Esta 9

Ayaundi baathiria anthû baao

1 Na ntugû ya îkûmi na ithatû, mweri wa îkûmi na îîrî, ta uu mweri wa Anda yaakinya. N'yo ntugû îra watho bwa mûnene bwarî bwingîke, ntugû îra anthû ba Ayaundi beerîgîîrîîte kûbaciinda. Îndî bantû a bûra baathûgaanagia i bo bakaabacinda, Ayaundi i bo baabaciindire. 2 Ayaundi beethîrana taûni ciao nthîgûrû cionthe ira ciathagwa i mûnene Asuerusu kwithûkîra muntû wonthe ûra akîgeria kûbathûûkia. Antû gûntû kunthe i baakuthûkaga Ayaundi, na gûtirî we akîûmba kûbeeteera. 3 Atongoria bonthe ba iteere, aathani bara banene, mangabana, aruti ngûgî ba mûnene baateetheeria Ayaundi n'ûntû ibaarî kwanjîîria gûkuthûka Morindekai 4 Morindekai naarî akûneneua wathaniini bwa mûnene, na nkuma yake yataamba iteere bionthe na aathi akîgîtaga inya nkûrûki. 5 Kwoogu Ayaundi i baûragire anthû baao na mpiû babathiria kûrû, na baarûtha bûra beendaga na bara baabameneete.

6 Ndeeni ya taûni ya Susa bantû ara airigîre na nthingo, Ayaundi baûragire antû magana mataano. 7 Na baûraga Parisandatha, Ndarifoni, Asipatha, 8 Poratha, Andaria, Arindatha 9 Parimasita, Arisai, Arindai, na Baisatha, 10 bara baarî aana ba antû arûme ba Amani mwana wa Amendatha, mûnthû wa Ayaundi. Îndî bataataa into biao.

11 Ntugû wenu mûnene eerwa antû bara baûragirwe Susa bantû ara airigîre na rûthingo bûra baagana. 12 N'we eera mûnene wa mûka Esta, “Susa yonka bantû ara airigîre na rûthingo Ayaundi baûragîîte antû magana mataano, amwe na nthaka îkûmi cia Amani. N'ata ûûmba kwîgua barûthîîte nthîgûrû ira ingî! Îîndî rî, i mbi îngî ûkwenda? Uga na ûkeegwa; mbîîra na ngakûrûthîra bu.”

13 Mûnene wa mûka Esta n'we auga, “Ûkeegua nwa bûkenie mûnene rî, eetîgîîrie Ayaundi bara barî Susa kûrûtha bûra barûthire îmunthî barûthe bu rûû kaîrî. Na mîîrî ya nthaka cia Amani îkûmi îcuurue itugîîni.”

14 Kwoogu mûnene auga ikûrûthwe bu, na watho bûbu bwaugîîrua Susa. Baacuuria mîîrî ya nthaka îkûmi cia Amani. 15 Kinya ntugû ya îkûmi na inya ya mweri wa Anda Ayaundi bara baarî Susa beethîrana na baûraga antû magana mathatû gûku taûni. Îndî kinya rîru bataataa into biao.

16 Ayaundi bara baarî iteere bira bingî biathagwa i mûnene ûyu wanabo ibaarî bakwîbanga kaingo beerûîrîîra na beerûmûra kuuma kîrî anthû baao. Baûraga antû ngiri mîrongo mûgwanja na itaano ba bara baabathwîre. Îndî bataataa gîntû kîao nwa kîmwe. 17 Îno yarî ntugû ya îkûmi na ithatû ya mweri wa Anda. Ntugû înu îngî yaathingatîîte, ya îkûmi na inya, baanogoka, bamîtuîkithia ntugû ya gîkeno na baaruga îruga. 18 Îndî Ayaundi bara baarî Susa baûragîîte anthû baao ntugû ya îkûmi na ithatû na ya îkûmi na inya, baatuîkithia ntugû ya îkûmi na itaano ntugû ya kûnogoka, îrî ya kûrîyanîra na gûkenanîîra. 19 Gîkî i kîo gîtûmaga Ayaundi bara batwîre ome ya taûni ya Susa batua ntugû ya îkûmi na inya ya mweri wa Anda, îrî ntugû ya kûnogoka na ya gîkeno, îgiita rîa kûrîa biatho na kweyana biewa bia irio.

