Wendo bwa Ngai
Sabuuri ya Ndaundi.
103
1 Kumia Mwathani, woû nkoro yaakwa,na kîra kîonthe kîrî ndeeni yakwa,
igîkumie riîtwa rîake rîîtheru!
2 Kumia Mwathani, woû nkoro yakwa,
na ûtakûriganîrua i mawega maake monthe mara arûthîîte.
3 N'aandekagîra meeyia maakwa monthe,
na akaamboria mîrimo yakwa yonthe.
4 N'aambonokagia ntigaakue,
na akanthaarima na wendo na kîao.
5 Aanganagîîria mawîrirîîa maakwa na mantû meega,
kaingo ngaakaraga ndî muntû ûmwîthî na ndî na inya ta ndiiû.
6 Mwathani aarûthaga mantû ma wagîru
na akagiita îgamba bûra kûbatîîrue
n'ûntû bwa bara bonthe bainyagîîrua.
7 N'aamenyithaniirie mîbango yake kîrî Musa,
na aatûma antû ba Isiraeri boona ngûgî ira aarûthîîte.
8 Mwathani n'wa kîao na n'ûmwega,
Ûtithûûrangaga na mpwî na aûyûrîîtwe i wendo bûûnene.
9 Atikaraga akîthetaga rîonthe,
kana akara athûûri tene na tene.
10 Atitûkaanûkagia kûringana na meeyia meetû,
kana atûrîithia kûringana na mabîtia meetû.
11 N'ûntû wa ta bûra ûraaya bwa kuuma nthîgûrû kûthi îgûrû bûneneete,
nwa ta bu wendo bwa Ngai bûra eendeete bara bamûtîîyaga bûgana.
12 Wa ta bûra uumîîro bwa riûa bûrî kûraaya na ûthwîro bwa rîo,
nwa ta bu Mwathani athûkîîtie meeyia meetû amaiga araaya naati.
13 Wa ta bûra mûciari eegagîîrua aana baake kîao,
nwa ta bu Mwathani eegagîîrua kîao bara bamûtîîyaga,
14 n'ûntû naiyî kîra tûûmbîîtwe nakîo
naririkanaga tûrî tîîri.
15 Muntû akari ta nyaki,
athongamaga na mpwî ta bûra yûûa rîa kîthaka rîraaga,
16 rîru rîkainainua i kîbuubani, rîgeetîga, rîkatherekeria cwe,
na bantû ara rîkûrî akariganîrua i rîo cwe.
17 Îndî wendo bwa Mwathani bûra bûtathiraga,
bûtûûraga kîrî bara bamûtîîyaga mwanka tene na tene.
Wagîru bwake bûthingatanaga na nciarwa ciao cionthe,
18 ira imenyagîîra kîrîîkanîro gîake
na ikaathîkîra maathana maake.
19 Mwathani aigîîte gîtî gîake kîa ûnene îgûrû,
na ûnene bwake bûrî îgûrû ya into bionthe.
20 Kumiani Mwathani, biû araîka baake,
biû ncamba irî inya, bara bwathîkagîra maathana maake,
bara bwîgagua na bûkaathîkîra kayû ga kiugo gîake.
21 Kumiani Mwathani, biû njûûrî ciake irî na inya,
biû aruti ngûgî baake, bara barûthaga bûra eendaga!
22 Kumiani Mwathani, biû bwinthe biûmbe biake,
gûntû kuunthe kûra aathanaga.
Kumia Mwathani, woû nkoro yakwa.