41
1 Nwa ûgwate nyamû îra nene ya îria îîtagwa Rebiathania na ndwano,kana ûkamîthaîka rûrîme na mûkanda?
2 Nwa wîkîre rûrigi nyiûrû yayo
kana ûgatûra rûthea rwayo na ndwano?
3 Îgaakara îgîkûrombaga ûmîîgîîrua kîao?
Îgakwarîria na biugo bia kwînyiia?
4 Îkaiga wîrane naawe
ûmîthûkie îtuîke nkombo yaku tene na tene?
5 Nwa ûceethe n'yo ta nyoni
kana ûkathaîkîra aarî baku bamîkururia?
6 Abiacaara nwa bamîgûre?
Nwa bagaîre abiacaara yoo?
7 Waûmba kûratha nkonde yaayo
kana kîongo na matumo mara marathaga makûyû?
8 Ûkaaya kûmîtonga na njara,
ûkaririkana kînyamaara na ûtirûtha bu kaîrî!
9 Kûgeria kûgwata nyamû îra nene ya îria îîtagwa Rebiathani i wîrîgîîro bûtarî oogo,
kûmîona na meetho akî i kîriga.
10 Gûtirî we mûng'entu ûntû aûmba kûmiumbuthûra.
N'ûû îndî ûûmba kûrûngama mbere yakwa?
11 N'ûû ûkûndaandûka atî nwa mmûrîire?
Kîra kîonthe kîrî nthîgûrû i gîakwa.
12 Ntiitiga kwaria îgûrû rîa magûrû maayo,
inya yayo na mwonekere wayo ûmwega.
13 N'ûû aûyia nkonde yayo?
N'ûû aûmba gûtûra ndwara yayo?
14 N'ûû aûmîîria gûkandûra nthea ciayo?
Magego maayo imakûmakania.
15 Mûgongo wayo ûguîkîîtwe i mîtûrûtûrû ya makoonde mara mamîrigagîîria.
Magwateene amwe maita ti.
16 Magwateene
bûra wana ruuo rûtaûmba gûkûrûkîîra gatîgatî.
17 Matumanîîtue maita,
maitanîîte amwe na matiûmba gûtigithanua.
18 Gûtiiba kwayo i kûreetaga mînyîîrî ya werû,
meetho maayo makari ta mînyîîrî ya riûa rûkîîrî.
19 Ndîrîmbî cia mwanki ciumaga kanyua kaayo,
ndathe cia mwanki ikathandîka bwa ome.
20 Ntoogo yuumaga nyiûrû ciayo
ta ya nyûngû îkîtherûkua îrî mwankiini wa nyaki.
21 Mîruke yayo ka yankanagia makara,
ndathe cia mwanki ciumaga kanyua kaayo.
22 Inya yayo îkaraga nkingo,
kîmako kîthiiyaga kîrî mbere yayo.
23 Mîkûnjo ya nyama ciayo îgwatithanîîtue yaita,
îgwateene na îtithiyangua.
24 Nkoro yayo yûmîîte ta rwara,
yûmîîte ta iiga rîa kûthia.
25 Rîra yaûkîîra, bara barî na inya ka bamakanagia,
nkoro ciao ikathîra ûûmîîria n'ûntû bwa mûkinyîre wayo.
26 Gûtirî rûûyiû rûûmba kûmîguraria,
kinya îtumo, kana mûûthîrî ûmûthongore.
27 Yonaga cuuma ta rûûa,
na rûthuku ta mûtî ûmworu.
28 Mîgwî îtitûma îkuthûka,
na maiga ma gîkûtha kîrî yo i ta maûngû.
29 Ncûgûma kîrî yo i ta kîbua,
ka îthekaga îkîgerwa îtumo.
30 Rûteere rwayo rwa bwa ruungu îkari ta ngîo imbûgî,
îmaamaga ntagaani ta nthio iigaani.
31 Îtûmaga kûra kworokeru kûtherûka ta nyûngû,
na îgatûma îria rîkara ta nyûngû ya maguta.
32 Nyuma yayo îtigaga njîra îgîkengakengaga,
na muntû nwa athûgaanie atî kûra kworokeru i ka kûrî na mbuî.
33 Gûtirî kîûmbe kîngî kîbuaneene nakîo aaga nthîgûrû,
kîûmbe gîtarî ûguaya.
34 N'îbuthagia biûmbe bionthe bira biîbûkîrîîtie,
n'yo mûnene wa bonthe bara beekumagia.”