Eriu aamenyithania ûmma bwa Ngai
34
1 Rîru Eriu auga,2 “Thikîîriani mîgambo yakwa, biû antû baûgî,
kindaani matû, biû amenyi.
3 N'ûntû gûtû i kûthimaga mîgambo
ta bûra rûrîme rûcamaga irio.
4 Ga twîthuurîre mara meega,
ga twîrutane tûrî amwe mara meega.
5 Ayubu ariuga, ‘Ntirî na mabîtia,
îndî i Ngai akûngiitîra îgamba naaî.
6 Kinya wegua ntirî na mabîtia,
ndîtarwa ndî mûûrongo;
kinya wegua ntirî na mabîtia,
mûgwî wake n'ûndutîîte kîronda gîtoora.’
7 Ayubu i muntû mûbi,
ûra anyunyaga kûthekeerwa ta rûûyî?
8 Akaranagia na athûûkia,
athiiyanagia na antû baathûûku.
9 N'ûntû ariuga, ‘Gûtirî baita muntû oonaga
rîra ageragia gûkenia Ngai.’
10 Kwoogu nthikîîriani, biû antû bakwerewa,
Ngai arî kûraaya na kûrûtha ûthûûku,
Mwene Inya na kûrûtha bûra gûtabatîîrie.
11 Arîaga muntû kûringana na ngûgî yake,
atûmaga muntû oona îrîi kûringana na mîtugo yake.
12 Ûmma Ngai atirûtha ûthûûku,
na Mwene Inya atikoombia îgamba.
13 N'ûû aamûthuurire aatha nthîgûrû?
N'ûû aamwaigire kaanyaani ga kwatha nthîgûrû yonthe?
14 Ûkeegua i mûbango wake
na akaruta kîrundu gîake na mîruke,
15 biûmbe bionthe ka bithira rîmwe na muntû agacooka tîîriini.
16 Wegua n'ûgûciûkîrwa, îgua ûûgû,
thikîîria bûra nkuuga.
17 Ûra ateendeete gûtua magamba bûra kûbatîîrue nwa aathane?
Ûkagambithia ûra mwagîru na Mwene Inya?
18 T'we eeraga anene, ‘Ûrî wa mana,’
na antû ba gîtîîyo, ‘Bûrî antû baathûûku,’
19 ûra ateendagîîra anene
na atiendagîîra itonga nkûrûki ya nkîa,
n'ûntû bonthe i ngûgî ya njara ciake?
20 Bakuuyaga nthûti, ûtugû mainda,
antû bakainainua na bagakua;
babu barî na inya bakarutarutwa oogo,
gûtarî gûtûmîra njara ya muntû.
21 Meetho maake maraithîîte mîthiîre ya antû,
oonaga makinya maao monthe.
22 Gûtirî bantû arî mwindu,
gûtirî kîrundu kîînene,
ara athûûkia baûmba kwîbitha.
23 Ngai atirî na gîtûmi gîa kûthima antû nkûrûki,
kaingo bathiyaga mbere yake kûgambithua.
24 Athûkangagia bara barî na inya atakûûria,
na agaûkîîria bangî kaanyaani kaao.
25 N'ûntû n'aiyî ngûgî ciao,
abagarûranagia ûtugû na bakathontorua.
26 Abakaanûkagia n'ûntû bwa ûthûûku bwao,
ara muntû wonthe akaûmba kûboona,
27 n'ûntû i baagarûkire baatiga kûmûthingata,
na batitindanagîra na njîra ciake.
28 Baatûma kîrîro gîa nkîa kîmûkinyîîra,
na eegua kîrîro kîa bara barî na ûbatu
29 Îndî akaaya gûkira rî, n'ûû ûûmba kûmûûria?
Akaaya kwitha ûthiû bwake rî, n'ûû ûûmba kûmwona?
Ingî arî îgûrû rîa muntû na mûgongo bûmwe,
30 kûrigîîria muntû ataiyî Ngai atikaathane,
atikaigîre antû mîtego.
31 Muntû akaaya kwîra Ngai,
‘I mbîtîîtie îndî ntiibîtia kaîrî.
32 Ndutana bûra ntakwona,
wegua mbîtîîtie, ntiirûtha bu kaîrî.’
33 Ngai ka abatîîrue kûrîa kûringana na mathûgaania maaku,
rîra warega kwîrira?
I woû ûkaathuura, ti niû,
kwoogu mbîîra bûra ûkûmenya.
34 Antû bakwerewa baugaga,
antû baûgî bara bakûmbîgua bambîîraga,
35 ‘Ayubu arîaria atarî na ûmenyo,
mîgambo yake îtirî na ûûme.’
36 Ûtakîîgua Ayubu nwa agerue mwanka mûthia,
n'ûntû bwa gûcookia ta muntû ûmûthûûku!
37 N'ûntû arîongeera îthûûkia meeyiani maake,
akaringa mpî ciake gatîgatî geetû
na akaaria mantû maingî kîînyume na Ngai.”