Ayubu aathi mbere kaîrî kwonania atirî na mabîtia
31
1 I ndaigire wîrane na meetho maakwantikaaraithe mwarî mmwîrirîria.
2 Rûgai rwa muntû kuuma kîrî Ngai wa îgûrû i mbi?
Rûgai rwake kuuma kîrî Mwene Inya ûra arî îgûrû i rûrîkû?
3 Ti thîîna kîrî bara bathûûku,
kînyamaara kîrî athûûkia?
4 Ationaga njîra ciakwa
na agatara makinya maakwa monthe?
5 Wegua ndarathiîra njîra cia ûrongo
kana magûrû maakwa maraugia kwenania,
6 ka Ngai aanthime na kîthimi kîa mma
na akaamenya ntirî ûguute.
7 Wegua makinya maakwa maragarûka mauma njîraani,
wegua nkoro yakwa îratongorua i meetho,
kana wegua njara ciakwa iragwatwa i mûgiro,
8 rîru bara bangî baroorîa kîra mbandîîte,
na imera biakwa birookûûrwa.
9 Wegua nkoro yakwa îrabîtithua i mûka,
kana ndaro ngiitîra ndîîbithîîte mwîrîgaani wa mûtûûri wakwa,
10 rîru mwekûrû wakwa aroothi na muntû mûrûme ûngî,
na antû arûme bangî baroomama n'we.
11 N'ûntû rîru rîkîîgua rîrî îgi,
wîyia bwa kûgambithua.
12 I mwanki ûbîîthagia na ûkenyangia,
ûgîkûûra maketha maakwa.
13 Wegua ndararega gûtuîra aruti ngûgî baakwa ba arûme na aka îgamba bûra kûbatîîrue
rîra baandeteere matheta maao,
14 n'ata nkaarûtha rîra Ngai akambumîîra?
N'ata ngaacookia rîra ngeetwa mbûûrua?
15 Anga ûra wambûûmbire t'we wabaûmbire?
Anga twa we watûrûthîîre ndaani cia ba taata?
16 Ûkeegua ndararega kwingîria nkîa maûbataru maayo,
kana ndeka meetho ma ntigwa manoga.
17 Ûkeegua ndararîa biakûrîa ninka
ntakûrûmia nkîa,
18 îndî kuuma wîthî bwakwa ndaamûreraga wa ta îthe,
na kuuma gûciarwa ndaatongoragia ntigwa.
19 Ûkeegua ndaroona muntû akîthîîna i kwaga nguo,
kana muntû nkîa atarî na gîa kwîguîka,
20 na nkoro yake îtanthaarima,
n'ûntû bwa kûmûrugutîîria na guaya kuuma ng'onduuni ciakwa.
21 Wegua ndaraûkîîria njara îgûrû rîa nkîa,
nkîmenyaga atî ndî na uuge kootiini,
22 ka njara yakwa îkûûke kuuma gîturo,
ka yuunîkîre ndûngooni.
23 N'ûntû i ndaakuthûkaga wînyangia kuuma kîrî Ngai,
na n'ûntû bwa gûkuthûka ûkumio bwake ntikîrûtha mantû ta mamu.
24 Ûkeegua mbigîîte wîrîgîîro bwakwa kîrî thaabu,
kana mbîîra thaabu îra ntheru, ‘I woû wîrîgîîro bwakwa.’
25 Ûkeegua ndarakeneera ûtonga bwakwa bwingî,
into bingî bira ndî nabio,
26 wegua indaaraithire riûa rîkîtharara
kana mwago wa mweri ûthiîte,
27 kaingo nkoro yakwa îkuuyua gîîciri
na njara yakwa îbicunca n'ûntû bwa gîtîîyo,
28 rîru kinya mama makîîgua marî meeyia ma kûgambithîrua,
n'ûntû wîgua ntarî mwîtîgua kîrî Ngai ûra arî îgûrû.
29 Wegua ndarakeneera mûnthû wakwa arî thîînaani
kana nkena i thîîna îra yamûûyîîre
30 nteetîgîîria kanyua gaakwa keeyia
na njîra ya kwaria kîrumi îgûrû rîa ûtûûro bwake
31 antû ba mûciî wakwa bonthe bariuga,
‘mûgeni wonthe arîîyaga akabaa mûciî wakwa.’
32 Gûtirî mûgeni aaraara njîraani,
n'ûntû mûrango wakwa rîonthe wakaraga ûrugûrîrîîtwe akûrûki na njîra
33 ûkeegua ndaraitha meeyia ta bûra antû barûthaga,
na njîra ya kwitha yîîyia rîakwa nkorooni
34 n'ûntû i ndaakuthûkaga kîrîndî
na i ndaakuthûkaga kûbitinwa i mwîrîga
i rîo ndaakirire na ntikiuma ome.
35 Irû, ûtakîîgua ndî na muntû wa kûnthikîîria!
Îîndî nkûrîîkia kwîtheteera gwakwa, ka Mwene Inya ancookerie,
ka mûnthitangi aandîke mathitaango maakwa.
36 Ûmma nkîmeekîra gîturo,
nkîmeekîra ta nthûmbî.
37 Nkîmûnenkera mûtari wakwa wa wa kîra îtagaaria,
nthi kîrî we ta mûnene.
38 Nthî yakwa îkaaya kûrîra n'ûntû bwakwa
na mîtaro yaayo yonthe îkagîa kîthitha i meethori,
39 ûkeegua ndaarîîre maciaro maayo ntakûrîa
kana ndaûraga bara bakaraga ku,
40 rîru ka mîîgua yuume bantû a ngano
na îria bantû a sayiri.”
Mîgambo ya Ayubu yaarîkîria agu.