwa ûgu Mwathani aathûûra n'antû babu baake,
na aamena antû bara baarî baake.
41 Abaneenkanîra njarani cia mîgongo,
baatua kwathagwa n'anthû baao.
42 Anthû baao babainyîîria,
na baakara wathooni bwao.
43 Magiita maingî Mwathani nabatunyûkagia,
îndî nabo bakarega kûmwathîkîra,
na beeroromeria meeyiani.
44 Îndî amwe na ûgu, Mwathani n'eegiirue gûkaya kwao,
na aaraithîîria mathîîna maao mara baarî namo.
45 Aaririkana kîrîîkanîro gîake nabo,
na n'ûntû bwa wendo bwake bwingî aagarûra meeciiria
abeegîîrua kîao.
46 Aatûma bara bonthe baabainyagîîria,
babeegîîrua kîao.
47 Twonokie, Itû Mwathani Ngai wetû,
na ûtûcookanîîrie kuuma gatîgatî ka mîgongo,
kaingo tûgûcookagîria nkaatho
na tûkumagie riîtwa rîaku rîîtheru.
48 Kumiani Mwathani, Ngai wa Isiraeri.
Mûkumieni kuuma îîndî mwanka tene na tene!
Antû bonthe i bauge, “Aameni!”
Kumiani Mwathani!