Sabuuri 1

SABUURI

ÎBUKU RÎA MBERE

Sabu 1-41

Gîkeno kîa mma

1 Kîthaarimo i kîrî muntû

ûra atathingataga kîrîra kîa bara bathûûku,

kana arûngama njîraani cia bara beeyagia

kana akara gîkarooni kîa bara bacambanagia.

2 Îndî we akenagîîra kwathîkîra watho bwa Mwathani,

na watho wa bûbu i bu athûgaanagîria ûtugû na mûthenya.

3 Akari ta mûtî ûra, wandîîtwe nteere cia tuuro tûrî rûûyî,

ûra ûciaraga rûciaro rwau kagiita ka u kongwa,

na îthangû rîau rîtinyaaraga.

Bûra bunthe arûthaga, i bûbuuyaga.

4 Bara bathûûku batikari ûgu,

bo bakari ta maûngû

mara magûrûkagua i ruuo.

5 Kwoogu bara bathûûku batiirûngama îgambaani berikîîtie,

kana eeyia barûngama gatîgatîîni ka bara baagîru.

6 N'ûntû Mwathani n'we amenyagîîra njîra cia bara baagîru,

îndî njîra ya bara bathûûku îkaûra.