Amani aacuurua
7
1 Na kwoogu mûnene na Amani baathi kûnyuunyanîra na mûnene wa mûka Esta. 2 Bakînyunyaga ndibei mûnene amûûria kaîrî ntugû înu ya ciîrî, “Mbîîra kîra ûkwenda, na ûkeewa. Ngakwa kîra ûkeenda kinya wegua i nucu ya ûnene bwakwa.” 3 Mûnene wa mûka Esta amûcookia, “Ûkeegua wenda gûmpa kîra nkûromba mûnene, îromba rîakwa i niû na antû beetû tûtîîre kûûragwa. 4 Niû na antû beetû itwendeetue tûthirua kûrû. Ûkeegua ikwendua gunka twendeetue tûtuîka nkombo, wana ntiaria n'ûntû wîgua bûrî ûntû bûûkai bwa kûthîînîria mûnene.”5 Mûnene Asuerusu aûria mûnene wa mûka Esta, “N'ûû gûmba kûrûtha ûntû ta bûbu? Arîkû muntû ûyu?”
6 Mûnene wa mûka Esta acookia, “Mûnthû wetû na mûmaitha, n'ûyû, Amani muntû ûmûthûûku!”
Amani eekûûnja i kîmako mbere ya mûnene na mwekûrû wake. 7 Mûnene aûka na marûrû, aarûûkîra ndibei auma nyomba aathi mûndaani wa maûa. Amani noonaga mûnene n'abangîîte kûmwaa îkaanûkia na n'ûntû bwoogu aatigwa akîereka Esta atikaûragwe. 8 Aarî akwîgwîthia nthî gîtîîni kîa Esta akîmwereka amwîgîîrua kîao, rîra mûnene acookire nyomba aumîîte mûndaani. Akwona ûûgû agoondoka augîîria, “Ka muntû ûyû akwenda kûngwatîra mwekûrû wakwa wa waaga mbere yakwa, nyomba yakwa?”
Mbere athiria nwa kuuga ûgu rî aruti ngûgî ba mûnene baakunîka Amani kîongo kwonania aabatîîrue kûûragwa. 9 Ûmwe wa aruti ngûgî ba mûnene bara bakabe ûra eetagwa Aribona, auga, “Amani narûthîîte gîtugî nyomba yake kîa ûraaya bwa mita mîrongo îîrî na ciîrî gîa gûcuuria Morindekai, ûra oonokiirie ûtûûro bwaku mûnene!”
Mûnene aruta watho auga, “Cuuria Amani ku!”
10 Kwoogu Amani acuurua gîtugîîni kîra aarûthîrîîte Morindekai. Rîru mûthûûro wa mûnene wagwîrîîra.