37
1 N'ûntû bwa ûûgû, nkoro yakwa n'îkûringana îkathûngûtha kuuma ara îkaraga.
2 Kinda gûtû wîgue mûrurumo wa kayû gaake,
mwinaino ûra ûkuuma kanyuani gaake.
3 Arekagîîria rweni îgûrû rîonthe,
na akarutûma nteere cionthe cia nthîgûrû.
4 Nyuma ya ûgu kayû gaake gakaagondoka,
agondokaga na kayû gaake karî inya;
rîra kayû gaake kaaruruma,
atirigagîîria rweni.
5 Kayû ka Ngai kathandîkaga na njîra cia magegania,
arûthaga mantû maanene mara tûtaûmba kwerewa.
6 Eeraga mbaraabu, ‘Îgwa nthîgûrû,’
na mbura n'yo, ‘Ura na inya.’
7 Kaingo antû bonthe bara aûmbîîte bamenya ngûgî yake,
atigithagia njara ya kîra muntû.
8 Nyamû cia kîthaka ikathi wîbithooni bwa cio,
igakara makurunguuni maacio.
9 Kîbuubani gîkauma nyomba yakîo,
na mpîo îkauma nduoni irî na inya.
10 Mîruke ya Ngai îreetaga mbaraabu,
na rûûyî rwingî rûkagwatana.
11 Akaûyûria matu rûûyî,
na akanyagaaria rweni ku.
12 Abiathaga bikathiûrûûka kuunthe,
kûrûtha wa bûra bunthe akûbiatha
îgûrû rîa nthîgûrû yonthe.
13 Areetaga matu n'ûntû bwa gûkaanûkia antû,
kana kûrinda nthî na rûûyî,
na kwonania wendo bwake bûra bûtathiraga.
14 Thikîîria Ayubu,
kira na ûthûgaanie magegania ma Ngai.
15 Nwiyî bûra Ngai aathaga matu
na agatûma rweni rwake rwenia?
16 Nwiyî bûra matu macuuraga ruooni,
magegania ma ûra ûûme bûûyûru?
17 Woû wîkîrîte nguo cia mûrugutîra
rîra nthîgûrû îkirîîrîîtie n'ûntû bwa ruuo rwa kuuma bwa iti.
18 Waûmba gûtaambûrûkia îgûrû ta we,
rîûmo ta kîyici kîa rûthuku?
19 Twîre bûra tûkeera Ngai,
tûtiûmba kûbangania îgamba rîetû n'ûntû tûrî mwinduuni.
20 I ka abatîîrue kwîrwa inkwenda kwaria?
Kûrî muntû eenda kûmerua?
21 Îndî gûtirî muntû aûmba kûraitha riûa,
bûra rîthararîîte îgûrû
ruuo rwarîîkia gûciata matu.
22 Aayaga na mwago wa thaabu kuuma bwa îgûrû.
Ngai aayaga na ûkumio bwa kûrigarania.
23 Tûtiûmba gûkinyîîra Mwene Inya, n'aûkîîrîîtue inyaani yake,
ûmmani na wingîîni bwa wagîru bwake,
atiinyanagîîria.
24 Kwoogu, antû i bamûkuthûkaga,
n'we atitindanagîra na antû bara beebonaga barî baûgî.”