Ayaundi beerwa beerwîrîîre
8
1 Ntugû wenu mûnene Asuerusu aanenkera mwekûrû wake Esta ûtonga bunthe bwa Amani, mûnthû wa Ayaundi. Morindekai eetîgîîrua kûthi mbere ya mûnene n'ûntû Esta naarî akwîra mûnene atî Morindekai aarî wao. 2 Mûnene aruta mbete yake îra aathûkîîtie kuuma kîrî Amani aanenkera Morindekai. Esta atuîkithia Morindekai mûmenyeeri wa into bia Amani.3 Esta aaria na mûnene kaîrî, eegwîthîîtie magûrûûni maake akîrîraga. Amwereka arûtha ûntû bwa kûrigîîria mûbango ûmûthûûku ûra Amani, wa rûrîîyo rwa Agagi, aabangîrîîte Ayaundi. 4 Mûnene ataambûrûkîria Esta mûraagi wa thaabu, n'we arûgama mbere ya mûnene auga, 5 “Ûkeegua wenda mûnene, na ûkeegua nûûmakagîra na wegua ûkoona bûrî bwega na wegua ngûkenagia itû tûma baarûa cia kûregana na mûbango wa Amani mwana wa Amendatha ûra wa rûrîîyo rwa Agagi wa kûthiria Ayaundi, bara barî nthîgûrû cionthe ira ciathagwa i mûnene. 6 N'ata mbûûmba kûûmîîria kwona thîîna îno îkîîyîîra antû beetû? Na n'ata mbûmba kûûmîîria kwona antû ba mûciî wetû bakîthirua?”
7 Rîru mûnene Asuerusu eera mwekûrû wake na Morindekai, Mûyaundi, “Raithaani bwone, indaracuuriirie Amani n'ûntû bwa mûbango ûyû arabangîrîîte Ayaundi, na ndanenkanîra into biake kîrî Esta. 8 Îndî baarûa yandîkîîtwe na riîtwa rîa mûnene, na yaringwa mûûni wa ûnene îtiûmba kûgarûrwa.a Nwa bwandîkîre Ayaundi bûkîbeeraga bûra bûkwenda; na nwa bwandîke na riîtwa rîakwa na bûmîringe mûûni wa ûnene.”
9 Waarîo aandîki baarûa ba mûnene beetwa ntugû ya mîrongo îîrî na ithatû mweri wa îthatû, tau mweri wa Sibani. Baandîka watho bwa Morindekai îgûrû rîa Ayaundi kîrî aathani bara banene, mangabana na atongoria ba iteere bionthe îgana na mîrongo îîrî na mûgwanja, kuuma India mwanka Kusi. Ciandîkirwe na rwaria na mwandîkîre wa kîra gîteere. Na kinya Ayaundi baandîkîrwa na rwaria na mwandîkîre wao. 10 Morindekai aandîkithiirie baarûa inu na riîtwa rîa mûnene Asuerusu na aringa mûûni na mbete înu ya thaabu ya mûnene. Baarûa ciairirwe n'atûmwa bathithîîtie mbaraathi irî rwîro ira ciatûmîkaga ngûgîîni ya mûnene.b
11 Baarûa inu ciaugaga atî, mûnene ageetîgîîria Ayaundi taûni cionthe beebange n'ûntû bwa kwîrwîrîîra. I Ikîbeetîgagîîria kûthiria kûrû njûûrî ya ndûa ya kuuma mîgongo kana nteere cionthe bara bakaabaithûkîra amwe na twana kana aka baao.c Na beetîgîîrua gûtaa ûtonga bwa anthû baao. 12 Ntugû îra yaathuurîtwe ya Ayaundi kûrûtha ûgu nthîgûrû cionthe ira ciathagwa i mûnene Asuerusu, yarî ntugû ya îkûmi na ithatû mweri wa îkûmi na îîrî, mweri wa Anda. 13 Baarûa înu yarî îthoomwa na yugîîrua bûrî watho kîrî antû ba iteere bionthe, na Ayaundi beethuuranîra n'ûntû bwa kwîrîîria kîrî anthû baao ntugû înu yaakinya. 14 Mûnene aathire atûmwa baake baugithie mbaraathi rwîro bathiîte kûmenyithia antû ûntû bûbû. Watho bûbû i bwaugîîrue kîrî antû kinya taûni îra nene, Susa.
15 Morindekai aumire nyomba ya mûnene eekîrîîte nguo cia ûnene cia rangi ya mburuu na injerû, na nkoobia ya thaabu kîongo, na neekîrîîte kabuuti ya gatani ya rangi ya ûkûyû. Na taûni ya Susa yakeneera. 16 Kîrî Ayaundi i kwarî na gîkeno na kûûthûkîrwa, kûgwîrua na gûcinda. 17 Taûniini na iteere bionthe; bantû onthe ara watho bûbu bwa mûnene bwakinyaga Ayaundi i baakenire na beegua barî na kîatho kîînene gîa gûkeneera. Na antû baingî beegarûra baatuîka Ayaundi n'ûntû i baabakuthûkaga.