28
1 Antû bara eeyia i bakuthûkaga kinya rîra gûtarî muntû abengatîîtie,îndî antû bara beega baûmîîrîîtie ta cimba.
2 Rîra nthîgûrû îrî na thîîna,
îrî aathani baingî mûno.
Îndî muntû arî na gûciûkîrwa na ûmenyo,
n'amîrûngîkaga.
3 Mûnene ûra ainyagîîria bara barî na ûbatu,a
akari ta mbura îînene îra yîînyangagia kîmera.
4 Antû bara baunaga watho i bakumagia bara bathûûku,
îndî bara baathîkagîra watho batigwatanagîra nabo.
5 Antû bara bathûûku baticiûraga mantû ma ûmma,
îndî bara baceragia Mwathani i babûciûraga bunthe.
6 Na kaaba nkîa îra îrî na mîtugo îmîega,
nkûrûki ya muntû arî na mîtugo îmîthûûku na kinya wegua arî gîtonga.
7 Mwana ûra amenyagîîra watho n'ûmûûme
îndî bara batumaga ûcoore na antû ba îtanûka i bairaga beethe îgi.
8 Muntû ûra wîbîthîranagîria ûtonga na njîra ya kûrîia baita înene ya mbia ciake,
we eethîranagîria bu muntû ûngî ûra eegagîîrua nkîa kîao.
9 Muntû ûra ateendaga kûthikîîria watho,
kinya maromba maake i mûgiro.
10 Bonthe bara babîtithagia antû beega njîra bagatûmaga bathingata mîtugo îmîthûûku,
bakaagwa îrinyaani warîru beenjîîte bongwa,
îndî bara beega bakoona rûgai rwega.
11 Gîtonga kîrî ûûme meethooni maakîo kîongwa,
îndî nkîa îrî na ûûme n'îkiumbûraga.
12 Rîra antû bara beega baûmbanîîte,
kûrî na ûkumio bwingî;
îndî antû bara baaî baathûkia ûnene,
antû i beebithaga.
13 Ûra aithaga meeyia maake atiithaarimwa,
îndî ûra aumbûraga na agatigana namo akeeguîrwa kîao.
14 Kîthaarimo i kîrî muntû ûra atîîyaga Mwathani,
îndî ûra aûmagia nkoro yake n'athûngagîra thîînaani.
15 Mûtongoria ûtarî mwega atongorereetie antû nkîa,
nwa ta cimba îkûgondoka kana ndûba îrî na yûûra.
16 Mûtongoria atarî na ûûme n'ainyagîîria antû na akabathûûkia;
îndî ûra athwîre into bira bionagwa na njîra itarî mbega,
agatûûra ntugû imbiingî.
17 Muntû akeegua akînyamaara i mûrigo wa wîyia bwa kûûragana,
akaanyamaara mwanka gûkua gwake,
na gûtikaagîte we amûteethia.
18 Muntû ûra arî mîtugo îmîega akoonokua,
îndî ûra njîra ciake itarî mbega atiikarakara atiragwa.
19 Muntû ûra arutaga ngûgî mûndaani n'agîtaga irio biingî,
îndî ûra eenganaga na mantû matarî gîtûmi agaatuîka nkîa.
20 Muntû ûra mwîtîgua akaathaarimwa mûno
îndî ûra arî îtanûka rîa gûtonga atirega gûkaanûkua,
21 Kwendeera antû bamwe ti bwega,
kana muntû kûrûtha ûntû bûtarî bwega n'ûntû bwa kîng'enyûrû kîa mûgaate.
22 Muntû ûra atarekagia gaake endaga gûtonga na mpwî,
na atimenyaga kana ntugû îmwe akagwatwa n'ûkîa.
23 Muntû ûra ûkaanagia muntû mantû aayaga kwendwa nyumaani
nkûrûki ya ûra eebendithagia na kanyua gaake.
24 Ûra aiyaga into bia îthe kana gina akiugaga, “Ti mabîtia,”
gûtirî mûkûûrani wake na aamba bara bangî.
25 Muntû wa îtanûka nengagîîra bitina,
îndî ûra erîgagîîra Mwathani akaagîta into.
26 Muntû ûra eegwatagia mathûgaania maake wengwa i kîaa;
îndî bara bathiyaga na ûûme bagaakara bwega.
27 Muntû ûra weyaga nkîa atiithirîrwa n'into;
îndî ûra wincagia akaagwatwa n'irumi biingî mûno.
28 Rîra atongoria batarî beega baûkagîîra kwathana,
antû i beebithaga;
îndî rîra baathira, antû bara beega i boongeerekaga.