40
1 Mwathani eera Ayubu,2 “N'ûkwenda kûthi na mbere gûcindana na Mwene Inya?
Ka ûra ûthetaga na Ngai, amûcookerie!”
Ayubu aacookeria Ngai
3 Rîru Ayubu aacookeria Mwathani,
4 “Raitha, ntiagîrîte, n'ata mbûmba gûgûcookeria?
Ga nkunîkîîte kanyua gaakwa.
5 I mbarîîtie rîmwe na ntirî na îcookio,
Maita maîrî, îndî ntiithi na mbere kwaria.”
6 Rîru Mwathani acookeria Ayubu arî kîbuubaniini amwîra,
7 “Îîboge ta muntû mûrûme,
ngakûûria, naawe ûncookerie.
8 Nwa uuge îgamba rîakwa ti rîa ûmma?
Nwa woone ndî na mabîtia îndî ûkeegua woû ûrî ûmmani?
9 Ûrî na njara ta ya Ngai,
kayû gaaku nwa kagondoke ta gaake?
10 Îîndî îîbonanie ûrî na mwago na ûkumio,
na wîboge gîtîîyo na ûnene.
11 Îtûûra marûrû maaku,
na ûraithe mwîkumia wonthe ûmûnyiie,
12 ûraithe wonthe ûra wîbûkagîîria ûmwîndamie nthî,
ûthithire ûra mûthûûku wara arî.
13 Bathike bonthe amwe mûthetuuni,
kunîka moothiû maao nthikooni.
14 Rîru niû ningwa ngagwîtîgia
atî njara yaku ya ûrîo nwa îkwonokie.
15 Raitha Mbeemothi,a
îra ndaûmbire ta woû
na yoo îrîîyaga nyaki ta ng'ombe.
16 Nî inya îgana ata îrî kauna kaayo,
na mîkiia ya nda yaayo!
17 Mûtiro wayo ûrûngi ta mûthithinda,
mîkiia ya biero biayo îtumanîîtue amwe.
18 Mîîndî yayo îkari ta mîbaibû ya rûthuku,
mbaru ciayo i ta icuncî bia cuuma.
19 N'yo ya mbere gatîgatîîni ka ngûgî cia Ngai,
amwe na ûgu Mûûmbi waayo nwa amiumîîre na rûûyiû.
20 Irîma bimîretagîra maciaro maabio,
na nyamû cionthe cia kîthaka ithekanagia wagu akubî n'yo.
21 Îmaamaga ruungu rwa mîtî ya îkumbo rîa muuro,
aithîîtwe gatîgatî ka nthanje kîrimbaani.
22 Îîbithaga mûgunyeeni wa mîtî ya îkumbo rîa muuro,
na mîtî îra îrî rûteere rwa tuuro îkamîthiûrûkîîra.
23 Muuro waaya, îtimakaga,
îgagua îrî mayîîga kinya muuro wa Njorondani ûkaûyûra mbwî.
24 N'ûû aûmba kûmîgwata îcûûbîîte?
Kana amîgwata na mûtego na gûtûra nyiûrû yayo?