Ngai acookeria Ayubu
38
1 Rîru Mwathani acookeria Ayubu arî kîbuubaniini. Amûûria,2 “N'ûû ûyu ûkwînyangia mîbango yakwa
na biugo bitarî na ûmenyo?
3 Îîboge ta muntû mûrûme,
nkûûrie naawe ûncookerie.
4 Warî kû nkîaiga mîcingi ya nthîgûrû?
Mbîîra, wegua n'ûkwerewa.
5 N'ûû waigire ithimi biayo? Ûmma nwiyî!
N'ûû aatambûrûkiirie rûrigi akîmîthima?
6 Itugî bia nthîgûrû biînjîrîîtwe mbiini,
kana n'ûû waigire iiga rîayo rîa mûcingi,
7 nthata cia rûkîîrî ikiina irî amwe,
na araîkaa bakîringa gîtuma i gîkeno?
8 N'ûû aingire mûrango wa îria,
rîra rîaûyûrire kuuma nkona,
9 rîra ndaatuîkithiirie matu nguo yarîo
na ndarîoga mwinduuni ûmûnene,
10 rîra ndaarîaigîîre mîanka,
na ndaiga mîrango na mbureemu bwega,
11 rîra ndaugire, ‘Ûgaanka aaga, ûtiikûrûka aaga;
makûmbî maaku ma inya makaarûgama aaga’?
12 Kuuma waciarirwe ûraathana gûkîe,
kana woneeria rûkîîrî bantû aaru,
13 kaingo rûgwata mîthia ya nthîgûrû,
na bara bathûûku bainainua bauma ku?
14 Nthîgûrû îgarûkaga ta mûthetu wa mûûmbi bûra ûgarûragwa i mûûni,
na kûgîa na rangi ta nguo.
15 Îndî bara bathûûku bationa werû bwao,
njara îra bataambûrûkagia kûringa antû îkaunîka.
16 Ûrathûngîra nthongooni cia îria
kana ûthiîra gûntû kûra kworokeru kwa îria?
17 N'woneetue mîîrîga ya gîkuû
kana wona mîîrîga ya mwindu ûmûnene?
18 N'wiyî ûnene bwa nthîgûrû?
Mbîîra wegua nwiyî mama monthe.
19 Werû bûkaraga kû?
I kû nyomba ya mwindu îrî?
20 Waûmba kûbiira kwa bio?
N'wiyî njîra ya kûthi naara bitûûraga?
21 Ûmma nwiyî, n'ûntû n'wacierwe!
N'ûtwîre mîanka îmiingî mûno!
22 Ûrathûngîra biandaani bia mbaraabu
kana ûroona bianda bia mbura ya maiga,
23 bira mbigîîte n'ûntû bwa îgiita rîa thîîna,
n'ûntû bwa îgiita rîa ndûa?
24 N'wiyî werû bûgaanagua ata?
Kana n'ata ruuo rwa rûteere rwa ûthwîro bwa riûa rûnyagaaragua nthîgûrû?
25 N'ûû aatemeere mbura mwengere,
kana nkwa njîra,
26 na ndaatûma mbura yuura nthîgûrû,
rwanda rûtatûûraga muntû,
27 kaingo îriinda nthî îtarî gîntû na îmbûmo
na gûtûma nyaki yuuma?
28 Mbura îrî na îthe,
kana n'ûû ûciere nthanta cia maame,
29 mbaraabu yaumire nda yaaû,
n'ûû aaciarire ruuo kuuma îgûrû,
30 rîra rûûyî rûgwatanaga rûkaûma ta yiiga,
na îgûrû ya îria gûkagwatana?
31 Waûmba kwoga nthata cia Kîrîmîra?
Kana ûkatharia ndigi cia Orioni?
32 Waûmba gûtongoria nthata îra îîtagwa Masarothi kagiitaani kaayo,
kana ûgatongoria ndûba amwe na biunga biayo?
33 N'wiyî mawatho ma îgûrû?
N'wa ûturie watho bwa Ngai nthîgûrû?
34 Nwa ûringîre matu gîtuma,
kaingo mûguû wa rûûyî ûgûkunîka?
35 Waûmba gûtûma rweni ngûgîîni yaru?
I rûûyaga kîrî woû rûgakwîra, ‘Ndî aaga’?
36 N'ûû wekîîre ûmenyo nkorooni,
kana aapa mathûgaania kwerewa?
37 N'ûû arî na ûûme bwa gûtara matu,
kana eenîka ibûûyû bia rûûyî bia îgûrû,
38 rîra tîîri yaûmagara
na manea ma mûthetu maagwatana?
39 Waûmba kûgwîmîra cimba ya nka
na ûkathiria yûûra rîa cimba,
40 rîra imaami mîrinyaani yacio
kana igiitîrîte kiunguuni?
41 N'ûû weyaga nkûngûrû irio
rîra tuunga twayo tûrîragîra Ngai
na kwanganga i kwaga irio?