24
1 Ûtikeegîîrue antû bara bathûûku rûriithokana wîrirîîria gûkarania nabo.
2 N'ûntû nkoro ciao ibangaga mantû ma ûgîti
na tûnyua twao twaragia bûra bagaceria thîîna.
3 Nyomba yaakagwa na ûûme
na îkarûngîkwa na kwerewa.
4 Na n'ûntû bwa ûmenyo tûnyomba twayo twa ndeeni
tûkaûyûrua na into biithongi bia goro bira bitoonekangaga woogu.
5 Muntû arî na ûûme, arî na inya îînene mûno,
na muntû arî na ûmenyo n'ongagîîra inya.
6 N'ûntû bwa mataaro meega nwa ûrûe ndûa,
na n'ûntû bwa mataaro maingî ûûmbani bûkoonara.
7 Ûûme bûtikinyîrîka i biaa,
bationaga bwa kuuga rîra antû beethîreene.
8 Ûra athûgaanagia kûrûtha mantû mathûûku
rîonthe ageetagwa muntû wa bitina.
9 Mîbango îra kîaa kîthûgaanagia rîonthe n'ya wîyia,
muntû wa kabûthia athûûragwa i muntû wonthe.
10 Ûgakua nkoro kagiita ka thîîna
woû ûtirî na inya.
11 Teethia bara bathûkîîtue bathi kûûragwa,
na wonokie bara bathuuranîrîtwe bang'eerwa.
12 Îndî ûkaaya kuuga, “Tûtaamenya mantû mamu,”
ûrîthûgaania ûra araithaga nkoro atiiyî?
Na akaarîa antû bonthe kûringana na ngûgî ciao?
13 Mwan'wakwa, ûrîe ûkî n'ûntû i bwega,
îgwa rîa ûkî rîrî mûrîo warîcama.
14 Nwa ta bu ûûme bûrî mûrîo nkorooni yaku,
wabuona, ûkeegua ûrî na wîrîgîîro kagiita kaayîîte
na wîrîgîîro bûbu bwaku bûtiithira.
15 Woû muntû ûmûthûûku, ûtikeebithîîre ûkîenda kûthûûkia mûciî wa muntû ûmwega
ûtikeenyangie bantû aake ara atûûraga.
16 N'ûntû muntû ûmwega kinya akagwa maita mûgwanja agaûkîîra kaîrî.
Îndî bara batarî beega i bathiragua cwe i thîîna.
17 Ûtigaakene rîra mûnthû waku aagwa,
na ûtikaareke nkoro yaku îkena rîra agûtaratara,
18 Mwathani atikaaye kwona ûgu athûûra,
agarûra mûthûûro wake uuma kîrî we.
19 Ûtikanyamaare nkoro n'ûntû bwa bara barûthaga mantû mathûûku
kana wîgîîrua antû bara bathûûku rûriitho.
20 N'ûntû muntû ûmûthûûku atirî na wîrîgîîro ntugû ciiyîîte,
na taa ya muntû ûmûthûûku îkoora.
21 Mwan'wakwa, tîîya Mwathani na kinya mûnene,
na ûtikaagwatane na bara baûmo biongo.
22 N'ûntû kînyamaara kîbaayagîîra na mpwî,
na n'ûû wiyî bûra bûkaabagwata?
Njuno ciingî cia ûûme
23 Ino kinya cio i njuno cia antû bara baûgî:
Kwonania ûkîendeera rûteere rûmwe rîra ûkîgiita îgamba, ti bwega.
24 Ûra eeraga mwîyia, “Wou ûtirî na mabîtia,”
n'arumagwa n'antû na mîgongo îkamûmena.
25 Îndî ûra akaanûkagia mwîyia agakara bwega,
na akoonaga kîthaarimo.
26 Ûra acookagia îcookio rîa mma
nwa ta bûmwe na ûra acuuncaga mîromo.
27 Thuuranîra ngûgî ciaku naagu ome,
ûrîîkie ngûgî ciaku cionthe cia mûnda,
rîru wake nyomba yaku.
28 Ûtigaatuîke mûkûûyî wa mûtûûri waku gûtarî na gîtûmi,
na mîromo yaku îtikaarie ûrongo.
29 Ûtikauge, “Nkaabarûthîra wa ûgu baandûthîra,
nwa mwanka mbarîe woogu bungwa barûthîîte.”
30 I ndakûrûkîîre akubî na mûnda wa mûthao,
na kinya mûnda wa mîcabiibû wa muntû atarî na mathûgaania meega.
31 Ndaarigara mûno nkwona uumîîte mîîgua,
ûûyûri îria teke
na rûthiingo rwau rwa maiga rwomokangîîte.
32 Ndacuraitha, ndaathûgaania,
na ndeerutana ûntû.
33 Gatoro kaniini kana kûng'onta bûûkai,
gûkûnja njara bûûkai ûnogoka,
34 ûkîa bûgakûûyîîra ta mwamba,
na kwaga naku ta ncamba yîîbogeete mathaga ma ndûa.