20
1 Ndibei i mûnyûrûntani n'yo ncoobi n'ya îtheto,na muntû wonthe ûra arûthaga ûthûûku n'ûntû bwa yo atirî ûûme.
2 Îgondoka rîa mûnene i ta îkunia rîa cimba,
ûra ûmûthûûragia n'ûtûûro bwake wengwa eekagîra thîînaani.
3 N'ûntû bwa gîtîîyo gûkuthûka bitina,
îndî kîaa kîrî mpwî cia kûtheta.
4 Mûthao atirîmaga kagiita ka marîma,
kwoogu kagiita ka maketha atiîgua arî na gîntû.
5 Mîbango ya nkoro ya muntû i ta kîthima kîorokeru mûno,
îndî muntû ûra arî na gûciûkîrwa akarutaa.
6 Antû baingî baugaga bûra barî beega,
îndî n'ûû aûmba kûmenya n'ûû mwega na wa gwîtîgîka?
7 Muntû ûmûtheru ûra mîtugo yake îrî mîega,
aana baake bamîthingata bakaathaarimwa.
8 Mûnene ûra akarîrîîte gîtî gîake akîgiita magamba
eeraga ûthûûku bunthe na meetho maake.
9 N'ûû aûmba kuuga, “Nkoro yakwa,
n'întheru?”
10 Ithimi bia ûrongo na mîkebe îtarî mîega,
mantû mamu marî maîrî Mwathani namathwîre.
11 Kinya mwana n'amenyekanaga n'ûntû bwa mîtugo yake
wegua ngûgî yake n'îmbega kana n'înthûûku.
12 Riitho rîra rîonaga na gûtû kûra kwîgagua,
bionthe birî biîrî i Mwathani ûbiûmbîîte.
13 Ûtikeende toro mûno ûûya gûtuîka nkîa,
rancûkia meetho naawe ûkaagîa na irio biingî.
14 “Ti kîega!” I bu mûgûri augaga,
aarîîkia kûgûra akathi agîkumagîîria kîra agûra.
15 Kûrî na thaabu na kinya maiga maingî ma goro,
îndî mîromo îra yaaragia ûmenyo i ta iiga rîa goro.
16 Thûkia nguo ya muntû ûra eetîgîîrîîtie kûrûngamîîra îrandû rîa mûgeni,
gwata kîra kînenkanîrîîtwe kîrî gîa gûkaria mûgeni.
17 Biakûrîa bira bionarîîte na njîra itarî mbega birî mûrîo kanyuani ka muntû,
îndî nyumaani kanyua gaake kaûyûraga mûthanga.
18 Mîbango yûûyûraga n'ûntû bwa kûmîrombera ûkûrû,
ûgîtûra ndûa ambaga ûkaromba ûkûrû bwega.
19 Muntû wa mûromo atirî ciri
Kwoogu îîmenyeere na muntû wa kwaragia mantû woogu.
20 Ûra akaaruma îthe kana gina
taa yake îkoorua rîra kûrî na mwindu ûra mûrumanu mûno.
21 Ûtonga bûra bwonekaga na mpwî,
mûthiani bûtiîgagua bûrî na kîthaarimo.
22 Ûtikauge, “Nwa mwanka ndîyie ûthûûku bûbû,”
eteera Mwathani n'we agaagûteethia.
23 Kîthimi gîtarî kîega Mwathani n'akîthwîre
na ithimi bitarî bia ûmma bitimûkenagia.
24 Makinya ma muntû matongoragua i Mwathani,
aabu n'ata muntû aûmba kûmenya njîra ciake wengwa?
25 I mûtego muntû kûthûngûthîra kuuga, “I nkûrutîra Mwathani gîntû gîkî.”
Rîru agacooka kûthûgaania aarîîkia kûthiîtia mûthiîtio ûyu.
26 Mûnene ûmûûme aathûraga antû bara bathûûku
na akabaa îkaanûkia.
27 Kîrundu ûra arî ndeeni ya muntû i taa ya Ngai,
acûûnkûûnaga muntû mwanka ndeeni cwe.
28 Wendo na gwîtîgîka i bitûmaga mûnene akeegua arî mayîîga,
na ûnene bwake bûgatûûrua n'ûtheru.
29 Ûkumio bwa antû baîthî n'inya yao îra barî n'yo
îndî ûthongi bwa akûrû i mbuî ira irî biongo biao.
30 Ngurario cia mûthanju n'ithambagia ûthûûku
nturo n'îtheragia muntû mwanka ndeeni buru.