ESTA
Mantû ma îbuku rîrî
Îbuku rîrî nwa wîgue rîandîkirwe nucu ya mûthia wa cencarî ya itaano MKA i Mûyaundi ataiyîkeene aatwîre Ûneneeni bwa Pasia.
Mantû mara marî îbukuuni rîrî maakarîkire Asuerusu arî mûnene wa Pasia, mûno mûno kuuma mwankaani wake wa îthatû kûthi îkûmi na îîrî wathaniini tau 484-475 MKA. I nyuma ya gîkundi kîa mbere kîa Ayaundi gûcooka Isiraeri ruungu rwa Serubaberi na bagwaka nyomba ya Ngai, îndi i mbere Esira acooka na gîkundi kîngî kîînene. Kwoogu nwa kwarî na Ayaundi baingî ûneneeni bwa Pasia. Wa amwe na kwîgua ibaakarîîte mîanka îmiingî ûgwateeni, Ayaundi ibaagwatîîrîîte gîîtene kîao na wîtîgio bwao kîrî Ngai. Batikîgonga mûnene nwa ûrîkû wa nthîgûrû kana atongoria ba gîtîîyo, na baamenyeera mawatho maao îgûrû rîa ûtheru na irio birî na mûgiro na mûtûûrîre wao wa mwanya. Amani aathûûra mûno, n'ûntû Ayaundi bataamwîndamagîîra, na antû bakîmenya Ayaundi n'ûntû beegaigaga bonka.
Wa ta bûra Njosebu ûra eendiirue ûkombooni airwa nthî îngeni na aacooka aatûmîrwa i Ngai n'ûntû bwa kwonokia mûciî waao na antû baao, woogu nwa ta bu Esta, ûra aarî gakea aatûmîîrwe i Ngai kwonokia antû baao. Njosebu barî na Esta i boonire kwendeerwa n'anene gûkûrûkîîra ûteethio bwa Ngai na baatûmîra inya yao na ûûme. Esta naagwatire mataaro meega kuuma kîrî mwana wa îthe mûkûrû Mondekai, ûra aamûrereete. Ûrî mûririkana wa bûra Ngai oonokiirie antû baake, Ayaundi ibaambîîrie gûkûngwîra kîatho gîa Purimu, na nwa gîkûngwagîîrwa kinya îîndî.
Wana wegua îbuku rîrî rîtikûgweta Ngai kana atî Ayaundi ibaamûgongaga, igûkwonanua caû bûra baacwaga ûteethio kuuma kîrî we gûkûrûkîîra maromba na gwîperia irio, na nyuma ya kwonokua kwao beegua barî na kîatho gîa gûcookia nkaatho. Mondekai oonania bûra Ngai arutaga ngûgî gûkûrûkîîra mîgambo îno: “Anga ûtiûmba watuîkithiirue mûnene wa mûka n'ûntû bwa îgiita ta rîrî?” (4:14)
Gwookubî îbuku rîrî rîkari ûûgû:
Esta aatuîka mûnene wa mûka (1:1-2:23)
Amani aabînda njûri (3:1-5:14)
Amani aûragwa (6:1-7:10)
Ayaundi baacinda anthû baao (8:1-10:23)