39
1 Nwiyî rîra mbûri ya kîthaka îciaraga,ûroona nkûrûngû îgîciara?
2 N'ûtaraga mîeri îra îgaakara mbere ya kagiita kaayo gakinya?
Nwiyî ntugû yaayo ya gûciara?
3 Ciîndamagîîra igîciara biana biacio,
na ûrûrû bwa gûciara bûkathira.
4 Biana biacio bikûraga na bikagîtîra inya naagu kîthakaani,
bikathi na biticookaga kaîrî.
5 N'ûû ûrekagîîria îng'ooi rîa kîthaka?
N'ûû ûrîtharagia mîkanda?
6 Ndaarînenkeere rwanda rûtuîke mûciî waarîo,
nthîgûrû ya mwonyo îtuîka ûtûûro bwa yo.
7 I rîthekagîîra gîtuma gîa taûni,
rîtithikagîîria gîtuma kîa mûrîîthi.
8 Rîangaga irîmaani rîgîceria ndîîthia,
na rîgîceragia gîntû kîîririmu gîa kûrîa.
9 Mbogo yeetîgîîria gûgûtûmîkîra?
Yeetîgîra gûkara akubî na rûkongoro rwaku ûtugû?
10 Nwa ûmîthaîke ûkarîma n'yo mûnda,
nwa îkururie mûraaû?
11 Nwa wîgwatie yoo n'ûntû bwa bûra îrî na inya înene?
nwa ûmîtigîre ngûgî yaku îndito?
12 Nwa ûmîîtîgie îgagûkethera irio
na îgakwîthîranîria bio rwaraani rwaku?
13 Mathabu ma nyaga imabatabataga na gîkeno,
îndî mbwî ciayo itibuanaana na cia ntûnda rûkiingo.
14 Nyaga îtigaga makome maayo nthîgûrû
kaingo magwata mûrugutîra mûthangaani,
15 îkariganîrua kana nwa makinyangwe na mbayo,
kana magakinyangwa i nyamû cia kîthaka.
16 Iinyagîîria tûcui twayo ta tûtarî twayo,
îtimakaga wîra yaayo îtuîka ya ûtheri,
17 n'ûntû Ngai naamîeriirie ûûme
na ataamîa gacuncî nwa kaniini ka ûmenyo.
18 Îndî yambîîria kuugia,
îthekagîîra kinya mbaraathi na mûthiithia wayo.
19 I woû wapeere mbaraathi inya,
kana waciîkîra guaya îndaaya nkingo?
20 I woû ûtûmaga îthûngûtha ta ngige?
Mûbuîre wayo wa rwîkumia nwa kûmakania!
21 Îtûûbatûûbaga nainya, îgîkenagîîra inya yayo,
îkauma îkaugia ndûani.
22 Îthekagîîra ûguaya, na îtiguayagua,
na îtigarûkaga yona rûûyiû.
23 Thiaka yûûyûri mîgwî îmîringagîra gîtuma,
amwe na mûûthîrî na îtumo rîkwenia.
24 Îthiiyangaga mbere, îkiinainaga n'ûrûme,
na rûgoci rwaringwa, yoo îtirûngamaga.
25 Rûgoci rwaringwa yuugaga, ‘nîîndî!’
Yîîgagua mûruke wa ndûa îrî kûraaya,
îkeegua kayû ga atongoria ba ndûa na nkururo cia ndûa.
26 I woû weyaga mpûngû ûûme bwa kûbuurûûka,
na îgataambûrûkia mathabu maayo bwa iti?
27 I woû wathaga ndiiû gwîtia
na gwaka ntara yayo îgûrû?
28 Îtûûraga rwaraani na îkaraga agu ûtugû,
mbacacîîni cia rwara noo wîbitho bwa yo.
29 Îceragia gîa kûrîa îrî waagu,
meetho maayo makîonaga kîrî kûraaya.
30 Biunga biayo binyuunyaga nthakame,
na wa ara biimba biîgagua birî, yîîgagua îrî oogo.”