26
1 Gîtîîyo gîtibuuyaga kîrî kîaa,nwa ta mbaraabu kagiita ka mwathû,
kana mbura kagiita ka maketha.
2 Wa ta tûnyoni tûûmbûkîîte tûtarî na akûgwîrîîra,
nwa ta bu kîrumi gîtarî nthango gîkari.
3 Kîbooko i kîa mbaraathi,
mîkang'i n'ya îng'ooi,
na mûthanju nau nwa mûgongo wa kîaa.
4 Ûtigacookerie kîaa kûringana na waa bwakio,
ûûya kûbuanaana nakîo.
5 Cokeria kîaa kûringana na waa bwakîo,
gîtikaaye kwîbona kîrî na ûûme kîrî kîo kîongwa.
6 Ûra atûmaga kîaa kîthi kwira ntûmwa,
i bûmwe na kwîgiita magûrû,
kana gwîcwîra thîîna wengwa.
7 Wa ta bûra kûgûrû gwa kîonje kwinainaga i kwaga inya,
nwa ta bu rûyuno rûkari rûrî kanyua ga kîaa.
8 Kwaa kîaa gîtîîyo,
nwa ta kwogeera iiga gîkûthaani.
9 Wa ta bûra mwîgua ûkaraga ûmuuntîîte njara ya muntû ûmûtogoonu,
nwa ta bu rûyuno rûkaraga kanyuani ga kîaa.
10 Wa ta mwathi ûra arathangaga antû bonthe,
nwa ta bu muntû ûra aandîkaga kîaa,
kana akûrûki na njîra akari.
11 Wa ta bûra kurû îcookaga kûrîa mataîka maayo,
nwa ta bu kîaa gîcookagîra waa bwakîo.
12 N'ûkwona antû bara beebonaga bongwa barî baûgî?
Wana kaaba biaa birî wîrîgîîro bûûnene nkûrûki yao.
13 Mûthao augaga,
“Kûrî na cimba naagu barabaraani,
Cimba îrî ûrûme n'îkwangaanga naagu njîraani!”
14 Wa ta bûra mûrango ûgarûkaga ûcuuri marenciini,
nwa ta bu mûthao arûthaga arî ûrîrî bwake.
15 Mûthao airaga njara yake thaaniini,
îndî akanoga mûno bûra ataûmba gûcookia njara înu yake amiira kanyua.
16 Mûthao eebonaga arî ûmûûgî mûno
kinya nkûrûki ya antû mûgwanja bara baûmba gûcookia mantû na ûûme.
17 Muntû ûra ethûûngagîîria îthetooni rîtakûrî rîake,
akari ta muntû ûra agwataga kurû matû îkûrûkîîte.
18 Wa ta bûra muntû wa nkoma agerangaga icinka bia mwanki,
na mîgwî îmîîru,
19 nwa ta bu gûkari kîrî muntû ûra eenagîîria mûtûûri wake,
îndî agacooka kûmwîraga, “I ngûceethaga.”
20 Wa ta bûra mwanki wooraga n'ûntû bwa kwaga nkû cia kûthereeria,
Nwa ta bu îtheto rîtarî na muntû wa kwîngîîra rîthiraga.
21 Wa ta bûra makara marî mwanki mamuuntagia nkû,
Nwa ta bu muntû wa îtheto arurumûkagia ûthû.
22 Biugo bia muntû wa nguutû bikari ta kaûmbwa karî mûrîo,
ithûngagîra mwanka icuncîîni bia ndeeni bia muntû.
23 Ntheto imbega îndî ciarîîtue na nkoro îmbîî
nwa ta matherûko ma fetha makaandîte nyûngû ya yûûmba.
24 Muntû ûmûûî aithaga ûthûûku bwake na rwaria rwa kanyua gaake,
îndî eegagua abwaigîîte nkorooni yake.
25 Wana akaaria mantû meega ûtikaamwîtîgie,
n'ûntû nkoro yake yûûyûrîîte mîgiro mûgwanja.
26 Wana kinya ûkeegua ûûî bwake ibûûkunîkîre i waara bwa kanyua gaake
ûthûûku bwake bûkaumbûka mbere ya kîrîndî gîa antû.
27 Ûra akeenja îrinya n'we wengwa akaagwa ku,
na ûra akaingiritia iiga n'we wengwa rîkaagarûkîra.
28 Rûrîme rûra rwaragia ûrongo i rûmenaga bara rûthûûkîîtie,
na kanyua kara kanyûrûntanaga, ngûgî yako i kûthûûkia.