17
1 Kaaba gakûûmbwa kaatheri ara kûrî na ûkiri na ûbooreri,nkûrûki ya îruga rîînene ara kûrî na matheta.
2 Nkombo îra îrutaga ngûgî bwega îkaatha mwana ûra arutaga ngûgî inthûûku,
nwa îgaîrwe rûgai ta ûmwe wa aana ba mûciî.
3 Wega bwa thaabu kana fetha bûmenyagwa na mwanki,
îndî Mwathani n'we ûthimaga nkoro.
4 Muntû ûmûûî athikagîîria rwaria rûûthûûku,
na mûûrongo athikagîîria rwaria rûtarî rwega.
5 Muntû ûra arumaga nkîa n'ûra amîûmbire arumaga,
na ûra akenagîîra kînyamaara atiaga îkaanûkia.
6 Antû bara bakûrû beekumagîria booyûûe,
aana nabo bageekumîria aciari baao.
7 Biugo biega bitibuuyagîra kanyua ka muntû ûmûthûûku,
na kinya ûrongo bûtibuuyagîra kanyua ka mûtongoria.
8 Ngukumo i ta kîama kîrî ûra amînenkanagîra,
wa rûteere rûra aragarûka nwaka akaraga bwega.
9 Muntû ûra arekanagîra mabîtia n'atumaga ûcoore,
îndî ûra akaraga akîririkananagia ûthûûku n'enyangagia ûcoore.
10 Kûgondokerwa kûrî gîtûmi nkorooni ya muntû ûmûûgî
nkûrûki ya kûringa kîaa maita îgana.
11 Muntû ûmûthûûku eendaga kuuna watho akî,
kwoogu mûtongoria atarî na kîao agaatûmwa akarûe n'we.
12 I kaaba kûrîîkana na ndûba ya nka îtuunyîîtwe twana
nkûrûki ya kûrîîkana na kîaa na waa bwakîo.
13 Muntû ûra arîagia wega na ûthûûku,
ûthûûku bûgaatûûra mûciî wake.
14 Kwanjîîria îtheto nwa ta kûrûtha rûkû cirangeeni ya rûûyî.
Kwoogu tigana na nkarari mbere îtheto rînenea.
15 Ûra athongamagia muntû ûmûthûûku, na ûra akaanûkagia muntû atarî na mabîtia,
barî baîrî Mwathani n'abathwîre.
16 Gûtirî na gîtûmi kîaa kwîgua kîrî na mbia cia kûgûra ûûme
nakîo kîongwa gîtirî na bata nabu.
17 Acoore bakaraga beendeene rîonthe,
mûruagina wa muntû aciaragwa kaingo bagateethania kagiita ka thîîna.
18 Muntû ûra atarî na mathûgaania meega n'agwatanaga njara na muntû
na agatuîka mûrûngamîîri wa mûtûûri wake.
19 Muntû ûra endaga kûtheta mûno eendaga wîyia
n'we ûra aakaga mîîrîga yake yîtîîtie akaathirua.
20 Muntû wa nkoro înthûûku ationaga wega,
na mwaria ûrongo n'agwatagwa i kînyamaara.
21 Mwana kîaa i kîeba areetaga
na îthe wa kîaa ationaga gîkeno.
22 Nkoro îra îgwîragua i mûtheega ûmwega mûno
îndî nkoro ya kîeba n'îbobagia mwîrî.
23 Muntû ûmûthûûku athûkagia ngukumo withooni
kaingo aithania ûmma.
24 Muntû ûmûûgî akaraga na ûûme rîonthe,
îndî meetho ma kîaa mariûngaga nthîgûrû yonthe.
25 Mwana kîaa areetagîra îthe kîeba,
na ûrûrû kîrî gina mûmûciari.
26 Ti bwega gûkaanûkia muntû atarî na mabîtia,
kana kûnyamaaria antû bara batarî na thîîna n'ûntû bwa mîtugo yao îra mîega.
27 Muntû ûra arî ûmenyo atiaragia mûno,
na muntû ûra arî na gûciûkîrwa n'eekaanagia.
28 Kinya kîaa gîgakira, i gîtaragwa kîrî na ûûme,
Gîgatumia gîtaarie i gîtaragwa kîrî na ûmenyo.