Mwathani akagambithia bara beebonaga bongwa barî baatheru
35
1 Rîru Eriu aûria Ayubu,2 “N'ûkûthûgaania ûntû bûbû i bwega?
Ûriuga, ‘N'yû ndî ûmwagîru mbere ya Ngai.’
3 Ûgacooka ûkaûria, ‘I baita mbi nkwona,
i wega bûbi bûrî oogo kuumania na kûrega kwîyia?’
4 Ngagûcookeria,
amwe na acoore bara barî amwe naawe.
5 Cûûba îgûrû wone,
raitha matu mara marî îgûrû rîaku.
6 Rîra ûkwîyia rî, bûbu bûrîmûthûûkia na mbi?
Wegua meeyia maaku i maingî rî, bûbu n'ata bûkûmûrûtha?
7 Wegua ûrî mwagîru, i mbi ûkûmwaa,
kana i mbi oonaga kuumania naawe?
8 Ûthûûku bwaku bwinyagîîria antû bangî ta woû,
nabu wagîru bwaku bûgateethia antû bara bangî.
9 N'ûntû bwa thîîna kwingîa, antû i barîraga,
beerekanaga batuunyûkua kuuma njaraani cia bara barî na inya.
10 Îndî gûtirî we ûûragia, ‘Arîkû Ngai Mûûmbi wakwa,
ûra weyanaga nyîmbo ûtugû,
11 ûra ûtûrutanaga nkûrûki ya nyamû cia nthîgûrû,
na agatûma tûûgîa nkûrûki ya nyoni cia îgûrû?’
12 Aticookagia rîra antû bamûrîrîra
n'ûntû bwa wîkumia bwa bara bathûûku.
13 Ûmma, Ngai atithikagîîria kîrîro kîao kîa ûtheri,
Mwene Inya atitindanagîra nabu.
14 N'ata îndî agaakûthikîîria
rîra ûkuuga ûtikûmwona,
atî îgamba rîaku rîrî mbere yake
na nwa mwanka ûmweteere,
15 na nkûrûki, n'ûntû mûthûûro wake ûtikaanûkagia
atitindanagîra na ûthûûku.
16 Kwoogu, Ayubu arîtumûra kanyua gaake na rwaria rûûtheri,
atarî na ûmenyo akaingîyia mîgambo.”