Ayubu aaririkana mûtûûrîre wake waagu mbereeni
29
1 Ayubu aathi na mbere na rwaria rwake, auga,2 “Ûtakîîgua nkari ta bûra ndaakari mîeri îkûrûkîîte,
n'ûntû ntugû ira rîra Ngai aankaragia,
3 rîra taa yake yaathararaga îgûrû rîa kîongo gîakwa,
na n'ûntû bwa werû bwake indakûrûkagîîra mwinduuni!
4 Îî, ta rîra ndaarî mwana ûmwîthî,
rîra ûcoore bwa Ngai bwathaarimaga mûciî wakwa,
5 rîra Mwene Inya aarî naani
na aana baakwa banthiûrûkîrîîte,
6 rîra njîra yakwa yathambagua na îria,
na rwara rwambonoragîria miuro ya maguta ma mîceituuni.
7 Rîra ndaathiire mwîrîgaani wa taûni
na ndaakara nthî taûni bantû ara arîîkanagwa,
8 nthaka ciambona ciathi rûteere
na akûrû baarûngama,
9 antû baanene baatiga kwaria
baakunîka tûnyua twao na njara,
10 tûyû twa antû ba gîtîîyo twakirua,
na ndîme ciao ciagwatana na tûnyua twao.
11 Wonthe ûra aambîgiirue aaragia wega bwakwa,
na bara baambonire i baankumiirie,
12 n'ûntû indoonokiirie nkîa îra yankayîîre,
na mwana nkîa ûra ataarî na wa kûmûteethia.
13 Muntû ûra aakuuyaga n'anthaarimire,
i ndaatûmire nkoro ya mûka ntigwa yiina.
14 Ndeekîîre wagîru ta nguo yakwa,
ûmma bwarî îgooti na kîremba gîakwa.
15 Ndaarî meetho kîrî ntûngi
na magûrû kîrî ithua.
16 Ndaarî îthe woora mûbatu,
ndaatheteera mûgeni.
17 Ndaunanga inya ya bara bathûûku
ndaatuunyana bara bainyîîrie kuuma magegooni ma bara bathûûku.
18 Ndaathûgaania, ‘Ngaakuîra nyomba yakwa,
ntugû ciakwa inyingî ta mûthanga wa îria.
19 Mîri yakwa îgaakinyîra rûûyî,
na maame makaagwa ûtugû bunthe mpoong'iini ciakwa.
20 Mwago wakwa ûgaatûûra ûrî waimbia,
ûta bwakwa bûrî bwaimbia njaraani yakwa.’
21 Antû baanthikîîrie bakirîrîîtie,
barîîkîrîîtie beeteereete mataaro maakwa.
22 Rîra ndaariirie, bataaria kaîrî,
biugo biakwa i biathûngîîre matûûni maao.
23 Baambeteereete ta mbura
na baanyua mîgambo yakwa ta rûûyî rwa mbura ya mûratho.
24 I ndaabathekathekiirie bakûrega gwîtîgia,
werû bwa ûthiû bwakwa i bwarî bwega kîrî bo.
25 Ndabathuurîra njîra na ndaakara ta mûtongoria wao,
ndaakara ta mûnene gatîgatî ka njûûrî yake,
ndaakari ta ûra ûbooragîria bara bakûrîra.