Ageni baathûkana na antû ba Isiraeri
13
1 Ntugû înu baathooma îbuku rîa Musa nainya antû bakîîgagua na kwonekana kwandîkîîtwe gûtirî Mûamoni kana Mûmoabu akooro eetîgîîrua kîûthûranooni kîa Ngai. 2 Gîtûmi n'atî bataathagaana Aisiraeri na irio na rûûyî, îndî i ka baakomborire Mbaraamu abaruma. Amwe na ûgu Ngai wetû aagarûra kîrumi gîatuîka kîthaarimo. 3 Rîra antû beegiirue watho bûbu, bateetîgîîria bara bonthe baarî ba rûrîîyo rwa ageni bakara kîrî Aisiraeri.4 Na mbere mantû mama makarîka, Eriasibu ûra aarî mûthînjîri wa Ngai, na ûra aathuurîîtwe wa kûraithîra bianda bia Nyomba ya Ngai i bagwatanagîra mûno na Tobia. 5 Na n'anenkereete Tobia nyomba îînene îra yaatûmîkaga agu mbereeni kwaiga igongwana bia irio na macoco na into bia Nyomba ya Ngai, na kinya icuncî bia îkûmi bia irio, ndibei yaimbia na maguta bîra bîathanîîtwe bîeyagwe Arawi, aini na akaria ba mîîrîga, na maruta ma athînjîri ba Ngai. 6 Îndî rîra mama monthe maathiyaga na mbere, ntaarî Njerusaremu, n'ûntû mwankaani wa mîrongo îthatû na îîrî wa mûnene Aritasasta wa Mbabironi i ndaarî ngûcooka kîrî mûnene. Kagiita kangî nyumaani ndamûromba rûûtha 7 na ndacooka Njerusaremu. Aaga noo ndaamenyeere ûthûûku bûra Eriasibu aarûthîîte bwa kûneenkera Tobia nyomba ome ya Nyomba ya Ngai. 8 Ndaathûûra mûno, na ndaagera into bia Tobia bia nyomba bionthe ome. 9 Ndaaruta watho bwa kûtheria tûnyomba, na ndacookia into bia Nyomba ya Ngai ku, na igongwana bia irio na macoco.
10 Ndacooka ndaamenya atî icuncî bira biarî bia Arawi batanenkereetwe bio, na atî n'ûntû bwa ûgu Arawi na aini bara baarutaga ngûgî, i bacookire wa muntû mûndaani wake. 11 Kwoogu ndaagondokera atongoria ndabaûria, “I kî n'ûntû Nyomba ya Ngai îtiganîrîîtue?” Rîru ndabeethîrania amwe na ndabaiga twanyaani twao. 12 Rîru antû ba Njunda bonthe baareeta icuncî biao bia îkûmi bia irio, ndibei, na maguta biandaani. 13 Na ndaathuura amenyeeri ba bianda, nabo i Seremia ûra mûthînjîri wa Ngai, na Sandoki ûra mwandîki, na Mûrawi eetawa Pendaya, na ndaatuîkithia Anani mwana wa Sakuri, Sakuri mwana wa Matania, mûniini wao n'ûntû baataragwa barî eetîgua. Ngûgî yao yarî kweyanaga into kîrî bara baarutanagîria ngûgî nabo.
14 Ngai wakwa, ndirikana n'ûntû bwa ûûgû, na ûtikaariganîrue i ngûgî îno mbega îra ndutîîte n'ûntû bwa Nyomba ya Ngai wakwa, na ngûgî ciayo.
