Athînjîri ba Ngai na Arawi bara baacookire Njerusaremu
12
1 Athînjîri ba Ngai na Arawi bara baacookaniirie na Serubaberi mwana wa Searitieri na Njesua baarî:Seraya, Njeremia, Esira,
2 Amaria, Maruku, Atusi,
3 Sekania, Reumu, Meremothi,
4 Indo, Nginethoi,
Abiya,
5 Miyamini, Maandia, Biriga,
6 Semaya, Njoyaribu, Njendaya,
7 Saru, Amoki, Irikia, Njendaya.
Baba i bo baarî atongoria ba athînjîri ba Ngai na bara baarutanagîria nabo ngûgî îgiita rîa Njesua.
8 Arawi bara baacookaniirie nabo baarî Njesua, Binui, Kandimieri, Serebia, Njunda, na kinya Matania ûra amwe na bara baarutanagîria nabo ngûgî, aarî mûtongoria wa nyîmbo cia gûcookia nkaatho. 9 Bakibuku na Uni bara baarutanagîria ngûgî nabo, baarûûngamaga babeerekeerete.
10 Njesua aarî îthe wa Njoakimu, Njoakimu aarî îthe wa Eriasibu, Eriasibu aarî îthe wa Njoyanda, 11 Njoyanda aarî îthe wa Njonathani, na Njonathani aarî îthe wa Njandua.
12 Atongoria ba mîciî ya athînjîri ba Ngai îgiita rîa Njoakimu baarî, kuuma mûciî wa Seraya i Meraya, kuuma mûciî wa Njeremia i Anania. 13 Kuuma mûciî wa Esira i Mesuramu, kuuma mûciî wa Amaria i Njeoanani. 14 Kuuma mûciî wa Maruki i Njonathani, kuuma mûciî wa Sefania i Njosebu. 15 Kuuma mûciî wa Arimu i Andina, kuuma mûciî wa Merayothi i Erikai. 16 Kuuma mûciî wa Indo i Sakaria, kuuma mûciî wa Nginethoni i Mesuramu. 17 Kuuma mûciî wa Abiya i Sikiri, kuuma mûciî wa Miniamini na wa Moandia i Piritai. 18 Kuuma mûciî wa Biriga i Samua, kuuma mûciî wa Semaya i Njeonathani. 19 Kuuma mûciî wa Njoyaribu i Matenai, kuuma mûciî wa Njendaya i Usi. 20 Kuuma mûciî wa Saru i Karai, kuuma mûciî wa Amoki i Eberi. 21 Kuuma mûciî wa Irikia i Asabia, kuuma mûciî wa Njendaya i Nethaneri.
22 Atongoria ba mîciî ya Arawi kagiitaani ka Eriasibu, Njoyanda, Njoanani na Njandua wana kinya athînjîri ba Ngai, i baandîkirwe îgiita rîa wathani bwa Ndariasi ûra Mûpasia. 23 Atongoria ba mîciî nciarwaani cia Rawi mwanka ntugûûni cia Njoanani mwana wa Eriasibu, i maandîkîîtwe îbukuuni rîa Mûririkana. 24 Atongoria ba Arawi baarî Asabia, Serebia, Njesua mwana wa Kandimieri, na bara baarutanagîria ngûgî nabo, bara barûngamaga babeerekereete bagîkumia na gûcookia nkaatho, gîkundi kîmwe gîkîambûkagîîria kîra kîngî, wa ta bûra Ndaundi mûruti ngûgî wa Ngai aathanîîte.
25 Akaria ba mîîrîga ya bianda bira biaigagwa into baarî Matania, Bakibuku, Obandia, Mesuramu, Tarimoni na Akubu. 26 Antû baba baarutaga ngûgî kagiitaani ka Njoakimu, mwana wa Njesua, mwana wa Njosandaki na kagiitaani ka Neemia ûra aarî ngabana na Esira mûthînjîri wa Ngai na mwandîki.
Kwathûrwa kwa rûthingo rwa Njerusaremu
27 Na îgiita rîa kwathûrwa kwa rûthingo rwa Njerusaremu, Arawi baaceriirue kuuma naara baatûûraga baareetwa Njerusaremu bakûngwîra bakeneete kwathûrwa gûku na nyîmbo cia gûcookia nkaatho bakiinaga na tamburini, inaanda na wandîndî cia ndigi inyingî. 28 Aini wanabo bareetwa amwe kuuma ntûûra ira ciathiûrûkîrîîte Njerusaremu, kuuma ntûûraani cia Anetofa 29 kinya kuuma Bethi-Girigari na kuuma ntûûra ya Ngeba na Asimabethi n'ûntû aini i baarî bakwîbakîra ntûûra akubî na Njerusaremu. 30 Rîra athînjîri ba Ngai na Arawi beetheriirie, batheriirie antû, mîîrîga na baatheria nthingo.
