Ngai na antû baake
(1Karaaya 16:8-22)
105
1 Cookeriani Mwathani nkaatho, îtaani riîtwa rîake,menyithiani mîgongo yonthe bûra arûthîîte.
2 Mwinîreeni, bûmûgonge na nyîmbo,
bûkîmenyithanagia mantû ma kûrigaria mara arûthîîte!
3 Îîkumîrieni riîtwa rîake rîîtheru,
nkoro cia bara baceragia Mwathani nigwîrue!
4 Ceriani Mwathani na inya yake,
na bûmûgongage rîonthe!
5 Ririkanaani mantû ma kûrigaria mara Ngai arûthîîte,
biama biake na magamba mara agiitîîte
6 Yîî, biû rûrîîyo rwa Îburaîmu mûruti ngûgî wake,
biû ba rûrîîyo rwa Njakubu, ûra Ngai athuurîîte!
7 Mwathani n'we Ngai wetû,
maathana maake i makûthingatagwa nthîgûrû yonthe.
8 Agaatûûra amenyagîîra kîrîîkanîro gîake tene na tene,
na atiiriganîrua i wîrane bwake mwanka nciarwa ngiri,
9 kîrîîkanîro kîra aarîîkanîîre na Îburaîmu,
na mûthiîtio ûra aathiîtîîrie Isaka.
10 Mwathani n'aarikiirie Njakubu kîrîîkanîro gîku,
kîrî gîa gûtûûra tene na tene,
11 akiugaga, “Ngakwaa nthîgûrû ya Kanaani,
îîgue îrî rûgai rwaku.”
12 Antû babu ba Ngai baarî baakai bagîtarwa,
na baarî ageni gûku nthîgûrû ya Kanaani.
13 Baatwîre bakîriûngaga kuuma mûgongooni ûmwe kûthi ûra ûngî,
kuuma ûneneeni bûmwe kûthi bûra bûngî.
14 Îndî gûtirî nwa ûmwe Ngai aarekeeria abainyîîria,
n'aakanûkagia kinya anene n'ûntû bwao,
15 akiugaga ata rî, “Bûtikaaringithie antû baakwa bara mbîtûûrîrîtie maguta nkabaathûra,
kana bûrûthîra iroria biakwa ûntû bûthûûku!”
16 Mwathani n'aatûmire kûgîa na yûûra nthîgûrû yao,
na eenyangia kaumo konthe ka irio biao.
17 Kûrî muntû aatûmîîte aathiiyaga arî mbere yao,
Njosebu, ûra eendiirue arî ta nkombo.
18 Aakaraga athaîkîîtwe magûrû na mpengû,
na nkingo agatuungîîrwa nyororo,
19 mwanka rîra bûra aaroreetie bwaûyûrire.
Kiugo kîa Mwathani kîonania atî aarî muntû wagîrîîte.
20 Mûnene wa Miisiri aatûmana Njosebu aatharua,
mûtongoria wa mîgongo amûrekeeria.
21 Amûtuîkithia mûnene wa thirikaarî yake,
na amwaa wathani bwa nthîgûrû yake,
22 amwaa watho bwa kwathaga anene bara bangî baarî kwa mûnene,
na kûrutana bara bamweyaga ûkûrû.
23 Rîru i rîo Njakubu aayire Miisiri,
na aatûûra nthîgûrû înu ya Aamu.
24 Mwathani aatûma antû baake baingîa mûno,
na baagîa na inya nkûrûki ya anthû baao.
25 Na aatûma Amiisiri bamena antû baake,
na baatua kûbabangagîra mîbango îmîthûûku.
26 Rîru aatûma mûruti ngûgî wake Musa,
na Arûni, ûra aathuurîîte.
27 I baarûthire mantû maanene ma Ngai,
na baringa biama nthîgûrû ya Amu.
28 Ngai aatûma kûgîa mwindu ûmûrumanu mûno nthîgûrû înu,
îndî amwe na ûgu Amiisiri bataathîkîra maathana maake.
29 Aagarûra rûûyî rwa miuro yao rwatuîka nthakame,
na aûraga makûyû maao monthe.
30 Nthîgûrû yao yaûyûra biûra,
wana kinya nyomba ya mûnene yaûyûra bio.
31 Ngai aacooka aaruta watho,
nthîgûrû înu yaûyûra ngi na ndaa.
32 Aacooka aurithia mbura ya maiga na rweni rûkîenagia
Bantû akuurithia mbura nthîgûrû înu yao,
33 eenyangia mîcabiibû na mîkûyû yao
na aunanga mîtî ya nthîgûrû yao.
34 Aacooka aaruta watho kaîrî,
ngige mûkondo ûtatarîka waaya.
35 Ciarîa mîthemba yonthe ya mîtî îra yarî nthîgûrû yao.
Na ciarîa irio bionthe bira biarî mîndaani.
36 Ngai aacooka aûraga biîmbere bionthe bia twîyî,
bia mîciî yonthe ya antû ba Miisiri.
37 Rîru aaruta antû ba Isiraeri ku
bakamatîîte thaabu na fetha,
na gûtirî nwa ûmwe ataarî na inya na ûgima bwa mwîrî.
38 Rîra Aisiraeri baathiire, Amiisiri i baakenire,
n'ûntû i baakuthûkaga mûno.
39 Ngai n'we aatambûrûkia îtu îgûrû rîa antû baake abakunîkîra,
na abaa mwanki wa kûbamûrîkagîra ûtugû.
40 Bakûmwîtia irio, abanenkera tuumbuthûki,
na abaneenkera irio kwa wingî kuuma îgûrû baarîa na babaa.
41 Aatûraniirie rwara rwa iiga, mûnyîrî wa rûûyî watiibûka,
rwendama gûkûrûkîîra rwanda wata muuro ûkûthi.
42 Aaririkana wîrane bwake bûûtheru,
bûra eerire Îburaîmu mûruti ngûgî wake.
43 Kwoogu Mwathani aaruta antû baake gûku Miisiri,
bakiinaga na kuuga nkemi i gûkena.
44 Abanenkera nthîgûrû cia mîgongo îra îîngî,
na bathûkia ûtonga bwa antû babu bangî bwatuîka bwao.
45 Aarûthire ûgu, kaingo antû baake baathîkîra mawatho maake,
na bamenyagîîra maathana maake.
Kumiani Mwathani!