Kîatho gîa Purimu

20 Morindekai aandîka mantû mamu na aatûma kîrî Ayaundi bonthe ba gûûkubî na kûûraaya, iteere bira bingî biathagwa i mûnene Asuerusu, 21 akîbeeraga baige ntugû ya îkûmi na inya na îkûmi na itaano ya mweri ûra beetaga Anda irî ntugû cia kûnogokaga mîanka yonthe. 22 Ino i cio ntugû ira Ayaundi beebonokiirie kuuma kîrî anthû baao; ûyu na uu nuu mweri ûra îgiita rîa kûrîra na kîeba kwagarûkire waatuîka kûgwîrua na gîkeno. Beerirwe baige ntugû inu irî cia biatho na maruga, na kweyana biegwa bia irio kîrî wa muntû wa muntû na biewa kîrî nkîa. 23 Kwoogu Ayaundi beetîgîîria kûrûthaga bûra Morindekai aabandîkîrîîte, bûra baarî bakwanjîîria kûrûtha.

24 Amani mwana wa Amendatha wa rûrîîyo rwa Agagi na mûnthû wa antû ba Ayaundi n'aaringîîte kuura cietagwa “Puri,” n'ûntû bwa gûcwa ntugû ya kûthiria Ayaundi; îra aabangîîte kûbathiria kûrû. 25 Îndî rîra Esta athiire kîrî mûnene kûmwereka, na mûnene aandîka watho bwa kûgarûra mîbango îra mîthûûku Amani aabangîrîîte Ayaundi, yamûcookera we na nthaka ciake baacuurua itugîîni. 26 Ntugû inu cia kûnogoka ciîtagwa “Purimu” kuumania na riîtwa “Puri”. N'ûntû bwa baarûa ya Morindekai na mamu maakarîkîîte kîrî bo, 27 Ayaundi ibeetîgîîrie ûtuîka mûtugo wao atî bo bongwa, nciarwa ciao, na muntû wonthe ûra aûmba gûtuîka mûyaundi, nwa mwanka akaaririkanaga ntugû inu irî ciîrî mîanka yonthe kagiita kara kaagîrîîte, wa ta bûra kwandîkîîtwe. 28 Ntugû ino ibatîîrue kûririkanagwa na kûmenyagîîrwa i nciarwa cionthe, mîîrîga yonthe, iteere bionthe na taûni cionthe. Na ntugû ino cia Purimu itikoorotiga gûkeneerwa n'Ayaundi, kana mûririkana waacio ûûra nciarwani ciao.

29 Rîru mûnene wa mûka Esta, mwarî wa Abiairi, barî na Morindekai, baandîka barî na watho gwîkîra inya baarûa înu ya ciîrî ya Purimu, îra Morindekai aarî kwandîka mbere. 30 Na nkûrûki, baarûa ciatûmwa kîrî Ayaundi bonthe na kîrî iteere bira îgana na mîrongo îîrî na mûgwanja biathagwa i mûnene Asuerusu. Îkîbarombagîra ûkiri na kwîguyana, 31 na kûbaatha kûrikithia ntugû inu cia Purimu îgiita rîra rîagîrîîte, wa ta bûra Morindekai Mûyaundi na mûnene wa mûka Esta baathîîte Ayaundi, wa ta bûra bo amwe na nciarwa ciao baarî bakûgwata mawatho ma gûtîîrîra kûrîa na ma kîrîro. 32 Nabu, watho bwa Esta, bwa wîkîra mawatho mamu ma Purimu inya, bwandîkwa mabukuuni.