Eriu akumîîria wega bwa Ngai
36
1 Eriu aathi na mbere auga,2 “Mbinyîkîria aniini na ngakwonia
atî kûrî na mangî ma kuugwa bantûûni a Ngai.
3 Nkaareeta ûûme bwakwa kuuma kûraaya,
na mbonanie atî Mûûmbi wakwa n'ûmwagîru.
4 Îtîgiani mîgambo yaakwa t'ya ûrongo,
ûra mûûme mûno arî aaga ûrî.
5 Ngai arî na inya, îndî atibûthagîîria antû,
arî na inya, na ûûme bûûnene.
6 Atirekaga athûûkia batûûra mwoyo,
îndî akanenkera bara bainyîîrie rûgai rwao.
7 Akaraga araithîrîte bara baagîru,
abatuîkithagia anene,
na akabaûkîîria tene na tene.
8 Îndî antû bakoogwa na nyororo,
bakoogwa bagaitua na mîkanda ya thîîna,
9 abeeraga bûra baarûtha,
atî ibeeyîîtie na wîkumia.
10 Atûmaga bathikîîria mataaro
na akabaatha beerire ûthûûku bwao.
11 Bamwathîkîra na bamûtûmîkîra,
bagaatûûra mayîîga mwanka mûthia wa ntugû ciao;
na kûganîrwa mîankaani yao.
12 Îndî bakarega kûthikîîria,
bakaathirua na rûûyiû
na bakue batarî na ûmenyo.
13 Bara barî na nkoro itarî na ûngai beendeete kûthûûra,
kinya rîra abathaîka, batikayaga bateethua.
14 Bakuuyaga barî baniini,
gatîgatî ka marwaya ma antû arûme irîîni.
15 Îndî bara bathîînaga aboonokagîria kûthîînaani kwao,
aaragia nabo kwinyîîruani kwao.
16 Ngai aakûrutire thîînaani,
akwaiga bantû aaramu atarî na kînyamaara,
meethaani yaku yaigîîtwe irio biega.
17 Îndî îîndî ûthitangîîtwe na ûthûûku,
kûgiitîrwa îgamba na ûmma bigûkûgwata.
18 Menyeera gûtikaagîte we agaagûkuuyia na ûtonga,
ûtikaareke ngukumo înene îkûgarûra.
19 Ûtonga bwaku
kana kinya kwîrutanîria na inya yaku rî,
gwa kûmenyeera kaingo ûteegua ûrî thîînaani?
20 Ûtikeerirîrie ûtugû bûkinya,
rîra antû barutagwa mîciî yao.
21 Menyeera ûtikaagarûkîre ûthûûku,
bûra ûgûkara ta ûkwenda mûno nkûrûki ya thîîna.
22 Raitha, Ngai n'aûkîîrîîtue inyaani yake,
n'ûû ûrutana ta we?
23 N'ûû amwonagîîria njîra ciake,
kana amwîra, ‘Ûkûbîtia?’
24 Ririkana kûneneyia ngûgî yake,
îra antû bakumîîtie na nyîmbo.
25 Antû bonthe i bamîoneete,
antû i bamîraithaga barî kûraaya.
26 Ngai n'ûmûnene mûno, wana tûtiûmba kûmûmenya!
Îthaabu rîa mîanka yake rîtitarîka.
27 Ataaga nthanta cia rûûyî,
ira imatagîra kuuma matuuni igatuîka mbura, îkathi tuurooni,
28 matu magatûûra mbura,
mbura înene îkaurîra antû.
29 N'ûû ûmenya bûra ataambûrûkagia matu,
na bûra arurumaga gîkarooni gîake?
30 Raitha bûra anyagaaragia rweni rwake kûmûthiûrûûka,
na agakunîkîra mborokero cia îria.
31 Ûûgû i bu aathaga mîgongo,
na kûbaa irio bia kûgana.
32 Akagwata rweni na njara ciake
na akaruatha rûthime ara akwenda oongwa.
33 Nkwa yake yuugagîîria kûûya gwake,
kinya nyamû iciiyî n'ayîîte.