23
1 Rîra wakara nthî kûrîyanîra na mûnene,ûtikaariganîrue nwa aniini n'ûû we ûyu bûrî amwe n'we.
2 Kaania mûmero waku
wegua wendeete kûrîa mûno.
3 Ûtikeerirîîrie biakûrîa biake biega
n'ûntû nwa bikweneerie.
4 Ûtikeenogie ûkîenda gûtuîka gîtonga,
na ûtikeegwatie ûûme bwaku wengwa.
5 Ûtonga bûthiraga ta îbenia rîa riitho,
n'ûntû i buumaga mathabu
bûkabuurûûka bûkaûrîra îgûrû ta ndiiû.
6 Ûtikaarîe biakûrîa bia muntû ûmûkûûnu
kana wîrirîîria biakûrîa biake biega.
7 N'ûntû nkorooni yake eegagua agîtara ûgûri
rîru agakwîraga, “Îrîa na ûnyue,”
îndî nkorooni yake bûtirî kîmwe.
8 Ûgaataîka twirio tûtu tûniini warîa
na biugo biaku biega bia kûmûcookeria nkaatho bituîke bia mana.
9 Ûtikaarie kîaa gîkîîgagua
n'ûntû i gîkaabûthia ûûme bwa biugo biaku.
10 Ûtikaathiyangie kaiga ka mwanka wa tene
kana ûthûngîîra mînda ya nkîa.
11 N'ûntû mûkûûri wao arî na inya
na n'we akaagamba naawe îgamba rîao.
12 Îtîgîîria nkoro yaku îgwate ûrutani
na matû maaku mathikîîrie biugo bia ûmenyo.
13 Ûtigaatige gûkaanûkia mwana,
kinya ûkamûcûnia kathanju,
atiikua.
14 Wamûkaanûkia na kathanju,
ûkamûteethia atigaakue.
15 Mwan'wakwa, ûkeegua nkoro yaku îrî na ûûme,
wana nkoro yakwa îgaakena.
16 Nkoro yakwa îgaakena
rîra mîromo yaku îkaaria ûmma.
17 Nkoro yaku îtikeegîîrue eeyia rûriitho
îndî kuthûkaga Mwathani ntugû cionthe.
18 N'ûntû na mma kûrî na wîrîgîîro
na wîrîgîîro bûbu bûtiûra.
19 Thikîîria mwan'wakwa, gîta ûûme,
na werekeerie nkoro yaku njîraani ira mbega.
20 Ûtikeegue ûrî ûmwe wa bara banyuunyaga ncoobi,
kana wîgua ûrî ûmwe wa bara barî bata ya nyama.
21 N'ûntû areebi na bara barî bata ya nyama bakaarigania na gûtuîka nkîa,
n'we ûra atûmagîra ntugû yake kûng'onta ageekagîra mathaango.
22 Thikagîîria abaagu ûra wagûciarire
na ûtikaarume nyûkwe wona akûra.
23 Gûra ûmma na ûtikaabuendie
gîa na ûûme, mîtugo îmîega na kwerewa.
24 Îthe wa mwana ûmwega n'akenaga
na ûra aciaraga mwana arî na ûûme n'akenaga n'we.
25 Tûma abaagu na nyûkwe bagwîrue i woû
na ûra aagûciarire akene.
26 Mwan'wakwa nthikîîria bwega
na meetho maaku makeneere mîtugo yakwa.
27 N'ûntû îrwaya n'îrinya rîorokeru mûno
na mûka ûtarî mîtugo îmîega i kathima gatarî kariku.
28 Wa ta bûra mwamba akaraga agiitîrîîte nwabu mwekûrû ûyû agiitagîra
akaingîyia arûme bara beegagua batarî eetîgua.
29 N'ûû we ûyu ûkûringa gîtuma?
N'ûû we ûyu arî na kîeba?
N'ûû we ûyu arî na bitina?
N'ûû we ûyu akûtheta?
N'ûû we ûyu agurarîîtue gûtarî na gîtûmi?
N'ûû we ûyu arî na meetho maatuune?
30 I bara banyuunyaga ncoobi kagiita kaaraaya
bara bathiiyaga gûceria ncoobi îra mbunganie.
31 Ûtikaaraithe ncoobi rîra îrî ntuune
rîra îkwonorua gîkombeeni
îgeetîga ku mpoora.
32 Mûthiani îrûmanaga ta njoka
na îkamuntana ta njoka înthûûku.
33 Meetho maaku makoona mantû maageni
na nkoro yaku yaarie mantû mathûûku.
34 Yîî, ûgakara ta muntû amaami îriani gatîgatî,
kana ta muntû akûng'onta arî gîtugîîni kûra îgûrû.
35 Ûkaugaga, “Bakûûndinga îndî ntiragurara,
bagûûntura îndî ntireegua ûrûrû.
Aabu irî ngaûkîîra,
nthi nkamîcerie kaîrî.”