Îromba rîa mwana mûnyi arî na thîîna
Maromba ma muntû ûmwinyîîrie. Rîra athirîrîîtwe n'inya eeyana makaya maake mbere ya Mwathani.
102
1 Îgua îromba rîakwa, Woû Mwathani,na wîgue kîrîro gîakwa!
2 Ûtikaambuthatîrie mûgongo,
rîra nkûthîîna!
Kiinda gûtû gwaku ûnthikîîrie,
kaingo rîra ngaakaya ûmbîtîga na mpwî.
3 Ntugû ciakwa irîtherekeria ta ntoogo ya mûrangi,
na maîndî maakwa i makûrûngûra ta marî mwankiini wa îganda.
4 Ndîîgua nkoro yakwa yûmagarîîte ta nyaki îîmbûmo,
na ntikwîgua kûrîa irio.
5 N'ûntû bwa gûkaya kûra nkayaga nainya
mwîrî wakwa ûthiranîîtie watigwa maîndî matheri.
6 Nkari ta nderi rwanda,
na ndabuanana na ntundu maganjooni.
7 Ndaaraga ntarî toro.
Nkari ta kanyoni karî goonka kathûmbîri ka nyomba.
8 Anthû baakwa batindaga kûndumanga,
bara baanyûrûntaga batûmagîra riîtwa rîakwa bakîrumana.
9 N'ûntû ndîyaga muu ta irio,
na gîakûnyua gîakwa nkaungania na meethori,
10 n'ûntû bwa mûthûûro waku na marûrû maaku,
ûûnthûkîîtie wambûkîîria na wangera aaraya.
11 Ntugû ciakwa itherekagîria ta kîrundu kîa ûgoro,
nyaaraga ta nyaki.
12 Îndî woû, Mwathani, ûgaatûûra ûrî mûnene tene na tene,
riîtwa rîaku rîkaaririkanagwa i nciarwa cionthe.
13 Ûgaûkîîra wîgîîrue Sayuuni kîao,
n'ûntû îgiita rîgûkinya rîa kûmîgîîrua kîao,
îgiita rîra rîagîrîîte ti rîngî i rîrî.
14 N'ûntû aruti ngûgî baaku i bakenagîîra maiga maayo, wana kinya ûkeegua n'îmbînyangie,
i bakûmîgîîrua kîao, wana kinya ûkeegua n'îmbomboranie.
15 Mîgongo îgatîîya riîtwa rîa Mwathani,
na anene bonthe ba nthîgûrû bagatîîya mwago wake.
16 N'ûntû Mwathani agaacookeeria mwako wa Sayuuni kaîrî,
na oonanie ûnene bwake.
17 Ageetîgîîria maromba ma antû baake bara batiganîrîtue,
na atiibûthia maromba maao.
18 Mantû mama i maandîkwe n'ûntû bwa nciarwa ikaaya,
kaingo wana bara batarî baciare bagaakumia Mwathani.
19 Mwathani n'araithîîrie nthî arî agu îgûrû bantû aake ara atheru,
arî gûku îgûrû aaraithîîria nthîgûrû,
20 eegua gûkaya kwa bara baarî nceera,
na arekeeria bara baatuîrîîtwe îgamba baûragwa.
21 Kwoogu riîtwa rîa Mwathani rîgatûmîîrua Sayuuni,
na ûkumio bwake bûtûmîîrue Njerusaremu,
22 Rîra mîgongo na moonene
makeethîrana amwe kûgonga Mwathani.
23 Mwathani n'atûmîîte nthira inya ndî mwana mûnyi,
aanthîgîra matugû maakwa.
24 Ndauga,
“Itû Ngai wakwa, ûtikanthûkie ntugû ciakwa irî gatîgatî.
Woû Mwathani ûtûûraga tene na tene!”
25 Kîambîrîriani kîongwa, i woû waûmbire nthîgûrû,a
na îgûrû narîo i ngûgî ya njara ciaku.
26 Bibu bikaathira, îndî woû ûgatûûra,
bionthe bigaakûra ta nguo.
Ûgaacita ta nguo inkûrû,
nacio ikaathira.
27 Îndî woû ûtigarûkaga,
na ûtûûraga tene na tene.
28 Aana beetû bagaatûûra bwega,
na nciarwa ciao igaatûûra bwega irî ûmenyeerini bwaku.