Esta aatuîka mwekûrû wa mûnene
2
1 Na nyuma yoogu, kinya mûnene akûthûûrûka, nwa aakaraga akîthûgaanagîria bûra Basiti aarûthîîte, na îtua rîra rîarî gûtuîgwa îgûrû rîake. 2 Kwoogu aruti ngûgî ba mûnene bara beegagua barî akubî nwee bamwîra, “Mûnene nacwîrwe aarî baathongi bataaro baama na muntû mûrûme. 3 Ka mûnene athuure aathani kuuma iteere bira aathaga bionthe abeere beethîranie aarî baîthî baathongi bonthe bareetwe nyomba ya aka ya mûnene aaga bantû ara airigîre na nthingo taûniini ya Susa. Baigwe rungu rwa ûmenyeeri bwa Egai ûra mûkabe eegagua akîmenyeera aka, nyomba ya aka ya mûnene, na barutîrwe ngûgî ya kûbathongamia. 4 Rîru mûnene athuure mwarî ûra akaamûkenia nkûrûki amûtuîkithie mûnene wa mûka bantû a Basiti.”Mataaro mamu i maarî meega kîrî mûnene kwoogu amathingata.
5 Susa, agu kwairigîîtwe na rûthingo, i kwarî na Mûyaundi eetagwa Morindekai, mwana wa Njairi, mwana wa Kisi, mwana wa Simei wa kuuma mwîrîgaani wa Benjameni. 6 Morindekai aarî ûmwe wa bara baataanîîrue na Njeoakini mûnene wa Njunda kuuma Njerusaremu i mûnene Nebukandinesa wa kuuma Mbabironi. 7 Aarî na mwana wa îthe mûkûrû eetagwa Esta, ûra riîtwa rîake na Kîibirania rîarî Andasa. Aarî mwarî ûmûthongi na ûmûûmbe mwîrî bwega. Aciari baake bagûkua, Morindekai naamûthûkiirie amûrera ta mwarî wake wengwa. 8 Rîra antû beegiirue watho bwa mûnene na aarî baingî baareetwa Susa ara kwairigîîtwe bamenyagîîrwa n'Egai, wana Esta aarî ûmwe wabo. Kinya we aathûngîîrue nyomba ya mûnene ara baamenyagîîrwa n'Egai. 9 Egai n'endire Esta mûno na amwendeera. Atagûta kaanya anjîîria kûmwaa into bia kwîthongamia na irio biega. Amwaa aarî mûgwanja bara beega kuuma nyomba ya mûnene kaingo bamûtûmîkagîra. Aacooka amûthaamithia we na aarî babu amwira bantû ara eega mûno agûkara gûku nyomba înu ya aka.
10 Esta ataumbûrîra antû nwa mûgongo ûrîkû n'ûntû Morindekai n'aamûkaanîtie. 11 Ntugû cionthe Morindekai n'angaangaga agu ome ya nyomba înu yaakaragwa n'aka ba mûciî, kaingo oona bûra Esta aathiîte na mbere na bûra gûgaakarîka kîrî we.
12 Mbere mwarî athûngîrua kwa mûnene Asuerusu, kûringana na watho aambaga kûthuuranîrwa mantûûni ma ûthongi gwa kagiita ka mwanka ûmwe, gwakwa maguta ma manemane mîeri îthanthatû na mangî mara maanunkaga bwega namo mîeri îngî îthanthatû. 13 Na woora mwarî akîthi kîrî mûnene agîîtia na akeegwa kîonthe kîra eendaga kuuma nyomba ya aka na akathi nakîo nyomba ya mûnene. 14 Aathiiyaga kwa mûnene ûgoro, rîru rûkîîrî akathi nyomba îra îngî ya aka akeegua arî rungu rwa ûmenyeeri bwa muntû ûra mûkabe eetagwa Saasigasi ûra aamenyagîîra aka ba kwaiga ba mûnene. Atigîcooka kîrî mûnene kaîrî nwanga akîmwendire akauga eetîrwe we.
15 Kagiita ka Esta mwarî wa Abiairi na mwana wa îthe mûkûrû wa Morindekai ûra aamûthûkîîtie amûrera ta mwarî wake, ga kûthi kîrî mûnene gagûkinya, Esta ateetia nkûrûki ya into bira Egai ûra mûkabe ûra aabarûgamîîrîîte aamwîrire athûkie. Esta neendagwa i muntû wonthe ûra aamwonaga. 16 Kwoogu mwankaani wa mûgwanja Asuerusu arî mûnene mweriini wa îkûmi, tau mweri ûra wetagwa wa Tebethi, Esta areetwa kîrî mûnene Asuerusu gûku nyomba yake ya ûnene. 17 Mûnene amwenda nkûrûki ya aka bara bangî bonthe, amwendeera nkûrûki ya aarî bara bataaro bamaama na antû arûme bara bangî bonthe. Amwîkîra nkoobia ya ûnene kîongo na amûtwîkithia mûnene wa mûka bantû a Basiti. 18 Rîru mûnene aarûtha kîatho n'ûntû bwa gîtîîyo kîa Esta na eeta aathani na atongoria baake. Auga kwîgue kûrî na rûûtha nthîgûrû yonthe na eeyana biewa biingî mûno.
Morindekai oonokia mwoyo wa mûnene
19 Rîra aarî babu beethîranîîtue rîa maîrî, Morindekai aakaraga mwîrîgaani wa mûnene. 20 Wa ta bûra Morindekai aamwathîîte, Esta ataumbûrîra antû nwa mûgongo ûrîkû n'ûntû n'aathiire na mbere kwathîkîra Morindekai wa ta bûra aamwathîkagîra rîra aarî ruungu rwa ûmenyeeri bwake. 21 Kagiita kara Morindekai aakaraga mwîrîgaani wa mûnene, antû baîrî baakabe, Bigithana na Teresi bara baakaragia mwîrîga wa nyomba cia mûnene, baathûûra i mûnene na baabanga kûmûûraga. 22 Morindekai aamenya njûri înu yaabîndîtwe, eera mûnene wa mûka Esta, Esta n'we eera mûnene bûra Morindekai aarî akûmwîra. 23 Na rîra gwacûnkûûnirwe kwoneka mantû mamu maarî ma mma, antû babu barî baîrî baacuurua mûtîîni îgûrû. Watho bwarutwa i mûnene ûntû bûbu bwandîkwe mabukuuni ma mûririkana.