Esta eeta mûnene na Amani kîathooni
5
1 Gwakarîka ata rî, ntugû yake ya ithatû ya gûtîîrîra biakûrîa, Esta eekîra nguo yake ya ûnene na aathi ndeeni arûngama ome ya nyomba ya mûnene araithîîte kanyomba ka ûnene. Mûnene aarî ndeeni, akarîrîîte gîtî kîa ûnene, araithîîte mwîrango. 2 Rîra mûnene oonire mûnene wa mûka Esta arûngi nja, naakeniirue i kûmwona na amûtambûrûkîria mûraagi wa thaabu. N'we Esta aayanga akubî atongithia mûthia wau. 3 Mûnene amûûria, “N'ata Esta? Mbîîra i mbi ûkwenda, na ûkeewa kinya wegua i nucu ya ûnene bwakwa.”4 Esta acookia, “Ûkeegua bwakenia mûnene rî, ka mûnene na Amani beegue barî ageni baakwa îmunthî kîathooni kîra nthuuranîrîte mûnene.” 5 Mûnene eera aruti ngûgî baake, “Îraani Amani aaye na mpwî, kaingo tûrûtha bûra Esta akwenda.” Kwoogu mûnene na Amani baathi kîathooni gîa Esta. 6 Wa bakînyuunyaga ndibei kîathooni, mûnene aûria Esta, “Mbîîra kîra ûkwenda, na ûkeegwa. Ngakwa kîra ûkeenda kinya wegua i nucu ya ûnene bwakwa.” 7 Esta aacookia, “Îromba rîakwa i rîîrî, 8 ûkeegua mûnene nagûkena i niû na agakeneera kûûyûria îromba rîakwa, ka mûnene na Amani beegue barî ageni baakwa rûû kîathooni kîngî kîra nkaabathuuranîra. Rîru i rîo ngacookia kîûria kîa mûnene.”
Amani abanga kûûraga Morindekai
9 Rîra Amani aumîîte kîathooni naakeneete na neegagua bwega. Îndî rîra oonire Morindekai mwîrîgaani wa nyomba ya mûnene, na aarega gûûkîîra kana oonania kûmûkuthûka rîra aakûrûkîîte, Amani aamuntwa i nkoro n'ûntû bwoogu. 10 Îndî amwe n'ogu ainyîkîria na aathi mûciî. Rîru eeta acoore baake amwe na mwekûrû wake Seresi. 11 Amani abataranîria bûra aarî mûtongu, bûra aarî na nthaka igana, bûra mûnene aamûneneetie ngûgîîni, na bûra mûnene aamûûkîîrîîtie nkûrûki ya atongoria bara bangî na aruti ngûgî bonthe ba mûnene. 12 “Na tûûgu bunka,” Amani aathi na mbere kuuga, “mûnene wa mûka Esta gûtirî muntû ûngî arathookia athiiyania na mûnene kîathooni tatiga niû, na nambîtîîte kaîrî rûû tûrî na mûnene. 13 Îndî gûtirî nwa bûmwe bûgûtûma nganîrwa nkîonaga Morindekai ûra Mûyaundi akari mwîrîgaani wa nyomba ya mûnene.”
14 Kwoogu mwekûrû wake Seresi na acoore baake bonthe bamwîra, “Rûtha gîtugî kîa ûraaya bwa mita mîrongo îîrî na ciîrî, na rûû rûkîîrî ûûrie mûnene Morindekai acuurue ku, rîru ûthi kîathooni na mûnene ûkeneete.”
Îthûgaania rîru irîakeniirie Amani, na kwoogu auga gîtugî kîrûthwe.