31 Rîru ndaatûma atongoria ba Njunda bonthe beetia rûthingooni îgûrû, na ndaathuura ikundi biîrî binene bia kwina bicookia nkaatho. Kîmwe kîarî kîthi kîrî îgûrû ya rûthingo kîerekereete mbarî ya Mwîrîga wa Mai. 32 Nyuma yakîo, baathingatirwe i Osaya na nucu ya atongoria ba Njunda, 33 amwe na Asaria, Esira, Mesuramu, 34 Njunda, Benjameni, Semaya, Njeremia, 35 na kinya athînjîri bamwe ba Ngai barî na tûrumbeta, Sakaria mwana wa Njonathani, Njonathani mwana wa Semaya, Semaya mwana wa Matania, Matania mwana wa Mikaya, Mikaya mwana wa Sakuri, Sakuri mwana wa Asabu, 36 na bara baarutanagîria nabo ngûgî baarî Semaya, Asareri, Mirarai, Ngirarai, Maai, Nethaneri, Njunda, na Anani, baarî na into bia kwina bira biathanîîtwe i Ndaundi mûruti ngûgî wa Ngai. Esira ûra mwandîki nwe aatongoreetie 37 Bagûkinya Mwîrîgaani wa Kîthima beetia mwanka nkinyooni cia Taûni ya Ndaundi, ara rûthingo rwetagîîrua na baakûrûkîîra îgûrû ya nyomba ya Ndaundi, nabo baakinya Mwîrîgaani wa Rûûyî rûteere rwa uumîîro bwa riûa. 38 Gîkundi kîra kîngî kîa aini gîacookagia nkaatho kîathi bwa mbarî ya ûthwîro bwa riûa, ndabathingata ndî na nucu ya antû, rûthingooni îgûrû twakûrûka Kîbayo kîa Mariiko, mwanka Rûthingo Rwariî, 39 îgûrû rîa Mwîrîga wa Eburaimu, na twakûrûkîîra Mwîrîga wa Njesana, Mwîrîga wa Makûyû, na Kîbayo kîa Ananeri, na Kîbayo kîa îgana, mwanka Mwîrîga wa Ng'ondu. Nabo barûngama Mwîrîgaani wa Akaria.
40 Kwoogu ikundi bionthe birî biîrî bia aini bira biacookiirie nkaatho biarûngama Nyomba ya Ngai, na kinya niû amwe na nucu ya atongoria, 41 amwe na athînjîri ba Ngai, Eriakimu, Maaseya, Miniamini, Mikaya, Erioenai, Sakaria, na Anania barî na tûrumbeta. 42 Kinya Maaseya, Semaya, Eriasari, Usi, Njeoanani, Marikiya, Eramu, na Eseri. Aini bainire batongorereetue i Njesiraya. 43 Na ntugû înu baaruta igongwana biingî na baakeneete n'ûntû Ngai n'abanenkereete gîkeno kîînene. Eekûrû na twana kinya bo baakena. Na tûyû twa nkena kuuma Njerusaremu tweguîka kûraaya.
44 Na kagiitaani gaku antû baathuurwa ba kûraithagîra nyomba ira ciaigagwa maruta ma maciaro ma mbere na icuncî bia îkûmi. Kuuma mîndaani îra yarî akubî na taûni inu baabatîîrue bareeta icuncî bira biendekanaga i watho biandaani bia athînjîri ba Ngai na Arawi, n'ûntû Njunda n'yakeneere bûra Athînjîri ba Ngai na Arawi baarutaga ngûgî. 45 Baarutire ngûgî ya Ngai wao na ngûgî ya kûtheria, wa ta bûra aini na akaria ba mîîrîga baarûthire kûringana na watho bwa Ndaundi na mwana wake Soromoni. 46 N'ûntû tene mûno ntugûûni cia Ndaundi na Asabu i kwarî na atongoria ba aini, na i kwarî na nyîmbo cia gûkumia na gûcookeria Ngai nkaatho. 47 Kwoogu ntugûûni cia Serubaberi na ntugûûni cia Neemia Aisiraeri bonthe beeyanaga icuncî biao bia wa kîra ntugû n'ûntû bwa aini na akaria ba mîîrîga. Kinya i baathûraga gîcuncî kîa Arawi bara bangî, na Arawi nabo bakaathûra gîcuncî gîa nciarwa cia Arûni.