19
1 Na kaaba nkîa îrî na mîtugo îmîegankûrûki ya kîaa kîra kîaragia ûtaku.
2 Ti bwega muntû kûgîta wîru bwa kûrûtha ûntû na atirî na ûmenyo,
muntû ta ûyu wa mpwî n'abîtagia njîra.
3 Waa bwa muntû wengwa i bu bûmûthiragia
îndî nkoro yake îgacooka kûthûûragîra Mwathani.
4 Ûtonga bûtûmaga muntû akagîa na acoore baingî,
îndî nkîa n'îtiganagîrua kinya n'acoore baayo.
5 Mûnkûûyî wa ûrongo atiaga îkaanûkia.
Wana kinya mwaria wa ûrongo ationoka.
6 Antû baingî i beendaga kwendeerwa n'anene,
na wa muntû wonthe i mûcoore woora eeyanaga biewa.
7 Nkîa n'îthwîrwe n'aruagina bonthe bara îciaranîîrue nabo.
Î acoore baayo bamîthwîre bûgana ata?
Kinya akabeeta akîbeerekaga,
atiboona.
8 Muntû ûra endaga ûûme eendaga nkoro yake wengwa,
na ûra agwataga gûciûkîrwa akoona mawega.
9 Mûnkûûyî wa ûrongo atiaga îkaanûkia.
Wana kinya mwaria wa ûrongo akaathirua.
10 Wa ta bûra bûtarî bwega kîaa gûtûûra ûtûûro bwa gwîkenia,
nwa ta bu bûtarî bwega nkombo kwatha anene.
11 Muntû ûmûûgî atithûûrangaga na mpwî,
na akenaga rîra arekanîra mabîtia.
12 Mûthûûro wa mûnene ûkari ta îgondoka rîa cimba,
îndî kwendeerwa n'we gûkari ta maame marî nyakiini.
13 Mwana ûmûriitu i kînyamaara kîrî îthe;
mûka wa îtheto akari ta mbura îtagûkîa.
14 Nyomba na ûtonga i rûgai rûra muntû atigagîrwa n'aciari baake;
îndî Mwekûrû arî na ûûme aumaga kîrî Mwathani.
15 Ûthao bûretaga toro îînene,
na mûthao akanyamaara i yûûra.
16 Ûra amenyagîîra maathana agaatûûra mwoyo,
îndî ûra atamakagîra mîtugo yake agaakua.
17 Ûra egagîîrua nkîa kîao i Mwathani akoobithagia;
n'we akamûrîa n'ûntû bwa ngûgî yake îmbega.
18 Kaanûkia aana baaku kagiita karî oogo,
ûkarega kûbakaanûkia, n'ûkûbeenyangia.
19 Muntû wa mûthûûro ûmûnene nwa mwanka oone îkaanûkia,
n'ûntû ûkamûtunyûkia rîmwe nwa mwanka ûrûthe bu kaîrî.
20 Thikîîria mataaro na ûgwate moorutani,
kaingo ûgîta ûûme bwa gûgûtûûria ntugû ira ciîyîîte.
21 Nkoro ya muntû n'îgagua îrî na mîbango îmiingî mûno,
îndî mûbango wa Ngai nwa u ûûyûraga.
22 Kîra kîendekaga kîrî muntû i gwîtîgîka,
kaaba gûtuîka nkîa bantû a gûtuîka mûûrongo.
23 Gûkuthûka Mwathani i ku gûtûmaga muntû atûûra mwoyo,
akaganîrwa na atoone thîîna nwa îrîkû.
24 Mûthao airaga njara yake thaaniini,
îndî ataûmbe kûmîcookia amiira kanyua gaake.
25 Cûnia muntû wa kabûthia, na kîaa gîkaagîta ûûme,
ûgondokere muntû arî na mathûgaania meega n'we akaagîta ûmenyo.
26 Ûra aiyaga into bia îthe na akeengatia gina,
i mwana ûra areetaga îgi na kinya kîrumi.
27 Mwan'wakwa wona watiga kûthikîîria moorutani,
ûkaabîtia njîra ya ûmenyo.
28 Mûnkûûyî atarî mwega nabûthagîîria ûmma,
na tûnyua twa antû batarî beega itûmeragia ûthûûku.
29 Îkaanûkia rîa bara babûthûgaanagîria i rîîthuuranîre,
na nturo kîrî mîgongo ya biaa.