Morindekai aaromba Esta ûteethio
4
1 Rîra Morindekai aamenyire bûra bunthe waakarîkîîte, aatembûranga nguo ciake i kîeba. Eekîra nkunia, eebaka muu kîongo na agiitîîra taûni îra nene akîrîraga nainya n'ûrûrû bwa nkoro, 2 mwanka aakinya mwîrîgaani wa nyomba ya mûnene. Ataathûngîra ndeeni n'ûntû gûtirî we eetîgagîîrua kûthûûngîra nyomba ya mûnene eekîrîte nkunia. 3 Iteere bionthe bia nthîgûrû înu ara ntûmwa ya mûnene yaamenyithanagua, i kwethagîrwa kûrî na kîrîro kîînene kîrî Ayaundi. I baatîîragîra biakûrîa, bakarîra na bakauga mbu, na baingî baao bakamaama makuniani na muuni.4 Rîra aarî ba ngûgî ba Esta na antû bara baakabe baamwîrire bûra Morindekai aarûthaga, n'aanyamaarire mûno. Aatûmîra Morindekai nguo cia wîkîra bantû a nkunia, îndî ataacithûkia. 5 Rîru eeta Athaki ûmwe wa antû baakabe ba nyomba ya mûnene ûra aathuurîîtwe arî mûruti ngûgî wake i mûnene. Na amwîra athi kîrî Morindekai amenye bûra gwakarîkîîte. 6 Athaki aathi kîrî Morindekai kîeniini gîa taûni agu mbere ya mwîrîga wa nyomba ya mûnene. 7 Morindekai amwîra monthe mara maakarîkîîte kîrî we na i mbia igana ata ira Amani eeranîrîte gwîkîra kîgîînaani kîa mûnene kaingo Ayaundi bonthe bathirua. 8 Aaneenkera Athaki baarûa ya watho bûra bwarutîîtwe gûku Susa, bwa kûthirua kwa Ayaundi kaingo oonia Esta na amwîre bûra mantû maakari, akîmwîra athi kîrî mûnene amwereke na amûrombe eegîîrue antû baao kîao. 9 Athaki aathi eera Esta bûra Morindekai aamwîrîîte, 10 Esta n'we amwaa ntûmwa îno acookeria Morindekai: 11 “Aruti ngûgî bonthe ba mûnene na antû bonthe ba iteere bira mûnene aathaga i baiyî atî muntû nwa ûmwe, mûka kana muntû mûrûme akaaya kûthi kîrî mûnene nyomba yake ya ndeeni atarî mwîte, mûnene arî na watho bûmwe akî, muntû ûyu nwa mwanka aûragwe. Nwanga mûnene akamûtaambûrûkîria mûraagi wake wa ûnene wa thaabu i rîo atîîra gûkua. Îndî îîndî i nthirîîtie mweri ûmwe nteetwa nthi kîrî mûnene.”
12 Rîra Morindekai aawatire ntûmwa ya mûnene wa mûka Esta, 13 aatûmana ntûmwa îno ya kûmûkaania: “Ûtikaathûgaanie ûtirî ûgwatiini ta Ayaundi bara bangî bonthe na atî ûkaabuka n'ûntû ûrî nyomba ya mûnene. 14 Ûkaaya gûkira kagiita ta gaka, ûteethio bwa Ayaundi bûkaaya kuuma bantû angî, na bakoonokua, îndî woû ûkaathiranîrua na mûciî wa abaagu. Anga ûtiûmba watuîkithiirue mûnene wa mûka n'ûntû bwa îgiita ta rîrî?”
15 Esta aatûmana îcookio rîrî kîrî Morindekai: 16 “Îthi wîthîranie Ayaundi bonthe bara barî Susa bantû amwe, bûtîîrîre kûrîa. Bûtikaarîe kana bûnyua nwambi kagiita ga ntugû ithatû mûthenya na ûtugû. Niû na aarî baakwa ba ngûgî tûkaarûtha woogu. Na nyuma ya ûgu, nkaathi kîrî mûnene, wana wegua i kîînyume na watho. Wana wegua i gûkua ga nkue.”
17 Rîru Morindekai aathi na aarûtha bunthe bûra Esta aamwîrîîte arûthe.