Amani aabaanga kûthiria Ayaundi
3
1 Nyumaani, mûnene Asuerusu aaneneyia muntû eetagwa Amani mwana wa Amendatha wa rûrîîyo rwa Agagia îgûrû rîa atongoria bara bangî bonthe. 2 Mûnene aaruta watho kîrî aruti ngûgî baake bonthe boonanagie gîtîîyo kîao kîrî Amani na njîra ya kûmwîndamîîra na kûmûturîria maru. Na bonthe baatua kûrûthaga bu tatiga Morindekai wenka ûra aaregire kûrûtha ûgu. 3 Aruti ngûgî ba mûnene bara baakaraga mwîrîgaani wa mûnene baûria Morindekai, “I mbi n'ûntû ûtakwathîkîra watho bwa mûnene?” 4 Wa îra ntugû ibaamwerekaga arûthe bu, îndî ataathîkîra watho bûbu. Na kwoogu beera Amani mantû mamu, boona kana agaakirîra mûtugo ûyu wa Morindekai n'ûntû Morindekai n'aarî akûbeera atî we i Mûyaundi. 5 Amani athûûra mûno akûmenya Morindekai atikîmwîndamîîra na amûturîria maru. 6 Na rîra aamenyire atî Morindekai aarî Mûyaundi, n'aabangire kûrûtha ûntû bûûnene nkûrûki ya kûnenkera Morindekai îkaanûkia arî wenka. Aarûtha mîbango ya kûûraga Ayaundi bonthe bara baarî nthîgûrû înu yaathagwa i mûnene Asuerusu yonthe. 7 Mwankaani wa îkûmi na îîrî wa Asuerusu ûneneeni, mweri wa mbere ta uu mweri wa Nisani, Amani aaruta watho auga kuura cietagwa “Purimu,” iringwe, gûgîcwîgwa mweri na ntugû îra mbega ya kûrûtha ûntû bûbu. Ntugû ya îkûmi na ithatû, mweri wa îkûmi na îîrî, ta uu mweri wa Anda n'yo yathuurirwe.8 Na kwoogu Amani eera mûnene, “Kûrî na mûgongo mûna wa antû ûnyagaarîte na ûrî gatîgatî ka mîgongo mwanya mwanya ya antû ba iteere bia nthîgûrû yaku yonthe îra waathaga. Mawîthîre maao i mûkûûrani na ma bara bangî na batiathîkagîra mawatho ma mûnene, kwoogu mûnene atibatîîrue abakirîra. 9 Wegua nwa bûkenie mûnene, watho i bwandîkwe atî antû babu baûragwe, na nkaanenkanîra kiro ngiri magana mathatû ma mîrongo înna cia fetha kîrî aruti ngûgî ba mûnene beekîre kîgîînaani kîa mûnene.”
10 Mûnene eetîgania na ûntû bûbu na aruta mbete yake ya watho (îra aatûmagîra gûcaina watho) na amînenkanîra kîrî mûnthû wa Ayaundi, Amani mwana wa Amendatha, wa rûrîîyo rwa Agagi. 11 Mûnene eera Amani, “Antû na mbia ciao mbene ibaaku; rûtha bûra ûkeenda nabo.”
12 Kwoogu ntugû ya îkûmi na ithatû mweri wa mbere, aandîki baarûa ba mûnene beetwa. Baandîka watho bwa Amani kîrî aathani bara banene bonthe, mangabana ma iteere bionthe na atongoria ba mîgongo mwanya mwanya. Ciandîkirwe na rwaria na mwandîkîre wa kîra gîteere. Ciacainîîtwe na riîtwa rîa mûnene Asuerusu na ciaringwa mûûni wa mbete yake. 13 Atûmwa baira baarûa inu iteere bionthe bia nthîgûrû ya mûnene ûyu. Ciarî na watho bûkuuga, Ayaundi bonthe baaniini na baakûrû, eekûrû na twana bathirue kûrû ntugû îmwe. N'yo ntugû înu yarî ntugû ya îkûmi na ithatû ya mweri wa îkûmi na îîrî ûra wetagwa Anda, na into biao bitaîgwe. 14 Baarûa înu yarî îthoomwa na yugîîrua bûrî watho kîrî antû ba iteere bionthe, kaingo muntû wonthe eegue eethuuranîrîte n'ûntû bwa ntugû înu.
15 Mûnene aruta watho atûmwa baathi na mpwî kwira ntheto inu kîrî iteere bionthe, na ûntû bûbu i bwaugîîrue antû ba taûni îra nene ya Susa. Mûnene na Amani baakara nthî kûnyua, îndî taûni ya Susa yaûyûra kîrigicano.