Gûkumia Ngai Mûûmbi
104
1 Kumia Mwathani, woû nkoro yakwa!Woû Mwathani Ngai wakwa, ûrî ûmûnene mûno,
ûra wîguîkîîte ûnene na gîtîîyo.
2 Ûra eeguîkaga werû ta nguo,
agataambûrûkia îgûrû ta îrema,
3 aakaga mûciî wake îgûrû rîa rûûyî.
Atuîkithagia matu ta nkaarî yake
na agakamatwa i mathabu ma kîbuubani.
4 Ûtûmagîra kîbuubani ta atûmwa kwira ntûmwa ciaku,
na rweni naru ta aruti ngûgî baaku.
5 Woû i woû wenjîîre nthîgûrû mîcingiini yayo yaita,
na îtikooro yenyeenya.
6 Wakunîka nthî na rûûyî rwa îria ta nguo,
na rûûyî wa rûru rwaguîka irîma.
7 Ûgûcooka wagondokera rûûyî rûru, rwatherekeria,
rwatherekeerie rûkwîgua bûra wagondokire na watho bûgana.
8 Rwetia irîmaani,
rwacooka rwendama ibondeeni,
mwanka rwakinya ara warubangîrîte.
9 I woû warurûthîîre mwanka ûra rûtaûmba kwagaara,
kaingo rûtagîcooka gûkunîka nthî rî kana rî.
10 N'ûtûmaga inyaka bia rûûyî bitûrîka biurooni,
na tuuro twa rûûyî tûgakûrûkîîra gatîgatî ka irîma.
11 Tûkanyunyagwa i nyamû cionthe cia kîthaka,
mang'ooi ma kîthaka manyunyaga makabûûtûga.
12 Nyoni ciakaga ntara mîtîîni îra îrî rûteere rwa ndûûyî,
ikainaga irî mpong'iini ciayo.
13 Uurithagîria irîma mbura kuuma îgûrû,
na nthîgûrû îkaûyûrua ithaarimo biaku.
14 Ûgatûma nyaki ya kûrîîthia nyamû cia ndîîthia îkûra,
na imera n'ûntû bwa antû babirîmîra,
kaingo boona bia kûrîa kuumania na mûthetu,
15 na muntû oona ndibei ya kûmûkenagia nkoro,
na maguta magwakaga ûthiû bwake bûguunda,
na irio bia kûmwîkîra inya.
16 Mîtî ya Mwathani n'înyuîte rûûyî rwa kûgana,
n'yo mîthithinda ya Rebanoni îra Mwathani wengwa aandire.
17 Agu n'oogo nyoni ciakaga ntara cia cio,
ntûnda rûkiingo irî na ntara ciayo mîkameeni.
18 Irîmaani bibu biraaya i ku mbûri cia kîthaka itûûraga,
makurungu namo i ku manyore meebithaga.
19 I woû waûmbire mweri n'ûntû bwa kûmenyithania magiita,
na riûa irîmenyaga îgiita rîarîo rîa kûthûa.
20 I woû ûtûmaga gûtuga,
na nyamû cia kîthaka cionthe ciumîra ikarooni biacio iriûnga.
21 Cimba cia biumîri ikaruruma ikîgwîma,
igîcwaa irio bira Ngai acieyaga.
22 Riûa rîauma, igacooka gwa cio,
igacooka mîrinyaani yacio.
23 Rîru antû bakauma bakathi ngûgîîni ciao,
bagatiinda ngûgîîni mwanka ûgoro.
24 Mwathani, n'ûrûthîîte mantû maingî mûno!
Monthe ûmarûthîîte na ûûme bwaku,
nthîgûrû yûûyûri biûmbe biaku.
25 Îria i rîo rîîra, rîînene na rîariî,
ndeeni yarîo kûrî na nyamû imbingî itatarîka
nyamû irî mwoyo, i niini na iinene.
26 I ku meeri ithiiyagîra,
na nyamû îra nene ya îria îîtagwa Rebiathani, îra woû waûmbire, îtûûbage ku.
27 Into bibi bionthe i woû biîgwetie,
kaingo ûbieyaga irio rîra biabatara.
28 Wabinenkera irio,
bikathûkia bikarîa.
Watambûrûkia njara yaku,
bikabaa mantû meega.
29 Wabiûndûkîria mûgongo,
bikamaka.
Wathûkia mîruke yaku,
bigakua bigacooka tîîriini îra biaumire.
30 Watûma Kîrundu waku,
bikaûmbwa,
naawe ûkeerûyia mantû monthe mara marî gûkû.
31 Ûkumio bwa Mwathani bûrootûûra tene na tene,
Mwathani arookeneera ngûgî ciake!
32 Araithaga nthîgûrû, îkainaina,
aaringithia irîma, bigatooga ntoogo.
33 Nkainagîra Mwathani ntugû cia mwoyo wakwa unthe.
Nkainagîra Ngai wakwa nyîmbo cia kûmûkumia bunka ndî mwoyo.
34 Arookenua i rwîmbo rwakwa,
n'ûntû gîkeno gîakwa kiumaga kîrî we.
35 Eeyia baroothirua kuuma aaga nthîgûrû,
bara bathûûku baroororomera cwe.
Kumia Mwathani, nkoro yakwa!
Kumiani Mwathani!