15 Ntugûûni inu ndoona antû ba Njunda bakîbiba ncabiibû ntugû ya Sabatû, baakîreetaga irio na bakabikamata na mang'ooi, amwe na ndibei, ncabiibû, nkûyû, na mîthemba yonthe ya mîrigo. Na bareetaga bibi bionthe Njerusaremu ntugû ya Sabatû. Kwoogu ndabakaania kwendagia irio ntugû înu. 16 Antû ba kuuma Turo bara baatwîre Njerusaremu, i baareetaga makûyû na mîthemba yonthe ya irio na kûbiendia Njerusaremu ntugû ya Sabatû kîrî antû ba Njunda. 17 Ndaagondokera itonga bia Njunda ndabiûria, “N'ûthûûku bûbi bûbû bûkûrûtha, bwa wîkîra ntugû ya Sabatû mûgiro? 18 Anga biûyûûyû bienu twabu biarûthire, na Ngai wetû atûreetera ûthûûku tiû amwe na taûni îno? Îîndî i bûkwoongeera mûthûûro wa Ngai kîrî antû ba Isiraeri na njîra ya wîkîra Sabatû mûgiro.”
19 Rîra kwanjîîrie kûgîa mwindu mîîrîgaani ya Njerusaremu mbere ya ntugû ya Sabatû, ndaathana ndauga mîraango iingwe na îtikaarugûrwe mwanka Sabatû îkûrûke. Na ndaiga bamwe ba aruti ngûgî baakwa mîîrîgaani kaingo gûtagîta mûrigo ûkaareetwa ntugû ya Sabatû. 20 Kwoogu iita rîmwe kana maîrî, abiacaara na eendia ba mîthemba yonthe ya into baaraaraga ome ya Njerusaremu. 21 Îndî ndabakaania na ndabaûria, “I kî n'ûntû bûkûraara rûthingooni? Bwarûtha ûûgû kaîrî, ga nkabûbûûra.” Kuuma ntugû înu bataaya ntugû ya Sabatû kaîrî. 22 Rîru ndaatha Arawi beetherie na bathi bakarie mîîrîga kaingo baiga ntugû ya Sabatû îrî întheru.
Ndirikana n'ûntû bwa ûûgû wanabu, Ngai wakwa, na ûmbîgîîrue kîao n'ûntû bwa wendo bwaku bûnene.
Aisiraeri bakaanua kûgûra aka Ageni
23 Nkûrûki ntugûûni înu, ndoona antû arûme ba Njunda bara baagûrîîte aka ba kuuma Asindondi, Amoni na Moabu. 24 Nucu ya aana baao baaragia rwaria rwa Asindondi, kana rwaria rwa ûmwe wa antû babu bangî na bataamenyaga kwaria rwaria rwa Njunda. 25 Ndabagondokera na ndabaruma. Ndaringanga bamwe ba bo na ndabakûûra ntundu. Ndabathiîtithia na riîtwa rîa Ngai na ndabeera, “Bûtikeeyane aarî beenu kîrî nthaka ciao, kana bûgûrîra nthaka cienu aarî baao, kana bûbagûra bûrî biû bwingwa. 26 Anga ti ngûrano ta ino ciatûmire mûnene Soromoni wa Isiraeri eeyia? Gatîgatî ka mîgongo îmiingî gûtaarî mûnene t'we. N'eendeetwe i Ngai, na Ngai amûtuîkithia mûnene wa Isiraeri yonthe, îndî kinya we eeyiirie n'ûntû bwa aka ageni. 27 Îîndî i ka bûkwenda tûbûthikîîria bûkîrûthaga ûthûûku ta bûbû bûûnene ûûgû, na ka bûgûtuîka antû batarî eetîgua kîrî Ngai wetû na njîra ya kûgûra aka ageni?”
28 Na ûmwe wa aana ba Njeoyanda mwana wa Eriasibu mûthînjîri ûra mûnene wa Ngai, aarî mûthonuue wa Sanibarati Mûoroni. Kwoogu ndamwîngatia auma ara ndaarî. 29 Baririkane Ngai wakwa, n'ûntû i beekîrîîte ngûgî ya ûthînjîri mûgiro na kîrîîkanîro kîa ûthînjîri na kîa Arawi. 30 Kwoogu ndaatheria athînjîri ba Ngai na Arawi kuumania na ûntû bunthe bûgeni na ndabanenkera ngûgî, woora muntû ngûgî yake. 31 Kinya ndanenkanîra kaanya ga kûruta nkû na kinya maciaro ma mbere kagiita kara kabatîîrie.
Ndirikana na ûndûthire mantû meega, Ngai wakwa.