Ûmenyo bûûmba kwoneka kû?
28
1 Kûrî bantû a kwînja fetha,na bantû ara thaabu îkembagîrwa.
2 Îthaga rîrutagwa nthîgûrû,
na rûthuku rûtherûkagua kuuma iigaani.
3 Mwînji maiga athiiyaga marinyaani marî mwinduuni ûmûnene,
agaceria bira birî ndeeni mûno,
na akeenja maiga mwinduuni.
4 Eenjaga marinya kûraaya na kûra antû batûûraga,
gûntû antû baariganîîrue i kûthi,
kûraaya kuuma kîrî antû acuuracuurîîte.
5 Nthîgûrû, kûra irio biumaga,
îgarûrîîtwe ruungu wa ta mwanki.
6 Maiga ma goro maumaga njaraani ciayo,
tîîri yaayo îrî na thaabu.
7 Nyoni cia îgûrû îtiiyî njîra înu mbithe,
gûtirî riitho rîa nderi rîamîona.
8 Nyamû ira ciîkumagia itaamîkinya,
na gûtirî cimba yaakûrûkîîra.
9 Njara cia muntû i ciatûraga njara imbûmo
na akaguûra mîri ya irîma.
10 Eenjaga mîbereki njaraani inu,
meetho maake moonaga into biayo bionthe bia goro.
11 Aceragia tuumo twa miuro
na akareeta mantû mara maithe bûûrîîni.
12 Îndî rî, i kû ûûme bûûmba kwoneka?
I kû kwerewa gûtûûraga?
13 Muntû atiiyî gîtûmi kîa bu,
bûtioneka nthîgûrû ya bara batwîre mwoyo.
14 Mborokero yuugaga, ‘Bûtirî ndeeni yakwa,’
îria rîkauga, ‘Bûtirî naani.’
15 Bûtigûrwa na thaabu,
kana ûgûri bwa yo bûthimwa na fetha.
16 Bûtigûrwa na thaabu ya Ofiri,
na maiga ma goro ta carindoniki na cabire.
17 Ti thaabu kana kîyici bibuanaana nabu,
kana bûkûûranua na into birûthîîtwe na thaabu î nkeembe.
18 Korari na njacipa itibatîîrie kûgwetwa,
ûgûri bwa ûûme i nkûrûki ya maiga ma goro.
19 Topaci ya kuuma Kusi îtiganaanua nabu,
bûtigûrwa na thaabu î nkeembe.
20 I kû îndî ûûme buumaga?
I kû kwerewa gûtûûraga?
21 I bwithîîtwe kuuma meethooni ma gîntû kîonthe gîtûûraga mwoyo,
bwaithwa kinya nyoni cia gûrû.
22 Kwînyangua na gîkuû biugaga,
‘I nguutû cia bu akî twîgîîtue.’
23 I Ngai eereagwa njîra ya bu
na n'we wenka aiyî ara bûtûûraga,
24 n'ûntû noonaga mîthia ya nthîgûrû
na n'amenyaga gîntû kîonthe kîra kîrî nthîgûrû.
25 Rîra aaneenkeere ruuo inya yaru,
na aathimîra ndûûyî,
26 rîra aathire mbura
na aarûthîra nkwa njîra,
27 rîru aaraitha ûûme na abuugîîria,
aburûngîka na abugeria.
28 Na eera muntû,
‘Gûkuthûka Mwathani i bu ûûme,
na kûregana na ûthûûku i bu ûmenyo.’ ”