29
1 Muntû ûra akaanagua ntugû imbiingî wa akîûmagia kiongo,akeenyangua na mpwî mûno na ationa wa kûmûteethia.
2 Rîra antû bara beega bakwathana,
antû i bakenaga;
îndî antû bara bathûûku bagatongoria,
antû i banung'unaga.
3 Muntû ûra endaga ûûme n'atûmaga îthe agwîrua,
îndî ûra athingatanaga na marwaya, n'enyangagia into biake.
4 N'ûntû bwa kûthingata ûmma, mûnene n'atûmaga nthîgûrû yake îkara bwega;
îndî ûra arî îtanûka rîa kûthûkia ngukumo n'amîînyangagia.
5 Muntû ûra anyararaga mûtûûri wake,
i neeti atandîkaga ya gûtega magûrû maake wengwa.
6 Muntû ûmûthûûku agwatagwa i mûtego wa wîyia bwake wengwa,
îndî muntû ûmwega ainaga na agakena.
7 Muntû ûmwega n'athikagîîria kîrîro gîa nkîa,
îndî muntû ûmûthûûku atirî mathûgaania ta mamu.
8 Antû ba ncambanio i bo bamuuntagia taûni mwanki,
îndî antû bara baûme i bathiragia mûthûûro.
9 Muntû ûmûûgî akathi kûgamba na kîaa,
kîaa i kîthûûraga îndî wana gîkatheka gûtirî ûkiri.
10 Antû bara baûraganaga i bathwîre antû bara beega,
na i baûragaga bara barî mîtugo îmîega.
11 Kîaa i kîonanagia mûthûûro waakîo bûûrîîni,
îndî muntû ûmûûgî n'acwithaga na akeegwata.
12 Mûnene agatua kûthikagîîria ûrongo,
aruti ngûgî baake bonthe i bathûûkaga.
13 Nkîa na muntû ûra ainyagîîria nkîa barî na gîntû kîmwe kîbuaneene,
atî i Mwathani atûmaga meetho maao barî baîrî moona.
14 Mûnene ûra agiitagîra nkîa îgamba bûra kûbatîîrue,
ûnene bwake bûgatûûra îgiita rîîraaya.
15 Mûthanju wa îkaanûkia ûreetaga ûûme,
îndî mwana ûra arekagîîrua akarûtha wa bûra akwenda nairaga gina îgi.
16 Rîra antû bara bathûûku bakwathana, ûthûûku i bwingîaga,
îndî antû bara beega bagaakûûyîîra kûgwa kwao.
17 Kaanûkia mwana waku, n'we agaatûma ûnogoka,
na agaatûma nkoro yaku îkena.
18 Ara gûtarî na ûroria antû i batigaga gwîkaania mantû,
îndî kîthaarimo i kîrî muntû ûra athingataga watho.
19 Mûruti wa ngûgî atikaanûkagua na kanyua akî,
n'ûntû wana kinya ûkeegua akîereagwa atiîgua.
20 N'ûkwona muntû ûra aaragia mantû na mpwî atakûthûgaania,
kîaa i kîega nkûrûki yake.
21 Muntû ûra amenyagîîra nkombo yake kuuma karî kaana,
mûthiani atuîkaga mwana wake.
22 Muntû wa mûthûûro n'aûkagia îtheto,
na muntû wa ngoga n'arûthaga mabîtia maingî.
23 Wîkumia bwa muntû bûmûthiragia wengwa,
îndî muntû wa kwînyiia atuîkaga muntû wa gîtîîyo.
24 Kûgwatanîra na mwamba i kûthûûra ûtûûro bwaku wengwa;
n'ûntû anyuithagua muuma na ataumbûre ûntû.
25 Gûkuthûka muntû i kwîbîkîra mûtegooni wengwa,
îndî ûra eerîgagîîra Mwathani n'akaraga bwega.
26 Antû baingî i baceragia kwendeerwa i mûnene,
îndî nwa kuuma kîrî Mwathani muntû aûmba kwona ûmma.
27 Muntû atarî na ûmma i mûgiro kîrî antû bara beega,
na muntû wa mîtugo îmîega i mûgiro kîrî bara baaî.