Wîrane bwa mûnene kîrî Ngai
Sabuuri ya Ndaundi.
101
1 Nkaina mantû ma wega bwaku na kûgambithania bûra kûbatîîrue,na i woû nkainîra rwîmbo rûru, Mwathani.
2 Nkemenyeera nthingatage mûtûûrîre ûtarî na ûguute.
Irî ûkaaya kîrî niû?
Ngaakaraga gwakwa mûciî
na mûkarîre ûmûtheru.
3 Ntikooro ngwatanîra
na ûntû bûthûûku.
I meneete mantû mara marûthagwa n'antû batarî eetîgua,
gûtirî rîo nkagwatanîra nabo.
4 Nkoro ya ûremu îkeegua îrî aaraaya naani.
Ntiîgua ndî na ngûgî na bûra bûthûûku.
5 Ûra aguutaga mûtûûri wake na witho,
ûyu nkamwînyangia.
Muntû ûra wîkumagia na arî nkoro ya kwîbûkîîria,
niû ntimûmîîria.
6 Meetho maakwa makaaraithîîria na meendeere bara eetîgua ndeeni ya nthîgûrû,
kaingo bakaraga amwe naani.
Ûra wonthe arûthaga mantû matarî na ûguute,
ûyu n'we agaantûmîkagîra.
7 Gûtirî mûûrongo nwa ûmwe
agatûûra nyomba yakwa.
Mwîbuithia atiûmîîria kûrûngama mbere yakwa.
8 Wa ntugû gûgakeeyaga nkaathiragia
bara bathûûku bonthe bara barî nthîgûrû yetû.
Nkeengatia bara bathûûku bonthe
baume taûni ya Mwathani.