Njuno iingî cia Soromoni
25
1 Ino kinya cio i njuno iingî cia Soromoni, ira ciakoobiirue n'aruti ngûgî ba Esekia mûnene wa Njunda.2 Ûkumio bwa Ngai i kwitha mantû
îndî ûkumio bwa mûnene i kuumbûra mantû.
3 Wa ta bûra îgûrû rîrî kûraaya gwîtia bwegûrû na nthîgûrû îrî kûraaya kwîndama bwa nthî,
nwabu mathûgaania ma mûnene matacûnkûûnîka.
4 Ruta rûko kuuma kîrî fetha,
n'we mûturi akoona gîa kûrûtha nakîo gîntû.
5 Rutaruta antû bara bathûûku mbere ya mûnene,
na ûnene bwake bûkarûngama na ûmma.
6 Ûtikeebûkîîrie mbere ya mûnene,
kana ûrûngama bantû a antû bara banene,
7 N'ûntû wana kaaba kwîrwa, “Ncû naaga mbere,”
bantû a gûcookua nyuma mûnene akîonaga.
8 Ûtikaagîte mpwî cia kwira mantû kootiini;
ûtikaaye kwaga bwa kûrûtha mûthiani,
rîra mûtûûri waku agaakwira îgi.
9 Thiria thîîna ciaku na mûtûûri waku bûrî baîrî,
na bûtîkaumbûre ciri cienu kîrî antû bangî.
10 Antû batikaaye kûbûmenyera babûruma,
na bûgîa îgi rîtakîthira.
11 Ûntû bwarîîtue kagiita kara kaagîrîîte,
i ta magemio ma matunda ma thaabu marî îgûrû rîa fetha.
12 Îkaanûkia rîa muntû ûmûûme kîrî muntû arî matû,
nwa ta mina ya thaabu kana mûkathî wa thaabu îra nthongi mûno.
13 Mûtûmwa ûra mwîtîgua kîrî ûra amûtûmîîte,
akari ta mpîo ya mbaraabu kagiita ka maketha.
14 Wa ta bûra ruuo na matu matarî mbura makari,
nwabu muntû ûra eekumagia akeeyana kîewa na atieyana akari.
15 N'ûntû bwa kûûmîîria kwingî mûnene nwa eguithue,
na rûrîme rûkindîîru nwa ruunange mîîndî.
16 Wegua ûkwona ûkî, îrîa bûra bûgûkûganîîra,
ûtikaarîe nkûrûki ûûya kûbutaîka.
17 Ûtikamenyeerie kûgûrû gwaku rîonthe kwa mûtûûri waku,
atikaaye kûnoga i woû na akûmena.
18 Muntû ûra ûtuuyagîîra mûtûûri wake ûkûûyî bwa ûrongo,
athûûkîîte ta ncûgûma, rûûyiû kana mûgwî ûmûûgî.
19 Kwîrîgîîra muntû atagwîtîgîka kagiita ka thîîna,
i ta kwîgwatia îgego riunîku kana kûgûrû kwenetie.
20 Kwinîra muntû arî na kîeba rwîmbo
i bûmwe na kûmûruta nguo kagiita ga mpîo
kana ta gûtûûrîria cumbî kîrondaani.a
21 Wegua mûnthû waku narî na yûûra mûpe biakûrîa arîe,
na akeegua arî na bûûta mûkundie rûûyî rwa kûnyua.
22 N'ûntû gûku i kûmwaigîîra makara ma mwanki kîongo gîake,
na Mwathani agakûthaarima.
23 Ruuo rûra ruumaga bwa îgûrû rûreetaga mbura,
na nwa ta bu nguutû ireetaga rûmena.
24 Na kaaba gûtûûra gakoonaani ka rûûgûrû rwa nyomba
nkûrûki ya gûtûûra nyomba îmwe na mwekûrû wa matheta.
25 Wa ta bûra rûûyî rûrî mpîo rûkari kîrî muntû arî na bûûta,
nwa ta bu ntheto îmbega yumîîte nthîgûrû ya kûraaya îkari.
26 Wa ta kînyaka gîîkunjugûrie kana kîthima kîrî na cûmû,
nwa ta bu muntû ûmwega ûra eetîgagîîria kûthingata mîtugo ya bara batarî beega akari.
27 Ti bwega kûrîa ûkî bwingî mûno,
wana kinya muntû gwîkumia arî wengwa ti bwega.
28 Muntû ûra ataathaga nkoro yake wengwa,
akari ta taûni îmbomorange îtarî na rûthiingo.