Eriu aagondokera acoore ba Ayubu
32
1 Kwoogu, antû baba bathatû baatiga gûcookeria Ayubu, n'ûntû n'eebonaga arî mwagîru. 2 Îndî Eriu mwana wa Mbarakeri Mûbusi, wa mûciî wa Ramu, aathûûra mûno n'Ayubu n'ûntû bwa kwîbona arî mwagîru bantû a Ngai. 3 Aathûûra kinya n'acoore babu bathatû, n'ûntû batoona bwa gûcookia Ayubu, na amwe na ûûgû bauga n'abîtîîtie. 4 Îndî Eriu aakari eeteereete mbere aaria na Ayubu n'ûntû baarî bakûrû kîrî we. 5 Îndî rîra oonire antû babu bathatû bataarî na bûngî bwa kuuga, aankanwa i mûthûûro.6 Kwoogu, Eriu mwana wa Mbarakeri Mûbusi auga,
“Ndî ûmûniini kî mîanka,
na bûrî baakûrû,
i kîo gîtûmi ngûkuthûkaga,
ntakûbwîraga bûra mbiyî.
7 Ndîthûgaanagia, ‘Ûkûrû ibûbatîîrue bwaria,
mîanka îmiingî n'îbatîîrue îrutana ûûme.’
8 Îndî i kîrundu kîra kîîgagua kîrî ndeeni ya muntû,
mîruke ya Mwene Inya, îmweyaga kwerewa.
9 Ti bara bakûrû akî baûgî,
ti bara bakûrû akî beereawa bûra kûbatîîrue.
10 Kwoogu, ndiuga, Nthikîîriani,
kinya niû nkabwîra bûra mbiyî.
11 Mbeteere bûkîaria,
ndaathikîîria rwaria rwenu,
rîra bûgûceragia mîgambo,
12 i mbûthikîîrie bwega.
Îndî gûtirî nwa ûmwe aroonia Ayubu atî n'abîtîîtie,
gûtirî nwa ûmwe wenu aracookia biûria biake.
13 Bûtikauge, ‘Itwoneete ûûme,
ka Ngai amûcinde, ti muntû.’
14 Îndî Ayubu atiraaria îgûrû rîakwa,
na ntimûcookeria na matheta meenu.
15 I bamakîîte na batirî na bûngî bwa kuuga,
i baagire biugo.
16 Nwa mwanka mbeteere îîndî bakiri,
îîndî barûngi agu batarî na îcookio?
17 Kinya niû ndî na bwa kuuga,
nkauga bûra mbiyî.
18 N'ûntû ndî na mîgambo îmiingî,
na kîrundu kîra kîrî ndeeni yakwa i gîgûncukuma,
19 ndeeni nkari ta cûûba yûûyûri ndibei,
ta îthatwa rîaimbia rîengeerie gûtembûka.
20 Nwa mwanka mbarie mbûthûke,
nwa mwanka ntumûre mîromo yakwa ncookie.
21 Gûtirî we nkeendeera,
kana nyûrûûnta muntû nwa ûrîkû,
22 n'ûntû ûkeegua ndî waara bwa kûnyûrûûntana,
mûûmbi wakwa ambûraga nthûti.