27
1 Ûtigeekumîrie rûûn'ûntû ûtiiyî bûra gûgaakarîka gatîgatî ka îmunthî na rûû.
2 Tiga antû bara bangî bagûkumie
îndî ûtigeekumie na kanyua gaaku wengwa.
Kumua i mûgeni
îndî ti mîromo yaku wengwa.
3 Iiga i rîîrito na mûthanga i mûrigo,
îndî kûnyamaarua i kîaa i bu bûrito nkûrûki ya mamu marî maîrî.
4 Ngoga n'ûmûthûûku, na mûthûûro nwa ta mûguû wa îkondoria;
îndî n'ûû aûmba kûrûngama mbere ya rûriitho?
5 I kaaba kûthetua kûra ûthetagua ûtakwithwa,
nkûrûki ya wendo bûûkunîkîre.
6 I kaaba kûgurarua kûra ûguraragua i mûcoore n'ûntû i kwa mma,
nkûrûki ya gûcuncwa kwingî i mûnthû n'ûntû i kwa ûtheri.
7 Muntû ûra abaîte n'aregaga kinya ûkî,
îndî muntû abûûti wana bira birî gana eegagua birî mûrîo.
8 Wa ta nyoni îra îkaraga kûraaya na ntara yaayo,
nwa ta bu muntû ûra akaraga kûûraaya na mûciî wake akari.
9 Mîtaa na maguta mara manuunkaga bwega imakenagia nkoro,
nwa ta bu nkoro îgwîragua i mataaro ma mûcoore ûmwega.a
10 Ûtikaariganîrue i mûcoore waku kana mûcoore wa abaagu
Kana ûthi kwa mûruanyûkwe rîra wagwatwa i thîîna,
n'ûntû i kaaba mûtûûri ûra arî akubî naawe nkûrûki ya mûruanyûkwe ûra arî kûraaya.
11 Mwan'wakwa, gîta ûûme kaingo nkoro yakwa îgwîrua.
Kaingo mbonaga bwa gûcookeria muntû wonthe ûra akambûûragia.
12 Muntû arî na ûûme oonaga thîîna akeebitha,
îndî biaa bithiiyaga mbere bikagwatwa i thîîna.
13 Thûkia nguo ya muntû ûra agwîtîgîîria gûtuîka îthe wa mûgeni,
ûmîaige îrî kîoneeria kîa wîrane n'ûntû agwîtîgîîria gûtuîka îthe wa mûgeni.
14 Ûra athaarimaga mûtûûri wake akîmuugagîîria na inya rûkîîrî,
gûkeerîkana i kûmûruma akûmûruma.
15 Mûka wa matheta
akari ta mathanta ma mbura
bûra meetîgaga ntugû îra gûkuura.
16 Kûmûrigîîria i bûmwe na kûrigîîria ruuo,
kana gûkumbatîria maguta na njara.
17 Wa ta bûra îthaga rînooraga rîra rîngî,
nwa ta bu muntû aûmîagia muntû ûra ûngî.
18 Ûra amenyagîîra mûkûyû arîîyaga nkûyû ciau,
na ûra amenyagîîra mûnene wake agaatîîywa.
19 Wa ta bûra ûthiû bwîbonaga bungwa rûûyîîni,
nwabu nkoro ya muntû yoonaga ûra ûngî.
20 Gîkuû na kwînyangîka bitibaaga,
na kinya meetho ma muntû matiganagia.
21 Wega bwa thaabu kana fetha bûmenyagwa na mwanki,
îndî muntû amenyagwa kûringana na gîtîîyo gîake.
22 Kinya ûgakimanîria kîaa ntîrîîni amwe na irio,
waa bwakîo bûtiuma ndeeni yakîo.
23 Menya bwega mantû ma ûrîîthi bwaku,
na ûmenyeere bwega nyamû ciaku cia ndîîthia.
24 N'ûntû ûtonga bûtitûûraga tene na tene,
kana ûnene bûtûûra nthukeeni cionthe.
25 Rîra nyaki îra nteme yaathira,
na yîîngî yanjîîria kuuma,
na matî ma kîrîma meethîranua,
26 ng'ondu igakwonera nguo cia gwîkîra,
na mbûri ikûgûrîre kîthaka.
27 Na wîgue ûrî na îria rîa mbûri,
rîa gûkûgana n'ûntû bwa biakûrîa biaku,
na biakûrîa bia antû ba mûciî waku,
na kinya biakûrîa bia aruti ngûgî baaku ba aka.