ESTA
Basiti mwekûrû wa mûnene aateegwa
1
1 Mantû mama maakarîkire kagiitaani ka mûnene Asuerusu ûra aathaga nkûrûki ya iteere îgana rîa mîrongo îîrî na mûgwanja kuuma bwa India mwanka Kusi.a 2 Kagiitaani gaku aathanaga arî gîtîîni gîake kîa ûnene bantû ara aarî airigîre na rûthingo ndeeni ya taûni îra nene ya Susa. 3 Mwankaani wake wa îthatû wathaniini naarûthîîre atongoria na aruti ngûgî baake bonthe kîatho. Atongoria ba njûûrî ya Pasia, Mendia, na antû ba gîtîîyo na aathani ba iteere mwanya mwanya ba nthîgûrû inu i baarî oogo. 4 Kîatho kîathûkiirie kagiita ka mîeri îthanthatû akîonanagia wingî bwa ûtonga bwa nthîgûrû yake na bûra aarî Mwathani ûmûnene. 5 Nyuma ya ûgu, mûnene ûyu aarûthîra antû bonthe bara baarî Susa, bantû ara airigîre na nthingo, kuuma ûra mûnene mwanka ûra mûniini, kîatho kîngî gîa ntugû mûgwanja. Kîarugîrîtwe mûndaani wa maûa wa nyomba ya mûnene. 6 Na agu kîaragooni i kwagemeetue na itambaa bia gûcuuria bia rangi înjerû na biingî bia mburuu bira biogeereetwe iguatûûni bia fetha bira biarûmîîrîîtue itugîîni bia maiga na tûtaame tûûyerû na twa papû. I kwarî na itî bia gwîtiira bira biarûthîîtwe na thaabu na fetha, na biaigîîtwe bwega gûntû kwagemeetue na maiga ma goro maathongi ma mîthemba yonthe na rangi cionthe.7 Biakûnyua bianenkanagîrwa na ikombe bia thaabu, gûtirî kîo kîabuaneene na kîra kîngî, mûnene ataagoga antû na ndibei îra yanyuunyagwa n'anene. 8 Gûtaarî na watho bwa biakûnyua, n'ûntû mûnene naarutîîte watho kîrî aruti ngûgî ba nyomba yake atî muntû anyue bûra akwenda. 9 Basiti ûra aarî mûnene wa mûka kinya we naarugîrîîte eekûrû kîatho gûku nyomba ya mûnene Asuerusu. 10 Na ntugû ya mûgwanja ya kîatho, rîra mûnene aanyuîte na akîîgagua akeneete mûno n'ûntû bwa ndibei, eeta aruti ngûgî baake mûgwanja baakabe bara baamûtûmîkagîra. Nabo baarî, Meumani, Bisitha, Aribona, Bigitha, Abagitha, Sethari na Karikasi. 11 Abeera bareete mwekûrû wake Basiti, eekîrîte nkoobia yake ya ûnene. Mûnene ûyu wa mûka aarî nthongama na kwoogu Asuerusu neendaga kwonania ûthongi bwa mwekûrû ûyu wake kîrî antû na aathani baake. 12 Îndî rîra aruti ngûgî beerire mûnene wa mûka Basiti, bûra mûnene aathanîîte, aarega kûthi. Ûntû bûbû i bwathûûriirie mûnene na aabea mûno.
13 Rîru mûnene aaromba antû baake ûkûrû bara baiyî mantû n'ûntû bwarî wîthîre bwa mûnene kûûria antû bara baûme ûkûrû mantûûni ma watho na mawîthîre. 14 Bara baarî akubî n'we mûno baarî, Karisena, Sethari, Andimatha, Tarisisi, Meresi, Marisena na Memukani. Antû baba i bo baarî atongoria mûgwanja ba Pasia na Mendia bara boonanaga na mûnene rîonthe na baagwatîîrîîte ûbici ira nene ûneneeni. 15 Mûnene aûria antû babu ûûgû, “N'aata mûnene wa mûka Basiti abatîîrue arûthwa? Kûringana na watho rî, n'îkaanûkia rîbi mûnene wa mûka abatîîrue anenkerwa aregeete kwathîkîra watho bwa mûnene bûra bwanenkanîîrwe gûkûrûkîîra aruti ngûgî ba mûnene baakabe?”
16 Nwee Memukani eera mûnene na atongoria baake: “Mûnene wa mûka Basiti wana ti mûnene arumîîte wenka, arumîîte kinya atongoria bonthe, na antû bonthe ba nthîgûrû cionthe ira ciathagwa n'anene bara barî ruungu rwa mûnene Asuerusu. 17 Eekûrû bonthe bakaamenya bûra mûnene ûyû wa mûka arûthîîte na bakaanjîîria kûbûthîîria akûrû baao n'ûntû bakaugaga, ‘Mûnene Asuerusu areerire mûnene wa mûka Basiti athi kîrî we aarega.’ 18 Rîra eekûrû ba atongoria ba ûnene ba Pasia na Mendia bakeegua mûtugo ûyu wa mûnene wa mûka, bakaabûthîîria akûrû baao wa ta ûgu mbere kinya ntugû îthira. Ûkeegua kûrî na kûbûthania na mîthûûro îtarî mûthia. 19 Kwoogu ûkeegua bûbû bwakenia mûnene, narute watho ta bûra bwathanagwa n'anene, na kwandîkwe mawathooni ma Apasia na Amendia kaingo bûtakîgarûrwa, bûkiugaga Basiti atigaakinye kîrî mûnene kaîrî. Rîru kaanya gaake ka mûnene wa mûka kanenkerwe mwekûrû ûngî ûmwega. 20 Rîra watho bûbu bwa mûnene bûkaamenyeka nthîgûrû yonthe înu nene ûgu, mwekûrû wonthe akaanenkera mwene gîtîîyo wîgue arî nkîa kana gîtonga.”
21 Îthûgaania rîru rîakenia mûnene na atongoria baake, na aarûtha wa ûgu Memukani augîîte. 22 Na aatûma ntûmwa kîrî iteere bionthe bia wathani bwake ciandîkîîtwe na rwaria na mwandîkîre wa gîteere gîku, ikiugaga atî mûkûrû wonthe abatîîrue kwîgua arî mûtongoria wa mûciî wake na akîaragia na rwaria rwa kwao.