Eriu aagondokera Ayubu
33
1 Îndî îîndî Ayubu, thikîîria mîgambo yakwa,kinda gûtû kîrî bûra bunthe nkuuga.
2 Ndî akubî gûtumûra kanyua gaakwa,
mîgambo yakwa îrî rûrîmeeni rwakwa.
3 Mîgambo yakwa îriuma nkorooni îndûngaru,
mîromo yakwa ûmma îrîaria bûra mbiyî.
4 Kîrundu wa Ngai n'ambûûmbire,
mîruke ya Mwene Inya n'împeeyaga mwoyo.
5 Ncookeria îndî, wegua ûkaûmba,
îthuuranîre na ûrûngame mbere yakwa.
6 Nkari wa ta woû mbere ya Ngai,
kinya niû ndaûmbirwe na yûûmba.
7 Kwoogu, ûtibatîîrue gûnkuthûka,
kana njara yaakwa îkûritwîîra.
8 Îndî wauga nkîîgagua,
mbîgiirue mîgambo înu yaku yongwa,
9 Ûriuga,
‘Ndî ûmûtheru ntirî na meeyia,
ndî ûmwagîru ntirî na mabîtia
10 Amwe na ûgu Ngai n'ancerereetie mabîtia,
arîntara ndî mûnthû wake.
11 Aambogeete magûrû maakwa na nyororo,
akaraga araithîrîîte njîra ciakwa cionthe.’
12 Îndî ga ngûkwîra, ûntûûni bûbû ûtirî na ûmma,
n'ûntû Ngai n'we mûnene kîrî muntû.
13 I kî n'ûntû ûkûmûthetia ûkiugaga
aticookagîria muntû mûgambo nwa ûmwe?
14 N'ûntû Ngai nwa aarie na njîra îmwe kana îra îngî
wana wegua muntû nwa aremwe i kwerewa.
15 Kîrotooni, na kîoneki ûtugû,
rîra antû baagwatwa i toro înene
baamaama ûrîrî bwao,
16 nwa abaarîrie matûûni
na akabamakia akîbakaania,
17 kûgarûra muntû atiga kûrûtha ûthûûku
na kûmûthiria wîkumia,
18 kûmenyeera nkoro yake îtikaagwe îrinyaani,
ûtûûro bwake kuumania na kûthirua na rûûyiû.
19 Kana muntû nwa ainyîîrue ûrîrî na njîra ya ndwari
nagûkara agîankanagwa i mîîndî,
20 n'we akaremwa i kûrîa,
na nkoro yake îkarega kinya irio bira yendeete mûno.
21 Agaceng'a akathira,
na mîîndî yake îra îraithîîtwe, îkaumîra nja.
22 Nkoro yake îkuîrîrîîtie îrinya,
na ûtûûro bwake nabu akubî na bara bareetaga gîkuû.
23 Îndî ûkeegua kûrî na mûraîka rûteere rwake ta mwarîîria,
ûmwe kuuma kîrî ngiri,
wa kwîra muntû bûra bûmûbatîîrie,
24 amwîgîîrue kîao auge,
‘Mwonokie atikaathi îrinyaani,
i mboneete gûkûûrwa gwake,’
25 rîru mwîrî wake waanake ta wa kaana,
ûcookanîîrue ta ntugûûni cia wîthî bwake.
26 Arombaga Ngai na n'onaga kwendeerwa,
oonaga ûthiû bwa Ngai na akaugîîria i gîkeno,
n'acookeretue wagîru bwake i Ngai.
27 Rîru aine mbere ya antû auge,
‘I ndeeyiirie, na ndaakoombia bûra kwabatîîrie,
îndî ntaakaanûkua.
28 Ngai antuunyûkia ntikaathi îrinyaani,
na ngaatûûra gûkeneera werû.’
29 Ngai arûthagîra muntû mantû mama monthe
maita maîrî, kinya mathatû
30 kûmûcookeria nkoro yake kuuma îrinyaani,
kaingo werû bwa ûtûûro bûkaamûthararîra.
31 Kinda gûtû Ayubu, na ûnthikîîrie,
ûkire, naani nkaaria.
32 Wegua ûrî na bwa kuuga, mbîîra,
aria, n'ûntû ndîenda wîgua ûtarî na ûthûûku.
33 Îndî wegua t'ûgu, nthikîîria,
kira naani ngakûrutana ûûme.”