21
1 Nkoro ya mûnene îrî njaraani cia Mwathani,wa ta muuro wa rûûyî Mwathani amîûndûraga wa bûra akwenda.
2 Mantû monthe mara muntû arûthaga moonekaga taka marî meega meethooni maake,
îndî Mwathani n'we ûthimaga nkoro.
3 Kûrûtha bûra bwega na bwagîrîîte mbere ya Mwathani
i bwîtîgîrîkaga kîrî Mwathani nkûrûki ya kîgongwana.
4 Nkoro ya wîkumia na meetho marî rambu
na mîtugo îmîthûûku monthe i meeyia.
5 Mîbango ya muntû ya kwîrutanîria nîtûmaga akagîta ûtonga bwingî
îndî muntû ûra athûngûthanagia na mantû nwabu akaagwatwa n'ûkîa.
6 Kûgîta ûtonga na njîra ya ûrongo
nwa ta ntoogo îkîûmbûkua i ruuo
na i mûtego wa gîkuû.
7 Ûthûûku bwa antû bara bathûûku i bu bûkaabathiria
n'ûntû i baregeete kûrûtha mantû mara meega.
8 Njîra ya muntû ûra arûthaga wîyia inthûûku mûno,
îndî mîtugo ya muntû ûra mwega i mîega mûno.
9 Na kaaba gûtûûra gakoonaani ka rûûgûrû rwa nyomba
nkûrûki ya gûtûûra nyomba îmwe na mwekûrû wa matheta.
10 Nkoro ya muntû ûmûûî yeendaga kwona ûthûûku,
mûtûûri wake ationaga wega kuumania n'we.
11 Rîra muntû wa kabûthia aapeewa îkaanûkia, biaa ibigîtaga ûûme.
Na rîra muntû arî na ûûme aarutanwa, n'agîtaga ûmenyo.
12 Ûra Mwagîru n'amenyaga mantû ma nyomba ya muntû ûra mûthûûku,
na akathiria bara bathûûku beenyangagua na bakathirua.
13 Ûkaaya kwinga matû maaku ûtikeegue kîrîro gîa nkîa,
wana woû ntugû îra ûkaarîra gûtirî we agaakwîgua.
14 Kîewa kieyanîîtwe na njîra ya witho i kîthiragia mûthûûro,
na ngukumo inenkanîrîîtwe na witho n'îthiragia marûrû maanene.
15 Rîra ûmma bwathingatwa antû bara beega i bakenaga,
îndî bara bathûûku i batemekagia.
16 Muntû ûra areganaga na njîra ya gûciûkîrwa,
akeebîthîra gatîgatî ka bara bakuû.
17 Ûra endaga gwîkenia akî agaatuîka nkîa,
ûra wendaga ncoobi na maguta atikooro atonga.
18 Muntû ûra mûûî n'îrîi rîa gûkûûra muntû ûra mwega
muntû ûra mûthûûku agaakaanûkua bantû a ûra mwega.
19 Na kaaba gûtûûra rwanda
nkûrûki ya gûtûûra na mûka wa gîtuma na matheta.
20 Nyomba ya muntû arî na ûûme kwîgagua kûrî na irio bia goro na maguta ma mîceituuni,
îndî kîaa kîrîîyaga into biakîo bionthe.
21 Ûra aceragia wagîru na wendo akoona mwoyo,
ûtonga na gîtîîyo.
22 Muntû arî na ûûme aithûkagîra taûni ya muntû arî inya
na akeenyangia gûntû gwake kunthe gwa kwîbitha kûra etîgîîtie.
23 Kûmenyeera kanyua gaaku na kinya rûrîme rwaku,
i kwîmenyeera ûtikaagwatwe i thîîna.
24 Muntû ûra mwîkumia na ngîti, riîtwa rîake eetagwa, “Muntû wa kabûthia,”
n'ûntû ngûgî ciake ciûyûri wîkumia na kwîbona.
25 Wîrirîîria bwa mûthao i bûtûmaga akua
n'ûntû njara ciake itiendaga kûruta ngûgî.
26 Muntû ûra mûûî atiindaga akîîriragîîria kwona gantû ntugû yonthe,
îndî ûra mwega eeyanaga atakwerania.
27 Kîgongwana kîa muntû ûmûûî i mûgiro,
n'aata kîthûûkîîte bûgana rîra akîreteete arî na îthûgaania rîîthûûku.
28 Mûnkûûyî wa ûrongo atiitûûra
na wonthe ûra amûthikagîîria, akaathirua tene na tene.
29 Muntû ûmûûî eebonanagia we i ncamba,
îndî muntû ûmwega n'athûgaanagîria njîra ciake.a
30 Gûtirî ûûme, kîrîra kana mûbango
ûûmba kûbua kiuthatî na Mwathani.
31 Mbaraathi n'îthuuranagîrwa n'ûntû bwa ntugû ya ndûa,
îndî kûûmbana kuunthe kuumaga kîrî Mwathani.