Ayubu aathi mbere kwonania atirî na mabîtia
27
1 Na Ayubu aathi na mbere na rwaria rwake auga,2 “Ûmma wa ta bûra Ngai atûûraga mwoyo, ûra ampereetie aki yakwa,
Mwene Inya, ûra ûtûmîîte ncama gana ya nkoro,
3 wa bunka ndî mwoyo,
Ngai ambîkîrîîte mîruke nkîbeebaga,
4 mîromo yakwa îtiaria ûthûûku,
na kanyua gaakwa gatiaria ûrongo.
5 Ntikooro mbîtîgîîria bûrî ûmmani,
mwanka rîra ngaakua, ntiitiga ûkinyanîîru bwakwa.
6 Ngaatûûria wagîru bwakwa na ntibûrekeeria,
mathûgaania maakwa matimbira îgi bunka ndî mwoyo.
7 Anthû baakwa barookara ta muntû ûmûthûûku,
na ûra ambûkagîîra akare ta muntû ataagîrîte!
8 N'ûntû rî, i wîrîgîîro bûbi muntû ûra atatîîyaga Ngai arî nabu,
rîra akaarutwa oogo,
rîra Ngai akaathûkia mwoyo wake?
9 Ngai n'athikagîîria kîrîro gîake
rîra thîîna yamûûyîîra?
10 Akoona gîkeno ndeeni ya Mwene Inya?
Ageeta Ngai magiita monthe?
11 Nkabûrutana mantû meegiî inya ya Ngai,
ntibwitha njîra cia Mwene Inya.
12 Bwinthe i bwîbonereete ûûgû.
Rwaria rûrû rûtarî na gîtûmi îndî i rwa kî?
13 Aaga kûrî na rûgai rûra Ngai agaîrîîte muntû ûmûthûûku,
rûgai rûra mwinyanîîria agwataga kuuma kîrî Mwene Inya.
14 Wana wegua aana baake baingîîte ata,
rûûyiû i rûbeetereete
nciarwa ciake itikooro igîa na biakûrîa biiganu.
15 Bara bakaamonyia, bakaathirua i mûrimo,
na ntigwa ciao itibarîrîra.
16 Wana aûmba fetha ta tîîri
na nguo ta ithûmba bia mûthetu,
17 bira agaigîîte, bara baagîru i bo bageekîra,
na bara batarî na mabîtia bakaagaana fetha ciake.
18 Nyomba îra aakaga i ta nyomba ya mbûbûî,
ta nyomba yaakîîtwe i mûraaria.
19 Amaamaga arî gîtonga, îndî atiirûtha bu kaîrî,
agiincûkia, bionthe bikûthi.
20 Imako bimumbûthûraga ta mûguû,
kîbuubani gîkamûbûria ûtugû.
21 Kîbuubani kîa uumîîro bwa riûa gîkamûkamata, na akathi,
kîmûciataga kuuma bantû aake.
22 Kîmûkûmbaga gîtarî na kîao,
ageragia bûkîremaga, gûkuthûka kuuma kîrî inya yakîo.
23 Kîmûringagîra gîtuma augîîtie,
na kûmûyogera kuuma bantû aake.