Ayubu aaria mantû ma ûnene bwa Ngai
26
1 Rîru Ayubu acookia auga,2 “N'ata wateethia ûra atarî na inya!
N'ata wonokia njara îra ndigooyu!
3 N'îtaaro rîbi waapa ûra atarî na ûmenyo!
Na n'ûmenyo bûbi wonanîîtie!
4 N'ûû we agûteetheetie kwaria biugo bibi?
Na i kîrundu kîaû akwaria kanyua gaaku?
5 Bara bakuû ibainainaga,
bara barî ruungu rwa ndûûyî na bara bonthe batwîre ku.
6 Nthiko n'irugûrîîtwe mbere ya Ngai,
kwînyangua kûrî bûûrîîni.
7 We ataambûrûkagia îgûrû rûteere rwa neegûrû bantû atheri,
na akaara nthîgûrû bantû gûtarî gîntû.
8 Oogaga ndûûyî matuuni maake,
îndî amwe na ûgu matu matitembûkaga n'ûntû bwa ûrito bwaru.
9 Aguîkaga mweri,
ataambûrûkîîtie matu maake îgûrû rîau.
10 Nwe aigîîte mwanka wa ndûûyî,
na mwanka gatîgatî ka werû na mwindu.
11 Itugî bia îgûrû ibiinainaga,
bikarigara i kûgondoka gwake.
12 N'abooreerie îria na inya yake,
na aarebûraanga nyamû îra nene ya îria îîtagwa Raabu tûcuncî tûcuncî na ûûme bwake.
13 Gûkûrûkîîra mîruke yake îgûrû rîathera,
njara yake yaacinda njoka îra nene na î njiûu.
14 Na gaka i gacuncî kaniini ka ngûgî arutîîte,
i kîoye gîake tûkwîgua!
N'ûû îndî ûûmba kwerewa kûgondoka kwa inya yake?”