Ayubu eenyiia mbere ya Ngai
42
1 Rîru Ayubu acookeria Mwathani amwîra,2 “Inkûmenya nwa ûrûthe mantû monthe,
gûtirî bu ûbanga kûrûtha ûrigîîrua.
3 Waugire, ‘N'ûû ûyu ûkwînyangia mîbango yakwa
atarî na ûmenyo?’
Ûmma ndaariirie mantû nteereawa,
mantû ma kûrigarania mûno ntaamenyaga,
4 Wambîîrire, ‘Thikîîria naani nkaaria,
ngakûûria biûria
naawe ûncookerie.’
5 Matû maakwa imeegîîtue nkuma yaku
îndî îîndî meetho maakwa magûkwona.
6 Kwoogu, inkwîmeneeria
na i nkwîbaka muu na tîîri n'ûntû bwa kwîrira.”
Mûthiani Ayubu aathaarimwa
7 Mwathani akûrîîkia kwaria na Ayubu, eera Erifasi wa kuuma nthîgûrû ya Temani, “Inthûûrîîte i woû na acoore baaku barî baîrî n'ûntû bûtaaria bûra kûbatîîrue îgûrû rîakwa ta mûruti ngûgî wakwa Ayubu. 8 Kwoogu, îîndî thûkiani ncamba cia ng'ombe mûgwanja na ntûrûme mûgwanja bûthi kîrî mûruti ngûgî wakwa Ayubu na bûrute kîgongwana gîa kûbîîthua n'ûntû bwenu. Mûruti ngûgî wakwa Ayubu akabûrombera, na ngeetîgîîria îromba rîake na ntîîre kûbûrûthîra kûringana na waa bwenu. Bûtiarîîtie bûra kûbatîîrue îgûrû rîakwa ta mûruti ngûgî wakwa Ayubu.” 9 Kwoogu, Erifasi Mûtemani, Mbirindandi Mûsui na Sofari Mûnaamathi baarûtha bûra Mwathani aabeerire, na Mwathani eegua maromba ma Ayubu.
10 Ayubu akûrîîkia kûrombera acoore baake, Mwathani acookeria Ayubu ûtonga bwake kaîrî na amwaa maita maîrî ma bionthe bira aarî nabio mbere. 11 Aruagina na aaragina na bonthe bara baamwiyî mbere baaya na baarîyanîra n'we mûciî wake. Bamûbooreria na bamûkirakiria n'ûntû bwa thîîna yonthe îra Mwathani aamûretereete, na wa kîra ûmwe wao amwaa gîcuncî gîa fetha na mbete ya thaabu.
12 Mwathani aathaarima ûtûûro bwa mûthia bwa Ayubu nkûrûki ya bwa mbere. Aarî na ng'ondu ngiri îkûmi na inya, nkamîîra ngiri ithanthatû, ndegwa cia kûrîma ngiri îmwe na mang'ooi ngiri îmwe. 13 Na kinya n'aarî na nthaka mûgwanja na aarî bathatû. 14 Eeta mwarî wa mbere Njemima, wa baîrî Kesia na wa bathatû Kereni-Apuku. 15 Gûtirî angî nthîgûrû înu kwoneka aarî baathongi ta aarî ba Ayubu, na îthe abaa rûgai amwe na aruagina.