Mûnene aaneenkera Morindekai gîtîîyo
6
1 Ûtugû bûbu mûnene ataûmba kûmaama, kwoogu auga mabuku ma mûririkana mara mantû maandîkîîtwe mareetwe athoomerwe. 2 Kwonekana ara kwandîkîîtwe bûra Morindekai aumbûrire bûra Bigithana na Teresi, antû baîrî baakabe bara baakaragia mwîrîga wa kwa mûnene baabangaga kûûraga mûnene Asuerusu. 3 Mûnene aûria, “I gîtîîyo kana i kîewa kîbi twapeere Morindekai n'ûntû bwa ûntû bûbû?”Aruti ngûgî baake bara baamûtûmîkagîra bamûcookeria bamwîra, “Gûtirî bu aarûthîrwa.”
4 Mûnene aûria, “kûrî we wa aruti ngûgî baakwa arî agu ome?”
Narîo i rîo Amani aarî agûkinya ome ya nyomba ya mûnene. Aayîîte kûûria mûnene Morindekai acuurue gîtugîîni kîra aarî akûrûtha. 5 Kwoogu aruti ba ngûgî bamûcookeria bamwîra, “Amani arî oogo arûngi,” mûnene auga, “Mwîre athûngîre.”
6 Kwoogu Amani aathûûngîra ndeeni. Mûnene n'we amwîra, “Kûrî muntû nkwenda mûno kwaa gîtîîyo. N'ata mbatîîrie kûrûthîra muntû ûyû?”
Amani athûgaania nkorooni yake, “N'ûmûnene aûmba kwîgua akîenda kwaa gîtîîyo mûno? Anga twa niû?” 7 Kwoogu acookeria mûnene amwîra, “Ûkeegua mûnene akîendaga kûnenkera muntû gîtîîyo, 8 abatîîrue kûreeta nguo ya ûnene îra mûnene eekagîra n'ûntû bwa muntû ûyû, na mbaraathi îra mûnene athiiyaga n'yo, rîru auga nkoobia ya ûnene yaigîîrwa îgûrû rîa kîongo kîayo. 9 Rîru nguo na mbaraathi inenkanîrwe kîrî ûmwe wa antû baake ba gîtûmi eekîre muntû ûyu nguo înu, amûtwethie mbarathiini na amûtongoreerie amûriûngie taûni yonthe. Muntû ûyu wa gîtûmi athi akiugagîîria. ‘Cûûbaani bûra mûnene eeyaga muntû ûra akwenda gûtîîya kîewa!’ ”
10 Rîru mûnene eera Amani, “Ûkîîra na mpwî ûthûkie nguo na mbaraathi na ûneenkanîre gîtîîyo gîku kîrî Morindekai Mûyaundi ûra akaraga mwîrîgaani wa kwa mûnene. Mûrûthîre bunthe bûra wauga na ûtigaatige nwa bûmwe.”
11 Kwoogu Amani athûkia nguo inu na mbaraathi. Eekîra Morindekai cio na amûtwethia mbaraathiini, Amani n'we amûtongoreeria amûkûrûkîîria kîeniini gîa taûni, akiugagîîria kîrî antû wabathiîte akiugaga: “Cûûbaani bûra mûnene eeyaga muntû ûra akwenda gûtîîya kîewa!”
12 Rîru Morindekai aacooka mwîrîgaani wa nyomba ya mûnene. Amani n'we augia mûciî arî na kîeba akunîkîrîîte kîongo gîake n'îgi. 13 Eera mwekûrû na acoore baake bonthe mara monthe maakarîkîîte kîrî we. Nabo ataari baake na mwekûrû wake Seresi bamwîra, “Ûkwambîîria kûthira inya kîrî Morindekai. Wee i Mûyaundi na ûtimûûmba. Na mma gûtirî kîgiria agûcinda!”
14 Wabakîaragia woogu, antû baakabe bara baarutaga ngûgî nyomba ya mûnene baakinya na mpwî baira Amani kîathooni kîra Esta aabathuuranîrîîte.