18
1 Muntû ûra akaraga wenka arûthaga mantû maake makwîbendana n'athwîre mathûgaania ma bara barî ûûme.
2 Kîaa gîtikenagîîra gûciûkîrwa,
îndî gîkenagîîra mathûgaania maakîo.
3 Ûthûûku bûûyanagia na kabûthia,
îgi narîo rîkaayania na kwaga nthoni.
4 Biugo bia kanyua ka muntû i ta rûûyî rwa kîria,
îndî kîthima kia ûûme i ta rûûyî rûkûthi.
5 T'ûntû bwega kwendeera muntû ûra mûthûûku
na kûrega kûrûthîra muntû ûra arî ûûmaani bwega.
6 Biugo bia kanyua ka muntû ûmûriitu bireetaga bitina,
wa ûntû bunthe bûra arauga i bûreetaga thîîna.
7 Kanyua ka muntû ûmûriitu, n'we wengwa kathiragia
n'ûntû kanyua gaku gaake i mûtego wa kûmûgwata we wengwa.
8 Biugo bia muntû wa nguutû bikari ta kaûmbwa karî mûrîo mûno,
ithûngagîra mwanka icuncîîni bia ndeeni bia muntû.
9 Muntû ûra mûthao ngûgîîni ciake,
i mûruagina wa mwînyangia.
10 Riîtwa rîa Mwathani i kîrîngo kîrî na inya,
muntû ûmwagîru ariugagîria akeegua arî mayîîga.
11 Ûtonga bwa gîtonga i taûni yake îra mbirigîre,
mathûgaaniani maao boonaga ta rûthiingo rûraaya.
12 Mbere muntû agwa i wîkumia bûûyûraga nkoro,
îndî wînyiia bûreetaga gîtîîyo.
13 Gûcookia mbere ya kûthikîîria
i waa na n'îgi.
14 Nkoro ya muntû n'yûmagîîria ndwari,
îndî nkoro îrî na kîeba n'ûû aûmba kûmîûmîîria?
15 Nkoro ya muntû ûrî kîrîra n'îgîtaga ûmenyo
na gûtû kwa muntû ûmûûgî i gûceragia ûmenyo.
16 Kîewa i kîrugûragîra muntû njîra,
i gîtûmaga mweyani athi mbere ya anene.
17 Muntû ûra eethetagîîra mbere oonekanaga akîaria ûmma
mwanka rîra ûra ûngî akaamûûria biûria bia kûmûcûnkûûna.
18 Kuura n'îthiragia îtheto,
na îkaathûrana ncamba ciîrî irî na inya.
19 Kwîganua na mûruanyûkwe nyuma ya bûkûmenana,
n'ûntû bûrî inya mûno nwa ta kûgwata taûni îmbirigîre.
Na nkarari nacio ikari ta mîrîîgo
îra yiingîîte bantû ara airigîre a taûni ndeeni.
20 Muntû n'abaaga maciaro ma kanyua gaake,
na akaganîrwa i maumithio ma biugo bia kanyua gaake.
21 Gîkuû na mwoyo birî rûrîmeeni,
na bara baruendeete bakaarîa maciaro maaru.
22 Ûra ûgîtaga mwekûrû n'agîtaga gîntû kîega;
na i kwendeerwa eegagua endeeretwe i Mwathani.
23 Nkîa n'yerekanaga
îndî gîtonga gîcookagia na ûrûme.
24 Muntû nwa wîgue arî na acoore baingî bakarigia na kûmwînyangia,
îndî kûrî mûcoore ûgwatanaga na muntû kinya nkûrûki ya mûruagina ûra baciaranîrîîtue n'we.