Njuno mîrongo îthatû cia ûûme
22
1 Na kaaba kûthuura riîtwa rîega nkûrûki ya ûtonga bûûnene,kwendeerwa i kwega nkûrûki ya thaabu na fetha.
2 Itonga na nkîa barî na ûntû bûmwe bûbuaneene kîrî bonthe,
i Mwathani ûbaûmbîîte bonthe.
3 Muntû ûmûûme oonaga thîîna yîyîîte akeebitha,
îndî kîaa gîkûrûkaga gîkathi bwa mbere nakîo gîkoona thîîna.
4 Kîewa gîa kwînyiia na gûtîîya Mwathani
n'ûtonga, îgweta na mwoyo.
5 Mîîgua na mîtego n'îgagua îrî njîraani ya bara bathûûku,
îndî ûra eemenyagîîra atigwatagwa kana amuuntwa n'yo.
6 Rutana mwana njîra îra abatîîrue kûthingata,
na rîra agaakûra atimîtiga.
7 Itonga i biathaga nkîa
na ûra akoobaga i nkombo ya ûra amûkoobithîîtie.
8 Ûra aandaga ûthûûku akethaga thîîna
na kwinyanîîria kûra ainyagîîria bara bangî gûgaakinya mûthia.
9 Muntû wa kweyana akaathaarimwa,
n'ûntû narûmagia nkîa irio biake.
10 Umagarûkia muntû wa kabûthia ome na bitina îkaumagarûka,
îtheto na irumi bithire.
11 Ûra ûrî nkoro întheru na aiyî gûtarîîria akîaria
agaatuîka mûcoore wa mûnene.
12 Meetho ma Mwathani makaraga maraithîîrîîtie bara barî na ûmenyo,
îndî n'enyangagia rwaria rwa bara batarî eetîgua.
13 Mûthao augaga “Cimba îrî agu ome.”
Kana akauga “Nkaûragîrwa njîraani!”
14 Kanyua ka mûka mûmaraaya n'îrinya rîorokeru,
ûra athûûragwa i Mwathani i ku agwîyaga.
15 Waa bwîkundîkîîrîîte nkorooni ya mwana mûnyi ndeeni,
îndî kathanju ga îkaanûkia kabwîngatagia bûkathi kûraaya mûno.
16 Ûra ainyagîîria nkîa kaingo eetongia,
na ûra eeyaga itonga biewa,
bonthe bagaatuîka nkîa.
17 Thikîîria bwega wîgue biugo bia bara barî ûûme,a
na werekeerie nkoro yaku kûrûtha bûra ngûkûrutana.
18 Ûkaagwîrua wegua ûkabiiga nkorooni yaku
na ûbiaragie na kanyua gaaku.
19 Ndakûmenyithia mantû mama îmunthî woû,
kaingo wîrîgîîro bwaku bûkara kîrî Mwathani.
20 Anga ntirakwandîkîra njuno mîrongo îthatû
cia gûgwîkîra ûûme na gûkwaa ûmenyo,
21 cia gûkwonia bûra bwega na bwa mma,
kaingo ûkaûmba gûcookeria ûra agûgûtûmîîte îcookio rîa mma?
22 Ûtikainyîîrie nkîa n'ûntû bwa ûkîa bwa yo
kana winyîîria bara batarî na inya rîra ûkûbagambithia,
23 N'ûntû Mwathani akabagambîra
na enyangie ûtûûro bwa bara babeenyangagia.
24 Ûtigaatume ûcoore na muntû wa ngoga
kana ûthiiyania na muntû wa mûthûûro ûmûnene,
25 kaingo ûteerutana mîtugo yao
ûûya kwîgwatithia mûtego.
26 Ûtikeegue ûrî ûmwe wa bara beeyanaga wîrane
bara beepeeyanaga kûrûngamîîra marandû,
27 n'ûntû wona waremwa i kûrîa
wana kinya ûrîrî bwaku bûra ûmaamagîra i bûkaathûkua.
28 Ûtikaathiyangie kaiga ka mwanka wa tene
ûra waigirwe i biûyûûyû bienu.
29 Nûkwona muntû ûra arî waara ngûgîîni yake?
Akaarutagîra mûnene ngûgî,
atiirutagîra antû bara batarî beega ngûgî.