Kînyamaara kîra Ayubu arî nakîo îndî ûgu
30
1 Îndî îîndî ka bakûnthekeera,antû baaniini kîrî niû,
bara kinya nteetîgîîria kwaiganîîria beethe na kurû,
kûrîîthia ng'ondu ciakwa.
2 Inya ya njara ciao n'yakûndûthîra ata,
ingî inya yao n'yarî îkûthira?
3 Baceng'eete n'ûntû bwa ûkea na yûûra,
bagûgûna nthî îmbûmo na întiganîrie mwinduuni.
4 Baatwire matî ma kîthaka,
na irio biao biarî mîri ya mîtî.
5 Beengatiirue bauma kîrî antû,
baugîrwa mbu ta aamba.
6 Baaracimithiirue gûtûûra miurooni îmîûmo,
na mîrinyaani ya nthîgûrû na gatîgatî ka njara cia maiga.
7 Baakayire barî kîthakaani
na beethîrana ruungu rwa tûmîtî tûrî mîîgua.
8 Rûciaro rwa biaa na antû barî riîtwa rîthûûku,
i beengatiirue bauma nthîgûrû.
9 Na îîndî i bakûnyûrûûnta nyîîmbooni ciao,
ntuîkîîte wa kwaragua i bo.
10 Banthûûraga na bakeegua barî kûraaya naani,
batiîkaanagia gûntuîra mata ûthiû.
11 Îîndî n'ûntû Ngai n'aregereetie ûta bwakwa na ambinyîîria,
bandûthagîra bûra bakwenda.
12 Rûteere rwa njara ya ûrîo nciarwa ciao n'imbithûkîrîte,
baigîîte mîtego ya kûngwata magûrû,
na baûmba ithûmba bia mûthetu kaingo batwa bambithûkîra.
13 Bagiitîîte njîra yakwa,
na baûmbana mantûûni ma kûmbînyangia
gûtarî we akûbateethia.
14 Baayaga ta baayîîrîîte kîrumuuni kîînene kîa rûthingo,
bakaaya bantweete.
15 Imako i bingwete,
gîtîîyo gîakwa gîakamatwa kîathiîgwa nakîo ta gîkamatîîtwe i ruuo,
ûûmbani bwakwa bwathiîgwa nabu n'îtu.
16 Na îîndî ûtûûro bwakwa i bûkûthira,
ntugû cia thîîna icingwete.
17 Mîîndî yakwa n'îwankana ûtugû,
ûrûrû bûra bûkûûndîa bûtikûthira.
18 Inya ya Ngai înguîkîrîîte ta nguo yakwa,
andigicîria ta nkingo ya caati yakwa.
19 Aangera ntagaani,
ndaakara ta muu na tîîri.
20 I ngûkûrîrîra, woû Ngai, îndî ûtikûmbîgua,
nkarûngama, îndî ûtikûndaitha.
21 N'ûgarûkîîte watuîka ûmûthûûku kîrî niû,
wanthîînia na inya yaku înene.
22 Wambûkîîria îgûrû na wambuurûûkia na ruuo
ûngerangaga naa na naara kîbuubaniini
23 Inkûmenya ûkambîîndamia gîkuûni,
bantû ara athuurîrîîtwe bonthe bara batwîre mwoyo.
24 Ûmma gûtirî we aringithagia muntû ûmwinyîîrie
rîra akûromba ûteethio arî thîînaani.
25 Ga ntaarîra n'ûntû bwa bara baarî thîînaani?
Nkoro yakwa ka îtaagîa kîeba n'ûntû bwa nkîa?
26 Îndî rîra ndeerîgîîrîîte wega, ûthûûku bwaya,
rîra ndaaceragia werû, mwindu waaya.
27 Kûthangîka gwa nkoro yaakwa gûtigûntiga
ntugû cia thîîna irî mbere yakwa.
28 Nthiyaga ndî na kîeba ntakwona riûa,
nkarûngama mbere ya kîrîndî nkarîra nkîromba ûteethio.
29 Ntuîkîîte mûruagina wa mbwe,
mûcoore wa ntundu.
30 Nkonde yakwa îyirûaga na îkaambûka,
mwîrî wakwa n'ûkûbea i mûrugutîra.
31 Kînanda kiinaga nyîmbo cia kîrîro,
na mbeebe nacio rwîmbo rwa kîeba.